Friday 12 December 2014

1947: George d'La Forge et les ruinnes dé Saint Mâlo - Saint Malo in ruins

Site dé portraits historiques dé Saint Mâlo
En 1947 George d'La Forge vîsitit Saint Mâlo et dêcrivit les r'êffets d'la dgèrre:

In 1947 George F. Le Feuvre visited Saint Malo and described the aftermath of the war:

Les d'vis du Bouan'homme George

Avous té en France dépis la dgèrre? J'm'en allis à Dinard l'aut' jour par avion - vîngt munutes à crouaîsi l'ieau! Lé temps n'tait pas trop bé, mais les nouages n'étaient pas trop bas, et nou viyait eune bouanne distance.

Ch'tait întérêssant d'vaie les ruines dé St. Malo à gauche en appréchant d'Dinard, et pis St. Servan, auve sa belle Tour de Solidor et sa grande égise parouaissiale auve des chauffauds l'tou du haut du cliochi, car i' sont à la r'graie dépis qué l's'Allemands l'avaient endommagie auve lus Artil'lie. Lé ief d'la Tour Solidor fu endommagi etou et l'y'a un gros creux tout au travers. J'passîmes en d'sus d'la belle ville dé Dinard, et nouos v'là beintôt en veue d'la p'tite ville dé Pleurtuit, auve s'n'égise tch'à un cliochi carré - p'têt' que l'haut a té abattu étou.

Mais ch'est la ville de St. Mâlo, qu'en a attrapé! N'y'à qu'à bein prés eune douzaine de maisons d'but. Ch'est pitchablye à vaie. Nous n'créthait jamais qu'eune ville pouvait ête si compliétement dêtruite. Combein d'fais qu'j'avais envisagi chutte vielle ville-là au couothant d's'année que j'tais hors-pays, auve ses rues si êtraites que nou pouvait à peine y passer auve un hernais ou un querre! Et j'avais tréjous envie de r'marchi ches rues-là et r'vaie les p'tites boutiques pliennes de toutes sortes de tchuthiosités d'la Bretagne. En Améthique nou n'vait qu'des rues dans les villes tchi sont larges et bein pavées, et des maisons tchi sont quâsi aussi hautes comme la Tour Eiffel, et toutes les villes sont la même chose, toutes neuves et propres et des boutiques pliennes de tout ch'qué nou-s a besoin dans la vie, et i' veint un temps qu'nou-s a envie d'vaie tchique chose de vyi et d'ancienneté! Mais jamais nou ne r'vèrra l'Saint Malo du temps passé. L's'Allemands y mîntent le feu quand l's Améthitchains c'menchîtent à appréchi, et achteu ch'n'est qu'des ruines auve un tas d'pignons et des chum'mées tchi restent début comme des monûments pour montrer iou qu'les maisons 'taient l'temps passé. Nou peut dithe que chutte ville-là, auve ses muthailles et ses bieaux ramparts tout autou tait un monûment înternational du temps jadis et un examplye magnifique de l'architectuthe de nos anchêtres. Ch'est eune honte ès Allemands d'l'aver dêtruite, - jamais i' n'devthaient ête pardonnés pour aver fait d'ité. Quand j'y pense, v'là tch'i' m'donne envie d'bailli un co'd'pi au driéthe à touos l's'Allemands que j'rencontrethai!

Saint Servan a souffert étou, - ichîn et là, mais pas si piéthe comme Saint Malo, - d'un bieau but. L'y'a un tas d'maisons abattues dans l'vièr quartchi d'la ville le long d'la mé, et quâsi dans toutes les rues nou vait iou qu'les bombes ou les balles de canon ont êcliaté et fait des p'tits creux dans l'mortchi ou chîment ou pierre d'la d'vantuthe des maisons.

Comme ou l'savez sans doute, l'y'a ieu un tas d'Jèrriais et d'Angliais tch'ont d'meuthé à Dinard et à St. Servan, et ch'est întérêssant de s'prom'ner dans les chîmetiéthes et r'garder les noms sus les tombieaux. L'y'à un p'tit chîmetiéthe driéthe l'Hopita du Rosée iou qu'y'a un tombé tch'i dit: "Ici repose le corps de Frédéric, Comte de Chateaubriand, né à Jersey le 11 Novembre 1799." Quand je r'veindrai en Jèrri i' faut qu'je d'mande a m'n'amîn Ralph Mollet si l'y'a un r'cord de chu Chateaubriand-là dans les Bulletîns d'la Sociêté Jèrriaise. Ou' savez bein sans doute qu'y'à un Chateaubriand entèrré sus l'Grand Bey (eune p'tite Ile dans la Grève de St. Malo), étou, mais ch'tî-là avait nom Françouais, et i' fut né en dgiez-sept chent souoxante-huit.

Dans l'chîmetchiéthe du Rosée l'y'à un d'Auvergne d'entèrré étou, et i' pathaît qu'y'en a eune famille dans l's'envithons. Le vièr chîmetiéthe de St. Servan, pas bein liain d'l'Egise parouaîssiale, tchi n'a pas té fait servi pour bein d's'années, a un p'tit couain oprès d'la grand' porte, qu'ch'est touos d's'angliais (et tchiques Jèrriais) entèrrés d'dans. Parmi ches's'là, j'èrmertchi le nom de Charles Horlock de "La Motte House," Jèrri, mort en Dgiex-huit chent chînquante-huit.

Dans l'neu chîmetiéthe, j'vis l'tombé du Révérend Charles Pallot, Evangeliste, d'la Trinn'té, en Jèrri. Ch'est un bieau tombé auve eune haute crouaix en granit, mais il a besouain d'êt' èrgraie, ou l'y'à d'la mouoyiêtuthe dans chutte carre-là du chîmetiéthe et un côté d'la tombe a donné d'chu côté-là, et la crouaix de toute de travèrs achteu.

L'y'à tout pliain d'viande et d'tchi à mangi dans l's'hôtels pour les touristes - mais les gens du pays sont rationnés acouo pièthe qu'en Jèrri, et les femmes lus pliainnent qu'ch'est pas souvent qu'y'à d'la viande siez l'bouochi! Enfin, j'mangis un fichu bouan gobîn d'viande de ch'va hièr, - et v'la tch'avait bouan goût, man bouan'homme!

George d'La Forge
Les Chroniques de Jersey 26/7/1947

No comments: