L'Houmme et l'habit

Né v'chîn l'texte d'aniet d'not' auteu du mais, Amelia Perchard:

Here's today's text by our author of the month, Amelia Perchard:

L'Houmme et l'habit

Quand un bouan jour un être humain
Dans tchique coin d'tèrre, au temps jadis,
Eut l'idée dé sé couvri l'corps -
Fûsse compliètement ou en partie -
Il 'tait pus qu'seux à mié-sauvage,
P'têtre auve eune cave pour san d'meuthîn:
Mais s'n action fut l' c'menchement d'eune mode,
D'pis chu jour-là pour tout l'av'nîn.

Pourtchi qu'i' l'fit - n'saithons janmais,
I' s'peut qu'i' 'tait frilieux d'sa sorte;
Et, enn'yé d'aver la chai d'poule,
I' prînt la pieau dé tchique bête morte
Et s'enfliubit d'dans, d'eune manniéthe
À s'protégi contre la fraid :
Né pensant dgéthe qu'auvec lé temps
Où'est qu' s'n idée d'un habit mèn'nait.

Sans l'moindre doute ch'était un houmme
Qui fut l'preunmyi à s'embonn'ter,
Car, qu'houmme est pus chétif qué femme
Est l'opinnion d'autchun docteu;
Et pis, étout, les historiens
Dans touos lus r'cords nos ont môtré,
Qué l'penchant dans l'houmme pour l'habit
Avaû l's années a augmenté.

S'étant êtablyi maître d'mode,
La préchaine chose qu' not' moussieu fit
Ch'tait dé s'mettre à c'mander la femme
Quant à la faichon d'ses habits.
Il parvînt à la persuader
Qu'être à la mode 'tait împortant,
Sé faîsant seux d'en profiter
En ayant souvent du changement.

Tant et si bein qu'au jour d'aniet,
I' n'sait pus sus tchi pid danser;
Ayant rein d'nouvé dé li-même,
Tout ch' qu'i' peut faithe est dé ram'ner
Des modes qué nou-s-a ieu dévant,
Et qu'avaient lus pliaiches dans l'galetas
Auve les habits dé nos anchêtres,
Ou sus l'dos dé tchique êpeûthas.

Où'est qu'est la femme qui veurt sé r'vaie
Auve ses cotelles lé tou d'ses g'viles,
Ou bein même à mié dé la gambe ?
V'là tch'était bein quand oulle 'tait fille
Et qué la vie marchait au pas,
Mais à ch't heu qu'tout va au galop
D'être êcourtée est pus pratique,
Né sait-che qu'à cachi san moto!

Et don, en dgiex-neuf chent septante,
Auve l'houmme mêlé dans ses touônnés
I' n'peut pus dithe, “Ch'est là la mode” ,
Ch'est à la femme dé faithe san chouaix.
Et, dounnée l'opportunité,
Oulle a bein vite coulé les braies,
Et môtré à l'houmme qu'à l'av'nîn,
Ou s'habill'la coumme i' lî pliaît.