The Owl went fishing in 1928. It didn't end well:
V'chin la saison que les gens prennent lus "holidays," et v'la tchique temps que je d'mande au Chef de m'laissi aller pour tchinze jours en Sercq ou à Paris ou d'tchique carre par-là.
Mais i' n'y'a pas moyen d'aver permission, s'n extchuse étant que je sommes trop embarrassés à la boutique.
Je crai ettou que Marie Hibou l'encouothage à me r'fuser.
Oulle est devenue diversement avathicieuse à ches dernyi et n'veurt pas seulement me donner douze sous pour aller m'promener.
Ch'tait pour chenna que je n'fus pas ès Courses l'aut'e jour.
J'aithais peu sans doute entrer sus l'terrain sans payi, mais tch'est chenna sert d'aller ès Courses si ch'est qu'nous n'a pas deustrais coppeurs pour mettre sus les gagnants.
Mais j'étais dêterminé de n'pas rester en travas quand touos l's autres étaient à lus diverti, ch'est pourtchi je m'décidi d'aller faithe un viage en mé et aller pêtchi au maquethé.
Sans dithe mot à personne je m'en fut trouver man vier amin le patron Joubeaud et li d'mandi s'il aithait la bonté de m'emmener avec li dans san baté.
I' m'raîponni que rain n'li f'thait pus grand plaisi et i'm'dit de m'trouver sus la cauchie à chinq heuthes le lendemain.
Je réussi à m'faufiler hors de la maison sans rêvillyi Marie Hibou, et ponctuellement à l'heuthe convenue j'étais sus l'bord du slip en d'sous du dêbarcadéthe du Great Western.
Le "Caprice" au Cap'taine Joubeaud était à fliot dans l'mitan d'la cauchie et un autre pêtcheux qu'était le long d'la muthaille dans san canot, se souvenant comment que j'avais quasi 'té nié l'année passée dans l'traie à laver qui sert de canot au sieur Joubeaud, me dit comme chenna, "I n'est pas nécessaithe de prendre des risques, sautez dans man baté et j'm'en vais vos mettre à bord du Caprice."
Chein qui prouve comment que l'Caouain est bain veu par tout l'monde qui fréquentent les cauchies.
Le père Joubeaud nos vit bain v'nin et s'prépathi pour me prendre à bord.
Mais, juste au moment que je grimpais à bord de san baté je failli mouothi d'peux.
Il a un tchan qui s'appelle "Loup-Loup" qui jamais n'tchitte san maître pour une minute et qui va touos les jours à la pêque avec li.
Dès qu'chute bête-là vi la tête du Caouain épier par sus l'bord du baté, i' s'avolit sus mé en ouassant et montrant ses dents comme si i' voulait m'dévorer.
Le Cap'taine Joubeaud erprimandi san tchan et l'fit aller s'couochi, mais j'avais ieu si peux mé que j'trembliais comme une fielle.
Loup-Loup et l'Caouain sont grands amins acheteu car je li donni la maintchi d'une sausiche que j'avais prins de dans l'armouaithe à Marie Hibou. Mais je fus obligi à peu près de m'passer d'dîner pour gâgni l'amiêtchi de ch'tte affreuse bête-là.
Eh bain, opprès aver hissé les vailes, j'êprouvîmes à sorti d'la cauchi et l'Captaine Joubeaud me dit de souogni d'la barre tandis qu'i' fixait les vailes d'avant.
I' m'dit tchiquechose concernant la barre, qu'i' fallait la mettre à babord et ainsi d'suite, mais comme l'Caouain n'est pas matelot et n'sait pas la difféthence entre babord et tribord v'la tchi complitchi la navigation du baté.
Si ch'est qu'i' m'avait dit "Wogue" ou "Bié-da-Ouaie" comme nou fait quand nous est à cachi les ch'vaux, j'y aithais comprins tchiquechose, mais je fit d'man mus, mé, avec le rêsultat que l'vent s'empoutchi dans les vailes et l'baté r'vithi d'bord et je mantchîmes bain d'enfoncer not'e beauprée dans l'ventre du St. Brieuc.
Le père Joubeaud vit bain tout-d'suite qu'i' n'fallait pas compter sus l'Caouain comme navigateur, ou bain qu'i' portait chance de subi tchique avârie, ch'est pourtchi i' m'ordonni de m'assiéthe dans l'fond du baté et de n'touchi à rain.
I' réalisi qu'il 'tait dangereux d'aver patheil pâssagi à san bord.
Et pis che n'tait pas là tout.
Pus tard dans la journée il eut raison d'arriver à la conclusion qu'il aithait fait bain mus de laissi l'Caouain à terre.
Ch'tait quand jé passîmes dans une meule de maquethé et que l'paisson se mins à mordre à tire-larigo.'nais d'en haller un gros qu'avait mordu sus ma ligne mais quand i'vint à bord i' djéthottait si bain que j'avais peux de l'dêhoutchi.
Je laissi tout couorre, et l'malheutheux paisson sauticottait partout l'baté comme un possedé et finit par mêlachi les crins, les croc et les lignes que tout s'trouvi nouachi ensemblye d'une manièthe à n'pus s'y connaître, et i' fallit pus d'une démieuthe au patron à r'dêmêler tout, chein qu'i' n'pu pas faithe sans copper tout avec sa brioche.
Je n'sais pas si notre amin Joubeaud est disposé de r'prendre des passagiers avec li quand il itha au maquethé, mais i' y a une chose qu'est bain certain il est bain dêterminé de ne jamais permettre à un Caouain de s'embertchi à bord de san baté.
Caouain
Les Chroniques de Jersey 4/8/1928
No comments:
Post a Comment