1948: would women make better States Members than men?

Domestic discussion by George d'La Forge in 1948: would women make better States Members than men?

Les d'vis du Bouan'Homme George

 

            Mêrayieu est excitée dépis qu'oulle a liu dans le Chronique que l'y'à tchestion d'met' des femmes dans l's'Etats comme Députés ! "Et pourtchi pas?" qu'ou' nouos dit: "L'y'à bein des femmes tchi f'thaient d'bein milieurs Députés qu'un tas des cheins tch'y'sont acheteu, dans l's'Etats, sustout les cheins d'la Ville ! Ches'là né font qu'bagouller tout l'temps, - à êprouver à dithe ès campagnards comment fèrmer, et combein d'oeus qu'lus poules dev'thaient pondre, et combein d'pots d'lait qu'lus vaques dev'thaient ou n'dev'thaient pas donner !

 

            "Quand i' n'sont pas dans l's'Etats, i' sont à înventer un tas d'papièrs pour les pouorres dgiablyes d'fèrmyièrs à remplyi ! Iun d'ches jours j'm'attends qu'les Porteurs dé Lettres s'en vont êt lâssés d'aver à porter ches papièrs-là ès fèrmyièrs et i' s'en vont d'mander pus d'gages, et pis la vie r'enchiéth'tha acouo ! Ch'est honteux ! I' faut aver permission pour tout faithe, acheteu, et si ch'là continue, i' s'en va la faller engagi un êcrivain pour remplyi touos ches papièrs-là ! Allous m'dithe que les femmes, tch'ont à gouvèrner l's'hommes siez ieux, ne pouorraient pas gouvèrner not' p'tit Jèrri mus qu'ch'là ? "

 

            "J'ai ouï man grand'péthe dithe qué quand san couosîn Amice tait Député..."

 

"Là ! T'en vas-tu acouo nous raconter ch't' histouaithe-là ?" j'lî dis: "Tu sai bein qu'y'à quâsi chent ans que l'vièr Amice tait Député ! Les temps ont changi !"

 

"Ch'est grand damage, tch'ils ont changi !" Mèrayieu continuit : "Et chein tchi m'fait mârri, ch'est qu'un tas d'mistenfliûtes tch'i' n'peuvent pas mème pâler l'Jèrriais sont là dans l's'Etats à êprouver à les changi accouo pus !"

 

            Quand nou va en ville acheteu nou s'créthait quâsi dans un pays êtrangi ! J'allis dans ieune de nos grand' boutiques dans la Rue d'Driéthe l'aut' Samedi pour acater un cotillon, et la hardelle driéthe le conteux, peinte et poudrée comme eune poupette, mé r'gardait comme si j'avais êcappé d'l'âsile quand j'lî pâlis en Jèrriais ! Oulle engliaîchînit tchique-chose et s'en allit chèrchi un vyi pour mé d'mander tch'est que j'voulais. I' pâlait l'Jèrriais, mais i' m'dit tch'il avait grand r'gret, mais i' n'en vendaient pon, d'cotillons, car les femmes d'acheteu n'en font pas servi !"

 

            "Il est grand temps qu'y'aies du changement ! Et j'vouos dis tch'i' faut des femmes pour dithe ès grosses-têtes dans l's'Etats d'en par ioù qu'nou-s en est !"

 

"Eh bein, ma femme," j'lî dis: "Ch'né s'sait p't'êt pas tant mal si tu n'perdais pas la tête, mais tu sai bein té-mème que tu t'mârris trop vite ! La seule maniéthe de vivre en paix auve té est de s'taithe quand nou n'est pas de t'n'avis !"

 

"Mais ch'est viyant que m'n'avis vaut mus que l's'autres – tu l'sai bein !" ou' m'rêponnit .

 

"P't'êt' bein," j'lî dis: "Mais i' n'faut pas oubliyer qu'ch'es sait un drôle dé monde si touous les gens taient d'la mème opinion !"

 

"Pourtant," ou' m'rêponnit: "Ch'est dans l's'Etats qu't'as ouï ches mots-là: "mème opinion," j'pouorrais au mains en dithe autant !"

 

            Connaîssant Mèrayieu quand ou' s'y met, j'dis a Frankie tch'i' tait temps d'nous couochi. Quand j'tions à nous d's'habilli, Frankie m'dit: "Tch'est qu't'en crai, p'pèe, d'met' des femmes dans l's'Etats ?"

 

"Eh bein, man garçon," j'lî rêponnis: "Ta méthe est eune femme èrmerquablye ! Quand ès fèrmyièrs, oulle a raison, mais j'aime acouo mus vaie d's'hommes dans l's'Etats qu'des femmes. Ils oubliethaient bein vite la fèrmethie eune fais la-d'dans, et i' lus met'taient à passer des louais pour faithe les hommes laver les vaissieaux touos les jours et faithe lé lavage au Lundi ! Couoche-té, et cries-mé quand tu dormithâs !

 

            George d'La Forge

Les Chroniques de Jersey 10/1/1948