1956: La Faithe dé Lessay

Lé Bulletîn d'Quart d'An dé L'Assembliée d'Jèrriais

L'Èrnouvé 1956, No 14:

La Faithe dé Lessay

 

 Tch'est qui n'a pon ouï paler d'la Faithe dé Lessay? Les vièrs Jerriais avaient habitude dé y'aller touos l's ans. Ch'tait là la prom'nade annuelle pouor bein des pièches, et i' ram'naient des j'vaux, et toutes sortes d'articl'yes.

 

Les vielles gens en pâlent acouo et, ma fé, ches dreines années i' faut dithe qué nou-s-a veu gentiment d'gens y r'aller. Mais chein tch'est l'empêchement prîncipa, ch'est d's'y trouver. Et ch'est pouortant si près d'nous. Si l's avions d'Jèrri y'allaient rédguliéthement touos l's ans, bein du monde, nous-mêmes pouor les preunmièrs, f'thaient viage châque septembre. Nou s'rappell'la tréjous d'la preunmié fais qu'nou-s-y fut par avion, deux ou trais ans auprès chutte dreine dgèrre. Nou-s-eut l'privilège d'être les touos preunmièrs dé prom'neurs Jèrriais tchi fîtent viage par avion et attèrrîtent sus les landes de Lessay. V'là tchi n'prînt qu'un p'tit quart d'heuthe, et quand nou vînt à appraichi en d'ssus des chentaines dé vrégies d'la Faithe nou-s-en fut êmèrvilyis, du hutubutu qu'nou viyait la-bas. Et d'être les preunmièrs des Jèrriais à vaie ch'la dé d'dans l's airs - nou n'l'oubliêtha janmais!

 

Chutte faithe, tch'a eune êtendue de pus d'deux milles dé long, a ieu lieu 'les jours dé la Sainte Crouaix' (11, 12 et 13 septembre) sus La Grand' Lande dé Lessay pouor 1,000 ans d'temps. Oulle attithe des mille et des mille pèrsonnes châque année, car ch'est ieune des pus vielles dé toute la France et la pus vielle et împortante de la Nouormandie. Nou-s-y vend des j'vaux (d'amors i' s'y'en trouve dans les 2,000!), des boeufs et des vaques, des bêtes à saie, 2,000 moutons et bein d'autres annimaux, des tchians, d'la volaille, des œufs, d's hîtres, des crabes à co, du paîsson, et des tchuivres, d'la pot'tie, des graies à j'vaux, d's habits, d'la caucheûthe, du lînge, d'la tchîncâl'lie, d'la vaisselle, des niv'lot'ties, des machinn'nies dé toutes les bénites méthes, des tracteurs, des motos, du meubl'ye (dé tchi moderne et d'tchi vyi) - enfîn, tout ch'qué nou peut acater ordinnaithement en ville, d'eune êpîle à eune machinne à battre. Faudrait des pages et des pages à dêcrithe tout ch'tchi s'vend là en êtalage. Car ch'est comme eune ênorme ville tchi s'lève en plieine lande et tch'attithe eune îmmense populâtion ches jours-là. Et d'la mangeaille et du baithe, comme dé raison, à gogo. Véthe, nou-s-y vend dé tout ! Tchi spectacl'ye, qué la Faithe dé Lessay !

 

Les paysans d'partout la Nouormandie et d'par ailleurs s'y rendent de nouos jours en motos mais nou-s-y vait acouo des chents et chents "carrioles" et, faut vaie l'traffi à la sortie d'la Faithe lé sé pouor lé craithe! Les routes n'èrfraident pas, jour et niet. Des restaurateurs mettent lus tentes à haut pouor l'occâsion, et y'en a d'la couleu -  'ouos en chaille! En pliein air nou-s-y tchuit; en entchi des quartchièrs dé vieau et d'bœu, et d'la volaille, et les gens acatent des bédaches de chein tchi lus pliaît et s'assièvent à tabl'ye souos tente, ou sus l'hèrbe, à goudaller et baithe dé raide bouon tchœu. Qué ch'est pittoresque, et întérêssant à vaie - chutte foule en habillement Nouormand et d's êtrangièrs dé touos les pays et d'touos les comports!

 

L'année passée (tch'était l'millénaithe) 80,000 personnes allîtent sus la Grand' Lande lé dînmanche et eune affaithe dé 35,000 bouonnes gens mangîtent souos tente. Pensez, don, tch'i' y'avait toute eune rue dé tentes dé restaurants (au nombre d'47) et dé rôtisseurs, et toute eune rue dé cirques, etc., et d'exhibitions d'toutes les espèces! Et, tout ensembl'ye, y'avait quâsi 700 êtalages! Y'eut des courses, auve des chentaines dé j'vaux y prannant part.

 

Touos accouôteunmés qué j'séyons dé nouos jours à vaie des choses merveilleuses et modèrnes, la Faithe dé Lessay reste, et restétha, iun des spectacl'yes les pus fanmeux et r'mèrquabl`yes tchi piêssent y'aver, et nou peut vraînment dithe acouo à ch't heu en 1956 comme disait aut'fais en Jèrri un vier Nouorrnand (un nommé Prosper Poignand), qué l'chein tchi n'avait pon veu la Faithe dé Lessay 'n'avait ryîn veu'h'!

 

Les grands poètes Barbey d'Aurevilly et Louis Beuve y t'naient, à chutte grand' lande èrnommée et sa faithe dé Lessay, et en ont donné des bouonnes descriptions. Et dé nouos jours la Faithe de Lessay est, comme a 'té écrit par tchitch'uns d'autre - 'La preuve vivante que la Normandie n'est pas une terre qui meurt mais une terre qui renaît...'.

 

F. L. M.