1968: Faut tréjous garder eune pomme pour la sé

Faut tréjous garder eune pomme pour la sé

 

San Antonio, Texas, U.S.A.

Lé 3 d'févri, 1968

 

Moussieu l'Rédacteu,

 

Comme j'l'ai probabliément mentionné d'vant, les gâzettes dé Jèrri prannent longtemps à v'nîn 'chîn, mais i' n'en sont pon mains les beinv'nues. N'împorte tch'est qué j'sis à faithe, j'arrête tout et j'mé mets à la liéthe d'un but à l'autre quand ieune arrive! Ch'est naturel. Un Jèrriais à l'êtrangi est souvent dans l'Île en pensée, et i' sé d'mande tch'est tchi s'y pâsse dépis sa dreine visite. Ch'est dans l'sang! Quant à mé, j'pense en Jèrriais – et j'mé sis veu tchiquefais adréchi la pathole en Jèrrias à tchitchun ichîn en Améthique viyant qué ch'tait dans chutte langue-là qué j'tais à penser dans l'moment!

 

            J'pense bein qué ch'n'est qu'des vièrs comme mé tchi sont d'mème. J'èrchus eune carte d'Noué d'eune vielle anmie l'aut' jour – Mlle Eva M. Luce – soeu des défunts Edwin John (“Jock”) Luce et d'Ph'lippe (d' “La Golarde”) Luce, dé Vancouver, et – en bouan vièr Jèrriais – ou' m'dit : “J'sis assez bein pour mén âge dé 83 ans et 6 mais. J'fais tout man mênage! Tu sautes d'un but du monde à l'autre touos l's ans!" Ou' dait aver envie d'èrvaie Jèrri, car i' m'sembl'ye tch'i' y'a pus d'chînquante ans qu'ou' s'en fut à Vancouver en Colombie Britannique auve san fréthe, et oulle a voué sa vie à l'souangni dans ses vièrs jours.

 

            J'veins d'èrchéver la gâzette du 14 dézembre. La cheinne du 7 n'est pon 'couo v'nue, mais ch'est tchiquesfais d'mème. Il' arrivent à dgi l'adèrt affaithe dé dates. Dans des temps y'en a d'pèrdues en c'mîn, et dans un cas d'mème j'êcris ès anmîns en exil comme mé pour vaie s'i' y'a mouoyen d'en trouver ieune d'êpaîngne.

 

            Comme tréjous, la gâzette est intérêssante. Ou' grandit, étout, et iun d'ches jours ou' s'en va êt' aussi grande comme les nôtres ichîn. Ch'est r'mèrquabl'ye quand nou pense qué Jèrri est si p'tit! Y'a des tristes nouvelles aussi bein comme des jouaiyeuses : La preunmié chose tchi m'a frappé en touanant la preunmié page est lé r'cit d'l'entèrrement du défunt Connétabl'ye et Sénateu “Tom” Lé Mathinné. Dans ieune dé ses lettres – êcrite en Jèrriais – mén anmîn Stanley Anmîn du Mont Mado m'avait dit tchi'i' n'tait pus du rang des vivants. Un aut' bouan vièr Jèrriais au r'pos êtèrnel! Un vraie moussieu campangnard, lé Sieur Lé Mathinné – charmant, întelligent, et voué au service dé san p'tit pays natal. Quand nou-s-allait siez-li nou 'tait seux d'êt' èrchus auve l'hospitalité provèrbiale du temps jadis. Hélas! I' s'en vont à grands pas, les vièrs Jèrriais. Y'en a tréjous tchitchuns d'mains à visiter châque fais qué j'vais r'vaie Jèrri!

 

            Ch'est tréjous întérêssant d'liéthe les délibéthâtions des membres d's Êtats en séance. J'criyais d'vaie tch'est tch'a 'té décidé au sujet du dêveloppement du Fort Régent sus L'Mont d'La Ville, mais j'pense bein qu'ché s'sa dans la préchaine gâzette. Dans la cheinne du 30 novembre passé, j'lius la lettre dé Moussieu E. J. Bétchet. Eune mangnifique lettre tchi montre lé caractéthe solide et consèrvateur Jèrriais! N'est-i' pon raisonnabl'ye dé craithe qu'eune dêpense dé deux millions et d'mi d'livres stèrling – tchi finnithait par êt' bein pus, p't êt' lé doubl'ye – à la fîn du compte, es'sait un fardé accâbliant pour tchiques généthâtions d'Jèrriais à v'nîn?

 

            Jusqu'au moment qu'j'ai liu l'articl'ye d'fond dans la gâzette du 14 dézembre, j'avais pensé qu'touos les Jèrriais s'saient d'la mème opinnion comme Moussieu Bétchet, mais j'vai qué j'mé trompais! EnfIn, jé n'prétends pon d'm'y connaître assez pour donner d's opinnions au sujet, étant trop liain des lieux pour saver l'pour et l'contre à fond, ch'est en tchi j'attends fête dé vaie tch'est qu'en est dans l's Êtats, mais jé n'peux pon m'empêchi d'admither l'couothage du Sieur Bétchet, car ch'est seux qu'un tas d'ses anmîns-mème né sont pon dé s'n idée!

 

            Sans doute, lé profit des lot'ties, lé don par testament et l'fait qué les grand' dêpenses sont pour êt' divisées en trais grosses sommes annuelles font l'fardé pathaître mains lourd, et v'la tchi s'en va adouchi l'affaithe dans l's idées des membres d's Êtats. I' pathaît qu'ch'est dû pour un tas d'pèrsonnes dé vaie eune atchumulation d'sou sans vouler les dêpenser, tandis qu'pour des vièrs consèrvateurs comme mé, sa possession est eune raide bouanne garantie pour l'av'nîn! J'avais un anmîn ichîn – tchi n'est pus – tch'était d'mème. Il 'tait au-fait en toutes choses. Janmais j'n'ai veu un homme pus au-fait! I' n'y avait pon d'soin tch'est tch'il entréprannait ch'tait un succès – mais un succès d'courte duthée, car eune fais tch'il avait atchumulé tchiques sou i' fallait les dêpenser à êprouver eune nouvelle entréprînse tchi finnissait tréjous par l'appauvri acouo eune fais, et i' finnit par mouothi pauvre! I' m'dîsait tréjous qué si j'n'avais pon ieu peux dé spétchuler et d'pliaichi mes sou òu'est tch'i' y'avait la chance dé succès et d'richesse – aussi bein comme lé risque d'les pèrdre – jé s'sais p't êt' dév'nu millionnaithe!

 

            Quant à mé, j'n'ai janmais ieu l'envie d'êt' millionnaithe! Dgieu mèrci, j'en ai assez pour vivre confortabliément et aller en Jèrri d'temps en temps! Tch'est tchi peut y'aver d'mus qu'chen'na?

 

George d'La Forge