Lé Bulletîn d'Quart d'An dé L'Assembliée d'Jèrriais
La St. Jean 1955, No 11:
La Grand' Tchéthue
La touonn'nie d'tèrre en Jèrri aut'fais 'tait eune occâsion spéciale quand touos les fermièrs d'un vaîsinné (ou des pathents) s'entr'-aîdgaient. Dans la matinnée la bouochie 'tait portée au clios (ch'tait d'amors d'la gâche dé pâte à corînthe) et ofûche du café, mais i' n'mantchait pon n'tout du cidre dans les jougues. Le sé d'chu jour-la lé fèrmyi fournissait lé grand r'pas et l'restant d'la séthée (et tchiquefais eune partie d'la niet étout) sé passait en rêvillon - d'la dans'sie, d'la musique et du chant, et des jeux d'cartes. Et, souvent, à r'quémenchi l'lend'main !
La journée d'touonn'nie r'présentée dans l'photo (à la fîn du Bulletîn) s'faîsait dans l'clios appelé Lé Pré, à La Neuve Fontaine, dans la Tchilliette dé Millais, à St. Ou dans les travèrs dé 1900. Ché n'tait pon ieune des pus grands tchéthuethies, car nou-s-y liait tchiquefais huit j'vaux sus la grand' tchéthue et quatre sus la p'tite et y'a acouo des gens vivant tch'ont veu ch'la. Car nou fonçait bein pus atout la tchéthue qu'nou n'fait d'nouos jours. Mais dans chu cas-chîn y'avait quat' bliancs j'vaux l'avant sus la grand' tchéthue (nou n'vait pon l'quatrième) et deux (un blianc et un autre) sus la p'tite a brîsi.
Allant dé gauche à drouaite, les gens au clios 'taient : F. Vibert Le Feuvre (pus tard Connêtabl'ye, et Juge), natif du vaîsinne, Pierre Carré (des Landes), Henri (ou Harry) Le Boutillier, pus tard dé La Gabouothell'lie, Jean Amy, dé Grantez, Ph'lippe Syvret (pus tard Cap'taine), dé Maison Neuve, Grantez, Jean Lucas d'La Ville Bagot, et John Lucas, san fis. Quant au drein d'la lîngnie nou n'a peu l'nommer pouor seux. Dé chutte dgaîngue dé vièrs Jèrriais, lé Juge Le Feuvre (l'aûgni d'la propriété dans l'photo) est acouo pliein d'vie, comme étout l'Sieur Le Boutilyi (touos les deux hors pouor lus nénantaine!) et l'Sieur Lucas, fis (tch'est dans sa septentaine) - péthe dé l'Assistant Rédacteu d'chu Bulletîn.
No comments:
Post a Comment