In 1913 Mrs Pain and her daughter went to the wedding of the year at Rozel Manor, and had a day to boast about...
How the Ladies Fared at the Function
Quand Piteur nos eut dit que touos les viers Jerriais de bouonne famille s'aient bin v'nus ès grandes neuches du Monyi d'Rozé, j'dit du coup a Lonore. Les Pains en s'ront du coup! Car, s'nou peu pàslé d'ancien'té, j'en soummes, du bord de m'n'houmme. Même que Moussieu Nicolle, le sien tchi s'otchupe de fouollyi dans les viers contrats, peut prouvé qu'y'avait des Pains a un diné qui fut dounné au Monyi en 1312, pour fêté eune bataille ou-ès qu'les soudards a Moussieu d'Saint Ou fûtes èsmaglyis sus la C'meunne de Gouorét.
Nos v'la don a prendre nos plians pour allé a chutte belle neuche. Lonore passi deux jours a lavé et emp'zé not' blianc, et j'eumes eunne p'tite couotuthiethe (trente sous par jour et a diné dans la tchuisinne avec Samuel) pour met' des ribans et d'la dentelle un mio partout sus l'bliu fro a ma fille. Quand a san chapé, ch'en fut yun que j'lis chouèsi a not Clob: l'Clob a chapiaux de tchi j'vos ai pâslé. Un gris, a large bords értroussés ov des ailes d'héthonde tout au tou.
Ne v'chin v'nu l'grand jour! Piteur avait r'tenu quat' plieches pour nos deux dans la 'bus de Saint Martin, a seule fin d'n'être pon sqouizie.
Et pis nos v'la en l'heu au Monyi. Y'avait deja pas mal de monde dans la cache, sus l'herbe, et dans les gardins, et a tachi d'èspié par les f'nêtres pour vaie l'meubye et offuche les presents. J'avaimes fait l'tou du Parc deus-très fais, autant pour vaie les gens coumme pour lus dounné eunne chance de nos r'gardé sus toutes les couotuthes (ch'que j'en fis, ch'tait pour l'amour de m'n'èsfant; car, pour de mé, Djeu merci, y'a longtemps qu'j'ai mint d'coté toutes chès vanitée la) et, sans m'vanté, j'peux dithe que tout l'monde se dèstouonit pus d'eunne fais pour s'ent' dithe: "Tchès chette là?" Y'en avait même qui printes Lonore pour ieunne des 'bridesmaid,' et les p'tits garçons criaient hourah! sus not' passage.
Betot né v'la un houmme qui sort du Châté et s'en vint a not' rencontre. I' nos fit un grand salut et dit qu'Moussieu nos avait r'counus, et nos pliethait-i v'nin par ichin? I' nos fit entré par la porte d'la tchuisinne, nos condisi amont les d'grès d'driéthe (ch'est pour èsvité la 'croud' qu'est souos l'Portico, qui nos dit) jusque dans eunne mansarde au tout haut d'la Tour. La! qui nos dit, en nos montrant la lutchèrne; en montant sus eune tchaise chatcheunne a vot' tou, et en cantant vot' tête a gauche, ous éthez eunne belle veue d'la carre du vivi! Ey quand bin même i' tcherait d'la plyie a verse, le bieau fro a Miss Pain n'en souffrithait mie.
I s'en fut la d'sus en nos disant qu'javaimes la miyeu plièche dans tout l'Châté, et qui s'n'allait touôné la clié sus nous d'craint que d'autres invités n'vinsent nos dèsrangi.
J'fûmes la d'dans jusqu'a néthe niet! J'hôtais sus un sofa, en pensant qu'eunne tassée d'tée ne s'ait pas de r'fus, tandi qu'Lonore 'tait oquo jutchie sus la tchaise pour èsprouvé a vaie les lanternes chinoueses, quand ne v'la not' houmme qu'entre pour nos dithe que Moussie éspéthait qu'j'avaimes passé eune bouonne arlevée, et qu'y'avait un taxi qui nos attendait au bas des d'grés - j'éthaimes justement l'temps d'attrapé la dernié 'bus pour la ville!
Bin que j'n'ayons a ben près rin veu, j'soumes bin contentes tout d'même d'avé 'té invités a chutte belle neuche. Lonore en a lu l'compte sus les gazettes; et j'voudrais qu'ous éthaient veu les p'tits airs qu'ou s'dounni l'aut' jour en disant a sa couosinne Bella Balno: "Nou n'nos vit pon parmi la 'croud,' a pid dans l'Parc. J'avaimes 'té invitées a vaie la cérémonie par ieune des f'nêtres du Châté! Eunne f'nêtre a nos deux toutes seules: et l'taxi s Moussieu pour nos r'porté siez nous!
Morning News 25/9/1913
No comments:
Post a Comment