1948: Les D'vis du Bouan'homme George

 In 1948, Mêrayieu didn't think much of the new constitution, nor of party politics (according to George d'La Forge)

 

Les D'vis du Bouan'homme George

  

            "En pâlant d'femmes pour Députés," Mêrayieu disait l'aut' sé : "Pour tchi dgiâtre qu'i' veulent bouleverser tout dans l's'Etats ? I' veulent met' les Recteurs à la Porte, mais tch'est qui s'en va les rempliaichi ? J'pense bein qu'chest un tas d'gâs d'la ville tchi sont trop pièrcheurs pour travailli et tchi craient qu'ils éthont eune majorité des vouaix dans l's Etats pour passer eune louai pour payi les Membres comme i' font dans les grands pays ! Et ch'est seux tch'i' voudront passer des Louais, étou, pour hauchi les gages et raccourchi l's'heuthes de travâs des bachouards tch'ont voté pour ieux, et renchiéthi la vie acouo pus !"

 

            "Ch'est seux tch'ils appel'lont ch'là du progrés ! Vaithe, ch'est du progrés à l'arbours ! J'n'avons pon bésouain d'tout chu niolîn-là en Jèrri ! Touos ches amateurs de Progrés-là veulent copier l's'Angliais et faithe à craithe ès travailleurs tch'i' peuvent lus donner la leune pour aver lus vouaix dans l's'êlections. I' n'ont pas l'avis d'vaie que si l'Angliétèrre tait aussi bein gouvernée comme j'l'avons té en Jèrri pour des chents ans, touos ches Angliais-là ne s'saient pas à payer des prix fos pour des pliaiches à d'meuther en Jèrri !

 

            "Not' pétit Jèrri soulait êt' la milieuthe pliachi au monde à d'meuther, - i' l'y est p't êt acouo aujourd'anniet, pour chein qu'j'en sai, - mais si ches Apôtres de Progrés-la ont lus volenté, v'là tchi n'duth'tha pas longtemps !"

 

            L'temps passé, nou connaissait la Liberté ! L'y'avait d'tout à mangi, tout plien d'habits et d'bottes et d'souliers à mettre, et nous pouvait l's'acater sans coupons. Nou pouvait aller en France et a d'aut' pays et dêpenser des sou aussi souvent comme nou voulait. Si un homme avait assez d'sou pour acater un Moto, i' tait pèrmîns de l'faithe sèrvi. Le rât n'tait pas fort par quartchi, l'y'avait du travâs pour tout l'monde, pas d'taxe sus l'èrvenu, et un louis valait un louis et nou pouvait acater d'tchi dans les boutiques dans l'heuthe du dîner. Un gas tch'avait l'souain d'sauver ses hèrpîns pouvait acater des rentes sans aver peux de l's'aver remboursées dans tchînze jours par tchique Angliais tch'à acaté la propriété sus tchi qu'i' sont deus ! S't'avais un couochon, i' t'appartenait et tu pouvais l'saler et l'mangi s'tu voulais. Un fermyi n'avait pas à remplyi chînquante papièrs et d'mander permission devant craîtres ses récoltes ou donner eune pînte de lait cailli à san viau !

 

            "Acheteu ches Avocats d'progrés-là nouos dîsent que les vièrs membres d's'Etats tchi taient responsablyes pour toute chutte libèrté et prospéthité-là taient d's achocres, et n'savaient pas tch'est qu'i' faisaient, et tch'i' dév'thaient êt' envyiés lus faithe quatorze, et qu'un tas d'nouvieaux Députés tchi n'connaissent rein des diffitchultées du fermyi et d'la vie des compagnards dev'thaient les rempliachi et changi toutes les louais ! Avous jamais ouï rein d'pus riditchule ?"

 

            "A m'n'idée, Jèrri est bein trop p'tit pour aver des partis dans l's'Etats ! Bailliz-mé des bouans vièrs Recteurs comme Moussieu Pépin et Moussieu Balleine du temps-passé tchi r'présentaient tout l'monde, riches et pauvres fermyièrs et travailleurs, villais et compagnards, et des bouans vièrs Juges tch'avaient passé lus vie dans l'sèrvice du publyic, - et ou' pouvez aver touos vos Députés tch'i'n'peuvent pas pâler l'Jèrriais, sans pâler d'faithe des louais pour des Jèrriais !"

 

            "S'i' veulent des partis dans l's'Etats, deux'trais bouans vièrs Louthièrs de St. Ouen pourraient aller lus montrer comment organiser le Louothi et La Rose, mais jé n'crai mème pas qu'ch'là duth'thait longtemps, car les Louothièrs éthaient bein vite eune majorité !"

 

            George d'La Forge

Les Chroniques de Jersey Lé 17  janvyi, 1948