Wednesday 5 January 2011

L'Mâjeur Peirson - Major Peirson

Peirson pub JerseyCoumme dé raîson, l'Mâjeur Peirson et la Batâle dé Jèrri ont înspithé des rînmeurs Jèrriais:
Naturally enough, Major Peirson and the Battle of Jersey have inspired Jersey poets:


Dialogue entre Doeux Trintez

N'avonge pas notre Milice, et des braves soudarts
Qui vaindront nos aïgui à ligni nos remparts:
Chène sont pas des slopins comme les chêns que Rulcour
Fit vnin ove des cannons qui chergirent à l'arbour,
Et créyant avé prins possession de Jerri,
Sanne 'test vnus, pacque à cous, jusq dans l'vier marchi
Mais là, le brave PIERSON tout d'un co lus maoutri
Qui s'étais ben trompaits en v'nans nos attaqui;
Que nos brave garçons n'avois pas fret ês yiers.
Car dans mains de doeux heures il'tois touos prisoniers.


Nenné d'Saint-Ou

Je fu nèe le six d'Janvi,
Même jeu et même annèe
Que Rull'court vint en Jéry:
I fut r'chu à s'n-arrivèe,
Car il ieut du feu saqui
D'vant qu'l'affaithe fut finie;
Ch'était là dans l'Vièr-marchi
Que Pierson perdit sa vie.

Ch'n'est pon que je m'en r'souveins,
J'l'ai oui conter à men pèthe:
Car il eut un divèrs train;
Ch'tait quthieux dans ouir l'histouethe.
J'en ai accouo un fusi
Qui fut prins à la bataille.
Et, ma fei, j'en ai d'l'orgui,
Quoeque ach'teu ch'seit rein-qui-vaille.


L'Eglise de Saint-Hélier et ses travaux suspendus

Laissons-le subsister... I r'couvre ben des chendres...
Des restes précioeux... Pierson y dort en paix!
Entouorons san tombé des souv'nirs les pus tendres,
C'hest l'Urne consacrai z-au vrai Mars de nouot pais.


Not' vier fusi

Et malgré tout chonna j'y tcheins:
Man grand-grand-père l'prit des mains
De iun de ches soudards Français
Tchi voulur'nt battre les Jerriais
Dans chu bein memorablle jour
Quand i' vinr'nt ichin ov' Rull' court.

Vère, tréjous le six d' Janvii,
Tu m'rappell'ras, o vier fusi;
Tu m'rappell'ras aïtout Pierson
Que jamais nou n'oubliera pon,
Li tchi en combattant mouorrit
Pour saufgardai not' p'tit Jerri.


Unne Compieinte

Et avec les sous qué nou puourrait collecté,
Pour unne belle pierre pour pouvé monté
La belle statue, dé tchi ou vos vantais tant;
Acatais n'en yieunne de Pierson, vaut autant
De trais, en faith' unne buonne; car pour ch'ty là,
Chest ben honteus qué dans not' île y n'y a
Que deusse trais mots, dans la vieille Eglise
Pour dith' qui perdit la vie. Dans unne crise
Coumme not héros se' trouvi -
Y fit ben sen dévé, et y sauvit Jerri.


Not'e P'tit Pays

Car ouê, q'nou peut trouvé dites-mé
Un q'climat qui sait fort pus bé,
Q'not'e p'tit pays dé fruit èt d'f'yieurs.
I'l'y'en a, bouanes gens, dé pièthes ailleurs
J'sommes tous, j'sis seux bein orgiyieurs
Dé vais ichin not'e vieille couleur
La couleur qui dans l'Vièrrh Marchi
PEIRSON! avec sa vie d'fendi.


Le Temps d'Achteu

Nos braves garçons Jêrriais vont campé ès Quennevais,
Pour, en cas d'jèrre, qui s'saient touos prêts,
J'vos garantis que che n's'ait pas du fanne,
Si les Turcs v'naient ichin êprouvé à nos prendre,
Car j'avons oquo d's Angliais qui nos f'thaient crédit,
Comme du temps du Major Peirson dans l' Vier Marchi.

No comments: