Tuesday 2 December 2014

J'sis grée pouor Noué

J'sis grée pouor Noué

J'ai toté d's êtentes d'êtînchelle;
sus l'arb', j'ai mîns des veues;
et sus l'copé - eune belle faîtelle.
J'sis grée pouor Noué achteu!

J'ai d's oeux, d'la flieu pouor man podîn,
d's êpices, d'la graisse dé boeu,
d'la p'liche d'orange et des raisîns.
J'sis grée pouor Noué achteu!

J'ai du gris papi pouor patchi
(ch'n'est pon gris mais d'couleu),
des ribans, bliouques et acouo d'tchi.
J'sis grée pouor Noué achteu!

Et pouor mes cartes, j'les ai sinné,
êcrit des souhaits d'bonheu,
épis y'a des tîmbres à cliuter.
J'sis grée pouor Noué achteu!

Ma cauche pendue au pid du liet
s'sa stoffée, j'en sis seux -
et mé étout auprès l'dînner...
J'sis grée pouor Noué achteu!

Eune gâche fouôrrée sus l'ais d'fouoyi
auve eune vèrrée d'litcheu;
Lé vièr Jean Noué veindra les qu'si.
J'sis grée pouor Noué achteu!

No comments: