1968: Au motcheux la moqu'sie!

 Au motcheux la moqu'sie!

 

San Antonio, Texas, U.S.A.

Lé  10 d'févri, 1968

 

Moussieu l'Rédacteu,

 

            Ieune des choses qué l's hommes faîsaient pour sé passer l'temps au sé quand j'tais mousse ès Landes à St. Ouën 'tait d'jouer ès tchil'yes. Man p'pèe y jouait souvent. I' pathaît tch'il 'tait souvent l'preunmyi quand i' jouaient pour les prix. Il' allaient jouer à l'Hôtel dé L'Êta dans chu temps-là, et la grand partie d'ieux jouaient ès tchil'yes pour eune volée at pâssaient l'reste d'la séthée dans l'aubèrge !

 

            J'm'èrsouveins d'aver ouï man p'pèe raconter eune scene entouor chein tchi s'arrivit dans l'aubèrge eune séthée. Iun des cheins tchi 'tait à baithe dit à un autre qué ch'tait seux qu'la raison qu'sa janne fille l'avait tchitté 'tait viyant tch'il avait les gambes vèrques et l'nez crotchi! Il' en avaient dêjà deux d'goûts à bord – justément assez pour vouler s'entr' chicangni – et l'chein tch'était supposé aver l'nez crotchi dit à l'autre qué s'i' n'taisait pon sa goulle i' s'en allait lî crotchi l'sien, li, san nez, et li-êcauffer l's ouothelles en mème temps! Comme ou l'savez bein, i' n'y a pon pus bête qué d's hommes en bouaisson, et l'affaithe touannit salope. Dans un clyîn dg'yi les deux bachouards 'taient à lus entr'capuchi !

 

            Quand l'aubèrgiste vit l'sang voler, il env'yit san mousse qu'si l'Offici du Connêtabl'ye tchi d'meuthait quâsi à côté d'l'hôtel. Je n'm'èrsouveins pon d'san nom, y'a si longtemps – au mains septante ans – dépis qué p'pèe 'tait à raconter chen'na dans la forge. Ch'tait eune séthée dans l'hiver quand il' 'taient à faithe des fièrs dé tchéthue et qu'la forge 'tait plieinne dé fèrmièrs tchi d'meuthaient dans l'vaîsinné et tchi v'naient y passer la séthée. Mais pour èrvénîn à nouot' histouaithe: L'Offici du Connêtabl'ye avait veu hardi d'baithie viyant tch'i d'meuthait si près d'l'aubèrge, et il avait l'avis d'saver qu'un homme tch'a bu n'est pon dans ses bouans sens. I' savait bein étout, qué si un ivrouongne 'tait arrêté et mîns à l'amende ou env'yé en prison qué ch'tait sa femme et ses mousses tch'en souffraient l'pus, ch'est en tchi quand il 'tait appelé à mains qu'tchitchuns fûssent assonmés i'lus dîsait d's'en aller siez ieux tranchil'ment et ch'tait tout finni. Il avait mème 'té connu d'aver lié san j'va et d'aver porté un homme siez li dans san quèrre quand il 'tait trop êbédé pour marchi tout seu et trouver san c'mîn! Quand i' fut don appelé chutte séthée-là, i' ramâssit san Bâton d'Justice dé d'dans l'titheux du drécheux où'est qu'sa bouanne-femme lé gardait dans eune bouaîte èrdoubliée dé v'lous et i' l'mînt dans sa pouchette dé grand'câsaque et s'en allit à l'aubèrge en lî dîsant tch'i' s'sait r'vénu dans dgiex munnutes !

 

            Un janne homme dé L'Êta, tch'était la bête au dgiabl'ye, 'tait assis sus eune scabelle tout près d'la porte quand l'Offici entrit dans l'aubèrge. Chu janne home-là n'bévait janmais rein d'pus fort qué d'la limonnade, mais i' s'pliaîsait à y passer ses séthées à bailli d'sa becque. En entrant, L'Offici s'mâtit à côté d'sa scabelle, sa grand'câsaque ouvèrte et ses mains dans ses pouchettes de braies, et l'janne homme avisit l'but du Bâton d'Justice dans la pouchette d'la grand'câsaque. I' s'adonnait tch'il' avait 'té en ville et avait acaté eune livre d'saûciches pour sa m'mèe, mais i' n'avait pon 'couo 'té siez li, et quand i' vit l'Bâton d'Justice i' l'dêhalit d'la pouchette dé grand'câsaque sans faîsant la minne dé rein, et y mînt ieune dé ses saûciches!

 

            L'Offici n'pouvait pon s'faithe ouï, et i' mînt sa main dans sa pouchette pour dêhaler san Bâton d'Justice et montrer s'n autorité. I' fit ch'la dêliêment, et quand i' l'vit la main ch'tait eune saûciche tch'i' l'vit en l'air ! Les garçons s'êgouffîdrent à rithe, et la bastaude arrêtit, mais l'Offici 'tait mârri pour la preunmié fais d'pis tch'il 'tait d'la police. I' vit l'patchet d'saûciches dans la main du janne farceux et s'appèrchut tout d'suite tch'est tchi y'avait joué eune farce d'mème. I' lî d'mandit d'lî r'donner san Bâton d'Justice et né v'la où'est qué l'farceux fît sa mêprînse! S'i' li-avait donné l'Bâton, l'Offici – tch'était d'bouan tchoeu – l'éthait tout probabliément laîssi aller atout eune èrprimande mais i' fît la minne dé n'saver pon tch'est tch'avait l'Bâton et r'fusit dé l'laîssi fouoilli dans ses pouchettes pour lé trouver et l'Offici fut oblyigi d'l'arrêter et l'présenter d'vant Justice pour aver résisté à l'autorité d'la police. Sa farce fît feu par la tchulasse, car i' fut mîns à l'amende !

 

            Sans doute l'Offici du Connétabl'ye n'pouvait pon faithe autrément sans êt' la rîselée des gens d'là l'tou, et partitchuliéthement viyant tch'il 'tait nécessaithe d'asseûther s'n autorité et la dîngnité d'sa chèrge quand ch'tait affaithe dé garder l'ordre dans l'aubèrge. J'èrgrette dé n'aver pon r'ténu san nom. Si j'tais en Jèrri j'n'éthais p't êt' pon d'peine à l'trouver dans l'Almmonâs d'La Nouvelle Chronique dé ches temps-là, mais j'n'en ai pon ichîn! Mais ou' viyiz bein qué ch'n'est pon d'aniet qu'la Police Honorifique fait san d'vé !

 

George d'La Forge.