Quand l'Duc de Nouormandie (Lé Rouai) Veint en Jèrri

 Lé Bulletîn d'Quart d'An dé L'Assembliée d'Jèrriais

L'Èrnouvé 1954, No 6:

Quand l'Duc de Nouormandie (Lé Rouai) Veint en Jèrri

Par Ph. Ahier, B es Sc., et George F. Le Feuvre

Quand lé Rouai est en Jèrri, il est l'suprême seigneu dans l'Ile et n'y'a qu'à li qu'hommage est deu - mais, suivant iun des privilèges accordés à l'Ile, l'honneur n'est deu qué quand lé Rouai est actuellement en Jèrri. La seule exception est quand lé Rouai n'peut pon êt' présent en pèrsonne, et tch'il autorise eune Commission Spéciale d'agi pour li. Dans chu cas-là, l'hommage est donné à la Commission comme réprésentante dé la personne dé Sa Majesté - mais ch't' occasion est rare.

L'hommage deu à la personne dé Sa Majesté exige qué lé seigneu sé prononce comme étant san "liège", et i' faut qué ch'la s'faiche en pèrsonne.

 Lé seigneu (disons, par exempl'ye, lé chein d'St. Ouën) met ses mains entre les mains d'Sa Majesté, lî disant en même temps : “ J'sis votre homme à Vouos porter fouai contre tous!”

En Jèrri, hommage au Rouai est deu par les francs tenants (l'y-en a chînq) d'Sa Majesté - St. Ouën, Rôzé, La Trinn'té, Samarès et Mélêches - et par les aut' seigneurs.

Dé toute chutte noblièche dé l'Ile, l'y-en a deux tchi daivent des services spéciaux tchi sont mentionnés dans l's Extentes dé 1331 et 1607 :-  

1) Les seigneurs dé Rôzé et des Augrès daivent aller à j'va dans la mé à la rencontre du Rouai quand il arrive en Jèrri, jusqu'à qu'la mé touche la souos-ventriéthe du j'va. I' dait l'même strvice pour èrcondithe lé Rouai quant i' tchitte l'Ile.  

2) Lé Seigneu d'Rôzé est lé Bouteilli (“Butler”) du Rouai quand Sa Majesté est en Jerri.

3) Lé Seigneu d'La Trinn'té dait bailli un coupl'ye d'maillards au Rouai.  

Quand lé Rouai George V vînt en Jèrri lé 11 dé Juilet mil neu' chent vîngt-ieune, Reginald Raöul Lemprière, Ecuier, lé Seigneu d'Rôzé dé chu temps-là et (s'lon l' “Evening Post ") Bouteilli héréditaithe du Rouai, et l'Mâjeur John Francis Giffard, Seigneu des Augrès - tchi d'vaient, comme j'vouos l'disons, lé sèrvice dé rencontrer lé Rouai au bord de la mé - allîtent à sa rencontre sus la cauchie Albèrt. Lé Rouai lus dit: “Av'ous peux d'vouos mouoilyi dans l'ieau ou d'sali vouos neuves braies, ou d'attraper eune suée d'fraid ? . .  Ou' n'avez pon fait vouot' dévé - ch'est à dithe pas d'la maniéthe spécifiée dans l'Extente!" Ou n'nouos criyiz p't'êt pon, bouannes gens, mais j'avons ouï d'bouanne part qué ch'la s'est rêellement passé ; appathemment lé Rouai connaissait nouos couôteunmes et l'sèrvice que j'lî d'vons !

Mais, v'nons à la Cour d'Héritage. Quand lé Rouai entrit dans la Cour, lé Bailli, Messire William Henry Venables Vernon, lî dit: “Sire, Né v'chîn la Cour d'Héritage dé Votre Majesté - la pus vielle Cour dans l'ouêst dé l'Europe. Oulle a siégi ichîn dépis l'jour qu'ou' cêssit à siégi dans l'Vièr Châté d'Gouôrray. Vouos pliaît-i' qu'nouos seigneurs Vouos faichent hommage?”

Le Rouai ayant grâcieusement donné san consentement, san Protchuleux-Général, Henry Edouard Lé Vavasseur dit Durell, Ecuier, fit l'appel en disant : “Il a plieu a Sa Majesté lé Rouai, not' Duc, dé faithe compathaître dévant li ses francs tenants et accepter lus fouai et hommage!" Et pis les seigneurs fûtent app'lés dans l'ordre suivant :-

St. Ouën          Reginald Malet de Carteret.

 Rôzé   Reginald Raöul Lemprière.

 St. Germain    Charles Edouard Malet de Carteret.

 St. Jean la Hougue Boëte       Alexander S. Raworth.

 Les Augrès     John Francis Giffard.

 La Hague       Charles Lambert Helleur Le Cornu.

 Franc Fief en St. Brélade       Robert Ranulph Marett.

 Es Poingdestres          Robert Clément Le Quesne.

 Lemprière en St. Hélier          Ernest Percy Marquand Le Sauvage.

 

L'y-en avait d'aut' tchi taient présents, mais i n'fûtent pon app'lés à faithe hommage. Nou pense qué la cérémonie fut racourchie pour qué lé Rouai n'fusse pon trop lâssé; il avait un fort jour dévant li, ou viyiz. Mélêches n'était pon la. La gâzette nouos dit qu'à m'suthe qué lus noms 'taient app'lés, châque seigneu sé butait sus ses pids d'driéthe, joignait ses mains et, en s'înclinnant vèrs Sa Majesté, faisait hommage en disant: “Je sis votre homme liège a vouos porter fouai et hommage contre tous!”

Lé Rouai George prînt les mains du Seigneu d'St. Ou entre les siennes et, s'înclinnant li-meme, èrconnut l'hommage dé Moussieu d'St. Ou et dé touos l's aut' seigneurs en même temps. La raison qué l'Seigneur dé St. Ouën fut chouaîsi comme lé r'présentant dé touos l's aut' est qué l'Fieu Haubèrt et Seigneûthie d'St. Ouën est lé chef fieu d'l'Ile.

Quand la cérémonie fut finnie le Protchuleux d'mandit au Rouai s'il 'tait prêt à r'chéver les deux maillards dé la part dé Moussieu d'La Trinn'té. Lé seigneu avait les deux ouaîsieaux sus un bieau grand pliat en argent. Lé Rouai acceptit pliat et maillards et les baillit a san R'chéveux-Général.

Lé Rouai n'lé savait probabl'yément pon, mais lé pouorre Moussieu d'La Trinn'té eut d'la peine à r'prendre possession d'san pliat en argent! Je n'pouvons pon vouos dithe si le Rouai mangit les canards, ou si ch'tait lé R'chéveux tchi s'en rigalit. I' pathaît qu'pèrsonne ne savait pour seux si Moussieu d'La Trinn'té d'vait l'pliat aussîn bein qu'les ouaîsieaux.

Eh bein, bouannes gens, à ch't heu' que j'vouos avons d'visé au sujet des vielles couôteunmes à l'occasion des visites de la Rouoyauté, j'allons vouos d'mander combein d'nouos Rouais et Reines sont v'nus en Jèrri. Nannîn? Eh bein, j'criyons qu'nou pouorrait les conter sus les dgiex dés. Lé Rouai Jean; san fis, Henri III; Henri VII quand il 'tait Comte de Richmond ; Charles, Prince  Galles, en 1846, pis quant il 'tait Rouai en 1649-50 ; la Reine Victoria deux fais (1846 et 1859) ; lé Rouai George V en 1921 ; lé Prince de Galles en 1925; George VI en 1945; la Princesse Elisabeth, a ch't heu' not' Reine Elisabeth II, et s'n homme, lé Duc d'Edimbourg.