1968: I' n'y'a pon d'sots mêtchièrs!

 I' n'y'a pon d'sots mêtchièrs!

 

San Antonio, Texas,  U.S.A.

Lé 20 d'janvyi, 1968

 

Moussieu l'Rédacteu,

 

Ieune des aut' sémaines j'vouos disais qu'les filles appranaient la vocation d'couôtuthiéthe quand j'tais mousse. Eh bein, il' appranaient la vocation d'féth'resse étout. Y'avait eune Missis Hubèrt tchi féthait pour lé monde. Ou' d'meuthait au Grand Bel, à St. Ouën. Jé n'sai pon s'ou pranait d's apprenties, mais y'a des chances que oui. Ch'tait eune bouanne vocation pour eune fille dé fèrmyi. Auve les grand' fanmiles dé chu temps-là y'avait tout pliein d'lavage et d'féthage à faithe à la maîson. I' fallait laver et féther le lînge dé liet – lincheurs et entchies – et l'lînge dé corps, sans pâler d'doublièrs, etc. et pis fallait emb'ser et féther les c'mînses, collets, grands et p'tits ridgeaux, etc. Comme dans l'cas des couôtuthiéthes, les féth'rêsses lus m'ttaient tchiquefais sus lus compte, ou bein il' allaient féther par les maîsons à tant par jour.

 

Par lé temps tch'i' finnissaient lus vocation, les filles 'taient d'âge d'aver des jannes hommes. Dans l'hiver, quand i' faîsait niet à chîntch'heuthes, les garçons tchi pouvaient s'êcapper d'siez ieux pour eune heuthe ou deux allaient les r'condithe à la sortie d'la lavethie ou d'la couotuth'thie – comme à la sortie d'l'églyise au Dînmanche au sé.

 

Eune aut' vocation qu'les jannes filles appranaient dans man janne temps 'tait la cheinne de “Modiste”, ch'est à dithe faithe et décorer des chapieaux pour les femmes. J'n'ai pon connu un vraie mot Jèrriais pour chen'na. L'mot Angliais “Milliner” 'tait dêjà en usage quand j'tais mousse. Nou n'viyait pon d'chapieaux à femmes touos faits dans un tas d'boutiques comme à ch't heu dans chu temps-là. Quand j'tais tout mousse nou n'viyait pon fort de chapieaux sus la tête des femmes. Ma grand'grand'méthe mettait acouo eune coëffe, et manman et la grand' partie des femmes dé s'n âge mettaient un manniéthe dé nièr pétit pliat et bêlong chapé, amathé souos l'moton atout deux buts d'riban tch'étaient couôsus quâsi en driéthe.

 

Manman appelait ch'la un “Bannète”, mais i' n'avait autcheune èrsembliance à la Capote tch'était appelée un bannète étout. I' couvrait à peine lé haut d'la tête et ché s'sait p't-êt' un p'tit bas toque tchi lî r'sembliéthait l'pus. Ch'est seux qu'la tante Vine s'en r'souveint, d'chu chapé-là, et p't-êt' qué Madanme Kathleen Le Maistre en a iun dans sa bouanne armouaithe. S'ou' voulez vaie l's habits d'femmes d'ancienneté ou' peut vouos en montrer un tas!

 

Pus tard, vièrs lé c'menchement du siècl'ye des chapieaux - p'tits et grands - fîdrent lus appathence, et par lé temps qu' j'avais treize ou quatorze ans il' 'taient grands et décorés atout des plieunmes ou des flieurs et tchiquesfais même d's ouaîthieaux! Quand nou s'assiévait tout près d'eune jeune fille atout san chapé sus sa tête, nou-s-avait tchiquesfais l's ouothelles catouoillis par les plieunmes dessus, ch'tait eune bouanne estchuse pour sé mett' la tête souos san chapé et la joue contre la sienne!

 

Dans chu temps-là, toutes les filles gardaient lus g'veux longs, et i' les m'ttaient “à haut” quand il' avaient dans les dgiêx-huit ans, pus ou mains accordant l's idées d'la m'mèe. Ch'tait l'êpoque où'est qu'la glouaithe dé la femme 'tait ses g'veux comme nouos l'dit un diton Angliais. Dans des temps - et ch'la bein rarement - nou viyait eune femme tch'avait ieu les g'veux copés courts à cause dé maladie ou accident et nou n'pouvait pon en r'vénîn quand nou la viyait nueue-tête! Oulle 'tait eune vraie tchuthiôthité!

 

Comme les temps ont changi! Ch'est l's hommes tchi gardent lus g'veux longs à ch't heu, et les femmes tchi les copent! Et si eune femme veurt acaté un chapé i' n'est pon bésoin d'aver eune modiste à en faithe iun. Ou' peut même en acater iun siez Woolworth! Y'en a là pour touos les goûts!

 

Ch'est d'même en Améthique étout. Y'a des chapieaux à vendre siez Woolworth mais les filles n'en mettent pon fort. I' vont à l'êcole jusqu'à 18 ans, et jusqu'à 22 ou pus quand i' vont à l'unnivèrsité. J'mé d'mande tch'est tch'i' valent comme femmes dé mênage quand veint l'temps dé s'mathier?

 

Ch'est vrai qu'l'Améthitchaine sait un tas d'choses qué la Jèrriaise dé man janne temps n'savait pon. Quand j'vai ma p'tite fille dé 19 ans, tch'est à l'unnivèrsité au Texas, ou' m'pâle dé ses léçons d'“Biologie”, dé “Physiologie”, d' “Astronomie”, etc. etc. et j'avoue qué j'n'y connais pon grand' chose mé-mème dans ches choses-là. J'tions trop embarrassés à gângni nouot' vie quand j'tions jannes, les Jèrriaises dé m'n âge et mé, pour aver ieu la chance d'êtudier des choses si întérêssantes. Mais la Jèrriaise dé seize ans savait dêjà comment souongni d'un mênage (et d'eune fanmile au bésoin), et ou' pouvait faithe eune raide bouanne bollée d'soupe dé caboche! Et ou' savait comment prépather et tchuithe un fricot d'baînis et d'ormèrs. Né v'là d'tchi tchi vaut la peine!

 

George d'La Forge