Les ouaîsieaux dans lé gardîn

Les ouaîsieaux dans lé gardîn
tuitent la nouvelle ès bouais
et la tuit'tie dé l'ouaîth'lîn
nos rempliétha dé jouaie:
la rouoge-gorge et lé bliûtîn
auve toutes les vouaix des bouais.
Chantons pouor louangi Jésû;
dansons car il est né;
mangeons en as-tu en veurs-tu,
car ch'est la bouonne fête dé Noué.

Les pliantes l'avant ès maîsons
sont flieuthies en mèrvelle;
j'y viyons hortes lus saîson
les roses et g'zettes si belles.
Mais tch'est qu'en s'sait la raîson?
La naîssance d'eune mèrvelle!
Chantons pouor louangi Jésû;
dansons car il est né;
mangeons en as-tu en veurs-tu,
car ch'est la bouonne fête dé Noué.

Né v'là ès clios, les brébis
bêent jouaiyeusement en tchoeu.
Les troupieaux sont bein rêjouis
d'ouï pâler d'un Saûveux,
et saûticotent ès côtis
auve un cantique au tchoeu.
Chantons pouor louangi Jésû;
dansons car il est né;
mangeons en as-tu en veurs-tu,
car ch'est la bouonne fête dé Noué.

Et par les banques et fossés,
les moûques à myi bourdonnent,
par un bieau solé d'Hivé
tchi lit et caûffe et donne
dé s'n or à la jouéyauté.
Et l's anges ès cieux bourdonnent.
Chantons pouor louangi Jésû;
dansons car il est né;
mangeons en as-tu en veurs-tu,
car ch'est la bouonne fête dé Noué.

L'année est au pilôsi;
lé monde est sens d'ssus d'ssous;
la vie a 'té toute changie
pouor ieux et vous et nous:
j'éthons l'salut et la vie,
même sans richesses ni sou.
Chantons pouor louangi Jésû;
dansons car il est né;
mangeons en as-tu en veurs-tu,
car ch'est la bouonne fête dé Noué.