1969: Ambassadeu en Nouormandie

 Lé Bulletîn d'Quart d'An dé L'Assembliée d'Jèrriais

La St. Miché et Noué 1969, Vol 3, Nos 18 et 19:

Ambassadeu en Nouormandie

 

Le Ménage ès Feuvres,

Les Landes, St. Ouën.

Lé 23 d'juilet, 1969.

 

Moussieu l'Sénateu Rom'thi,

Président, L'Assembliée d'Jèrriais.

 

Moussieu l'Président,

 

Comme j'vouos l'avais promîns à l'occâsion d'la rêunion mensuelle à La Corbiéthe, j'èrprésentis L'Assembliée lé 13 dé juilet, 1969, à la bénédiction des clioches dé l'Abbaye d'La Lucerne - Abbaye de Chanoines Réguliers de l'Ordre de Prémontré - en Nouormandie par Monseigneu l'Êvêque dé Coutanches et d'Avranches.

 

La cérémonie du bâptême des clioches et d'lus bénédiction fut suivie par eune concélébration d'la Sainte Eucharistie, lé célébrant prîncipa étant l'Êvêque lî-même, ses concélébrants étant l'Abbé Le Légard et plusieurs chanoines et prêtres, y înclius des prêtres dé l'Ordre de Prémontré tch'étaient v'nus d'Belgique exprès pour l'occâsion.

 

J'fis part des félicitâtions d'L'Assembliée à l'Abbé Le Légard, tchi l'avait învitée d'assister ès cérémonies, et, à san tou, i' m'a d'mandé d'vouos r'mèrcier pour aver accepté l'învitâtion et env'yé un r'présentant. Comme ou l'savez, l'Abbé est un vièr anmîn et admithateu d'L'Assembliée.

 

J'èrprésentis L'Assembliée, étout, lé 19 dé juilet, à, l'occâsion d'la célébration du chentième annivèrsaithe dé la naissance du fanmeux Louis Beuve, grand poète et êcrivain Nouormand, et du vîngtième annivèrsaithe dé sa mort. Pour l'occâsion, eune Grand' Mêsse dé Requiem fut chantée dans l'églyise dé l'Abbaye par l'Abbé Le Légard, assisté par chanoines, prêtres et chantres, anmîns d'l'Abbaye, en présence des membres d'la fanmile du poète et d'Nouormands habilyis dans lus habits du temps pâssé. A ch't' occâsion, l'Abbé Le Légard honorit L'Assembliée d'Jèrriais en pèrmettant à vouot' èrprésentant d'êt' lé sèrvant d'la Mêsse dé Requiem.

 

Un autre anmîn d'L'Assembliée, lé Professeur Fernand Lechanteur, Proviseur du Collège Malherbe à l'Université d'Caën, 'tait iun des Nouormands distîndgis et savants présents à la célébration, et i' mé d'mandit d'faithe bein ses complyîments ès officièrs et à touos les membres d'L'Assembliée.

 

En vouos r'mèrciant, Moussieu l'Président, pour m'aver confié l'honneu d'être l'ambassadeu d'L'Assembliée en Nouormandie pour les deux occâsions, j'ai l'honneu d'être

Vouot' sèrviteur,

GEORGE F. LE FEUVRE.