Fîn d'année

Eune poésie en Jèrriais par Elie (EJ Luce 1881-1918):

Fîn d'année

Oquoth' une autre annèe
Qu'est à l'agonie!
Nos v'la finis d'la page
Mil neu chent six.
Y'en a yeu d'êcri d'dans
D'bon et d'mauvais;
L'histoèthe pouorra yeu lièthe
D'clié et d'êpais!

J'allons dans deux-treis jours
Touanner l'fliyèt.
Pour qu'menchi la neuve page
Blianche coumme une nèt.
Notre êcrituthe s'sa-t-alle
Pus belle, chutte fais?
Ou j'éthons t-i oquo
Honte de la vaie
Quand à la fin d'l'année
Nou r'gardétha
Coumment qu'j'avons êcrit
Sus chutte page-là?

Mais d'la morale, n'en v'là assez,
J'vos sou'aite m's'amins la Bouanne Année.