L'Entèrrement d'la Rose

Lé Bulletîn d'Quart d'An dé L'Assembliée d'Jèrriais

La St. Miché et Noué, 1976, Vol 4 Nos 21 et 22:

 

L'Entèrrement d'la Rose

Comme châtchun dait l'saver, les êlections du temps pâssé sé faîthaient à tigue de corps. Y'avait les partis du Louothi et d'la Rose (Viyiz Dictionnaire Jersiais-Français à “Louothi”). Ch'tait à St. Ouën, probabl'ye, tch'i' y'avait tréjous ieu lé pus d'excitement et d'annînmâtion. Tout ch'la dispathut graduellement, entre les deux Dgèrres, à. St. Ou pouor la dreine fais auprès l'êlection pouor Député du Sieur Fraînque Lé Feuvre, quand y'eut acouo gentiment d'êcatchîn, tchi baillit eune bâtcheûthe au Sieur Jean Vaûtchi (Vautier), des Ormes, lé Louothi don en remportant pouor la dreine fais. Eh bein, ch'tait là la fîn des êlections d'partis dans l'Île, la dreine a La Trinneté (les Blius contre les Rouoges) ayant ieu lieu tchiques années d'vant ch'la. Mais i' faut dithe qué l'esprit n'avait pon 'couo tout à fait dispathu à St. Ou en 1972 dans l'êlection pouor Député.

Enfin, lé portrait qu' j'èrproduîthons date dé contre la fîn du drein siècl'ye quand l'affaithe battait acouo san pliein. Chu portrait - L'entèrrement d'la Rose et du “Gros Marté" - tch'est dans la possession du Rédacteu, est dév'nu, nou peut dithe, vraiement historique. Il est bein fait et fut dessinné à la main, au crèyon, par Jean Alexandre, né en 1855, fis Jacques, du Mathais - tchèrpentchi et pap'seux - et trouvé sus l'pas d'l'us, dé bouôn matîn, siez l'Chent'nyi Fraînque Coûteur Lé Maistre (grand-péthe du Rédacteu), un grand “Louothi”. Lé portrait fut dessinné auprès la victouaithe du parti du Louothi sus les Rosièrs, à ieune dé ches fanmeûthes êlections, d'vant 1900. La rose dans l'hèrse èrprésente l'emblième du parti et l'gros marté lé mênom dé Ph'lippe Lé Feuvre, tch'était pûtôt l'chef du parti. Dithons qué Jean Alexandre en fit autant étout en dessinnant un portrait d'ses sept garçons et l'env'yant au Rouai. Dans la Salle Parouaîssiale dé St. Ouën sé trouve un grand portrait de chu rouai, Édouard VII, peint (véthe, eune peintuthe chutte fais) par le même Jean Alexandre, atout ses innitiales et la date au bas - J ALX 1904. Dîthons tch'i' s'sait p't-êt' lé seul artiste St. Ouonnais d'aut'fais (vivant dans la pâraisse). Lé célèbre Ph'lippe Jean sans doute fut né à St. Ou, mais en sortit en bas-âge.

Les chefs dé deu èrprésentaient :-

• Ph'lippe Lé Feuvre, du Huthé - lé “Gros Marté ”;
• lé “grand” Fraînque Lé Feuvre, dé Trodez (dé l'aut' côté d'la route), Chent'nyi;
• Ph'lippe Éd. Lé Feuvre, fis Ph'lippe, du Huthé; Moussieu Jean Syvret (du Camp Donné) - hommes d'affaithes;
• lé domestique du Huthé, Louis L'Moine (sus l'âne), un Bréton. Èmèrtchiz l'êp'son. Lé Moine avait 'té arrêté pouor cruauté à l'âne, et l'sang coule dé la bliesseûthe.

Lé monde à r'garder l'entèrrement :- 

(entr'aut's, dé la gauche . . .)

• Un marchand d'ouognons, dé Brétangne,
• Lé “grand” Jean Ricard Lé Montais (Moussieu), tch'était quâthiment siex pids siex pouces dé haut.
• F. Coûteur Lé Maistre,
• Florence Lé Feuvre (4e. dé drouaite), pus tard Dame du Fyi d'Morville, et fe. J. B. L'Feuvre (St. B.), et fil'ye Ph'lippe Édouard,
• La femme Lé Moine (sèrvante), driéthe Florence Lé Feuvre,
• Catherine Boomer, souo-dîthant favorite du “Gros Marté

N.B.-Èrmèrtchiz les cipres sus les chapieaux.

“Un Louothi”