Wednesday 31 December 2014

1960: Eune Bouanne Année

Une Bouonne Année
Des souhaits du Portînfé
Au Portînfé,
Saint Ou.

Moussieu l'Editeu,

Ch'est avec grand pliaisi qué j'vos souhaitons, la Merrienne et mé, bouonne santé et toute prospéthité dans la Nouvelle Année. J'mentionne la santé, Moussieu, car si nou n'l'a pas, tout l'restant n'vaut pas grand' chose. Ch'n'est pas les sous tchi rendent un homme heutheux. Heutheusement, sûs chu point-là je n'nos pliaignons pas. Il est vrai qu'la Merrienne a des rhoumatisses dans prèsque touos ses membres, sinon la langue, tchi fonctionne comme d'ordinaithe, et qu'mé j'attrape un têrriblye ma dans l'dos toutes les fais qu'j'êprouve à faithe un coup d'travas, mais, à prendre yun dans l'autre, j'cachons assez bein.

Ch'est drôle assez qué quand veint l'Jour de l'An, i' vos semblye que tous s'en va allé mûs qué dans autchune année précédente, et qué tchique bouonne fortchune vos attend. Quant à mé, j'n'es'sais pas surprînt de r'chevé une lettre yun d'chais jours de m'n onclye Amice, tchi dispathut d'l'Ile i' y a pûs d'chînquante ans. Les gens tch'i' l'connaissaient voudraient dithe tch'u' s'êvadit pour n'être pas mînt en prîson pour avé capuchi sa femme sûs l'haut d'la tête avec un maillot quand i' taient à r'mué les bêtes, dé tchi qu'ou restit idiote pour l'restant d'sa vie, et ch'est p't'être vrai, mais s'il a fait fortchune dans tchique pays et tch'i' n'a pas oublié san n'veu Phlip, je n'voudrais pas li r'prochi une p'tite faute dé i' y a si longtemps. Dans l'entretemps la Merrienne cherche ocquo dans l'galtas, en espéthance dé trouver un contrat tchi la f'tha maîtresse du mangni d'Vînchelez, avec touos les drouaits y appartenant, même le Droit d'Jambage, tchi n'li voudrait pas grand'chose.

Comme chouna, Moussieu, j'vivons en espéthance, et ch'est bein seux qué i' y'en a hardi d'autres comme nous. Mais quand il est tchestchion dé souhaiter une Bouonne Année je n'sommes pas tréjous d'accord. par exemplye, mé, j'voudrais souhaiter une Bouonne Année ès Etats.

"Arrête un mio," ou s'fit hier au sé quand j'voulit qu'menchi. "Tu n'voudras pas, pas chance, vouler chonna ès Députés d'la Ville?"

"Mais, Merrienne," j'li dit, "ch'n'est pas d'si mauvais corps après tout. Tchèsque tu as contre yeux, ma vielle?"

"Chein qu'j'ai contre yeux," ou dit, "ch'est tch'i' sont tréjous contre la campagne, et tch'i' sont trop dêpenseurs. I' y a yun ou deux des Sénateurs étout tch'i' n'valent pas fort mûs. Si j'avions nos vièrs Jurés et nos Recteurs, tout îthait bein mûs. R'garde seulement chutte dèrnié folie, exposée par la "Post". Absolûment nos campagnards né s'accordéthont pas à chu projet de fliantchi douze mille louis à la mé à West Park."

J'li ramémouaithit que la Campagne avait ocquo une mâjorité dans l's Etats.

"Vèthe," ou dit, "je l'sais bein, et ch'est grand dommage qu'i' n'y a pas pûs d'campagnards comme le sien tch'i' n'disait qu' 'Présent' et 'Contre'. I' y en a bein trop tch'ont peux d'chu p'tit mot-là, 'Contre', et par conséquent i' disent 'Pour' et aident à ruiné l'Ile."

"Comme tu voudras, bouonnefemme," j'li dit, "mais au mains nou peut souhaiter une Bouonne Année au Bailli et san Lieutenant et les Jurés-Justiciers."

"Vèthe, assez," ou dit, "car quant ès Jurés-Justiciers, i' n'ont autchun pouvé, et n'peuvent pas faithe grand ma. Mais j'n'approuv'thait du système tch'i' m'empêche de voté comme nou faisait aut'fais. Ch'tait là yunne des pûs grandes bêtises tchi fut faite après la dguèrre. Nous entend un jour qué i' y a une vacance: tchiques jours après la gâzette annonce un candidat, et bétôt le v'là dans sa rouoge robe, et nous, l's êlecteurs de l'Ile, n'ont pas yeu un mot à dithe."

"Ch'est d'tchi qu'nou n'peut pas changi," j'li dit, "mais ach'teu, pour nos Connêtablyes."

"Eh bein," ou dit, "une raide Bouonne Année pour yeux, bein seux, car, à les prendre yun dans l'autre, ch'est d'bouons Jèrriais, tch'i' prennent bouon soin de n'pas hauchi l'rât. I' n'y a qu'à Saint Piêrre, ouèsqu'i' pathaissent avé pûs d'sous qué d'bouon sens, et en Ville, ouèsqu'i' s'en pâsse de pûs d'une sorte, mais dans l's'autres pâraisses i' n'y a pas grand'chose à crititchi."

"I' y a ocquo les fèrmiers en général," j'li dis.

La Merrienne dit tch'i' fallait lûs souhaiter pas seulement une Bouonne Année, mais pas d'maladie dans les patates, pas d'limache dans les bricolis, pas d'brit entre hommes et femmes, sinon par bordée, et enfîn tout ch'qu i' y avait d'miyeu."

"Mais," oulle ajouotit, "tout ch'que j'souhaite ès visiteurs, ch'est l'contraithe. I' nos en veint bein trop, et i' pathait que l'Sénateur Krichefski est à prendre des toniques pour sé faithe seux d'embréchi les nouvelles mathiées comme i' faut. I' pathait qu'à Pâques, Jêrri en s'sa plien."

"Si l'Sieur Krichefski veur de l'aide," je m'fit, "nou pourrait li bailli un coup-d'main."

"J'voudrais t'y vais!" s'fit la bouonnefemme.

Ph'lip
2/1/1960

No comments: