Wednesday 29 July 2015

La P'tite Breune Djougue - Little Brown Jug

Né v'chîn eune vèrsion d'parmi les papièrs à Eileen L'Sueux d'eune chanson tchi nos est mus connue dans eune difféthente vèrsion:

Here's a version found among the papers of Eileen Le Sueur of a song which we know better in a different version:

La P'tite Breune Djougue
Ma femme et mé jé d'meuthaîmes seuls
Dans eune pétite cabinne qu'était a nôtre,
Oulle aimait l'dginne et mé lé rhonme,
Et j'veurs vos dithe, j'avaîmes du fanne.

Ha, ha, ha, té et mé, donne-m'en un autre p'tit gouttîn,
Ha, ha, ha P'tite Breune Djougue, donne-m'en don un p'tit lèrmîn!


Quand dans les clios j'vais en travas,
Jé prends la p'tite dgougue souos man bras,
J'la mets à l'ombre souos un bouais,
Pétite breune djougue, ch'est té et mé!

Ha, ha, ha, té et mé, donne-m'en un autre p'tit gouttîn,
Ha, ha, ha P'tite Breune Djougue, donne-m'en don un p'tit lèrmîn!


Si ma vaque connait d'ité lais
J'la couvréthais en toute belle souaie,
Ou mang'geait qué lé pus bieau fain,
Et toutes les démi'heuthes j'la traithais.

Ha, ha, ha, té et mé, donne-m'en un autre p'tit gouttîn,
Ha, ha, ha P'tite Breune Djougue, donne-m'en don un p'tit lèrmîn!


Eune rose est rouoge, man nez l'est étout,
Les violettes sont bliues, et tu l'es étout,
I' m'sembl'ye dévant qué d'arrêter
J'en prendrais bein un autre gouttîn!

Ha, ha, ha, té et mé, donne-m'en un autre p'tit gouttîn,
Ha, ha, ha P'tite Breune Djougue, donne-m'en don un p'tit lèrmîn!

No comments: