Tuesday 3 March 2015

1934: La natuthe est dêhalée - Nature has come out

En 1934, Marie la Pie (Fraînque Le Maistre) fit eune touônnée des clios:

In 1934, Frank Le Maistre, in "Magpie" mode, toured the fields:

Les d'vis d'eune Pie
Ki ri-ki-ki
Ka-ra-ka-ka

Né v'là l'èrnouvé sus nous. La natuthe est dêhalée, les ouaîsieaux chantent. Tout est vèrt et bieau. Qué ch'est bouon d'saver qu'l'êté n'est pas liain!

Mais chein tchi m'a fait réaliser qu'la r'vèrdie 'tait 'chîn ch'tait prîncipalement d'aver entendu chanter y'a tchiques jours, en m'tant ses bêtes déhors dé bouon matîn et pativouothant dans la rosée, l'ex-Chentegni Edmond L'Cornu du Boulivot - "Quand tout rênait à l'espérance, etc." Et pis ch'tait quand i' v'nait au r'frain:- "J'irai re-voir-ma-Nor-man-d-ie," i' m'semblye qué jé l'vai acouo. V'là tchi m'ramémouaithait d'la Faithe dé Lessay. Jé n'sai pon si sa vouaix est eune basse, eune s'gonde ou tchi, mais oulle est si mélodieuse et cliaithe qu'ou vos fait envie. Lé Edmond n'savait pon, j'sis seux, qué j'tais à l'êcouter s'êbraithe d'la maniéthe. J'éthais peu facilement lî rendre compte de ma présence en lî laîssant couorre un "p'tit douze-sou" sus la cahueule ou dans la noque du co, mais jé n'voulais dgéthe disteurber san bonheur pour lé restant du jour!

Toute la s'maine passée j'ai 'té empliyée à faithe eune înspection d'l'île. Lé Chef, dévant s'en aller en vacances, pour être seux qu'j'n'es'sais à rein'faithe tandi qu'il 'tait hors, mé donnit eune sémaine dé travas dans un blo. I' m'dit, "Marie, va dans chaque pâraisse auve tan papi et tan crayon et èrmèrque la condition d'la récolte partout et fait autant d'notes comme tu pouorras et èrveins-t-en sans délai auve tan rapport à seul fîn qué j'piêssons dithe au publyi en général mais spécialement ès cheins tch'y sont întérêssis tchiques patholes dé véthité concèrnant ches fameuses patates tch'ont donné par lé passé et donne et don'nont à l'avenin la r'nommée à l'Île dé Jèrri."

Véthe, tout d'eune haleine. Lé Chef, li, il est à s'proumener mais i' prend bouon soin d'mettre la responsabilité ailleurs dévant s'n aller. J'sai bein qu'j'sis bein payie et tout ch'la, mais en même temps, est-che qu'i' n'éthait pon tout aussi bein dit, "s'i' t'plaît, Marie?" Enfîn, ch'est la not' Chef - un drôle d'homme qué li!

Ma course n'était pon les douze égises - oulle 'tait chent fais pus longue. Et du moment tchi n'fallait pas mantchi autchun betchet et soigni d'aller dans toutes les ruettes, côtis, etc.! Mais pour vos dithe la véthité j'en ai fait autant comme i' m'a plieu, et ieux, à la Chronique, i' sont bein oblyigis d'accepter chein qu'j'lus donne.

Viyons, don. Jé c'menchit par St. Brélade. Dans chutte pâraisse les pus belles patates ch't'année appartcheinnent sans autchun doute au Jean Hamon. Le Clios d'Robîn est tout seu. Un bouon deuxième es'sait Georges L'Rossingno, mais les cheinne au Jean Ch'valyi - d'la m'luque. Crouaisant la Baie d'St. Aubin j'entrit dans St. Hélyi. I' n'y'a pon grand' chose dé rare dans la pâraisse d'la ville à mains qu'ch'n'es'sait iun des betchets au Sieur Baudains du Mont à l'Abbé. A St. Sauveux Emile Pallot, du P'tit Mênage, dans san Clios d'la Forêt a d'tchi bé et à St. Cliément Ph'lippe Billot peut dithe, quand il est dans l'Clios d'Georges, "ch'est à mé l'rouoge riban."

A Grouville lé Ph'lippe Simon du Coin est seux d'eune récolte dans l'Clios du Moulîn, mais autrément a d'tchi bein failli.

Lé Chentegni Journieaux d'St. Martîn peut être bein fyi d'san betchet des Mans. Ses vaisîns, j'pense, sont jaloux d'li à un dégré. "Aussîn," comme i' disent, "tous savent bein tch'i' va à la Fèrme des Etats."

La Fèrme d's Etats à la Trinneté né finnissent qué d'plianter mais j'pense qué ch't'année lé fèrmyi l's a mînses toutes lé -- en haut, respet votre honneu, car ch'est sa dreinne année - i' s'en r'va en France siez sa m'mèe s'èrtither. Les Godgieaux ont la plieume d'la Trinneté et l'Claude rit par toute sa fache. Mais, quand tchi qu'i' n'rit pon?

Dé la Trinneté j'm'en fut à St. Jean tout drait à St. Blaize siez l'Chentegni L'Mathinné, ayant entendu qu'san Gardîn d's Ecalièrs né pouvait être battu. Ch'est vrai. I' faut dithe, dgia, qu'y'a à des bords des taques dé haînu, occasionées, i' crait, par lé galvaudage des cats à san vaisîn au l'vage, dans les travèrs dé févri.

A St. Louothains lé Clios d'Nicolas à Jean Pallot d'Man Pliaisi est dans la liste des preumièrs pour seux. Ses patates avaient 'té gelées mais eune pînchie dé nitrasulphofouaitho a fait la trique! Lecteurs, allez les vaie, auve mes complyiments.

Quant à Ste. Mathie, la p'tite pâraisse, j'n'en fit qu'eune partie (n'împorte pourtchi) mais à chein qu'j'ai oui ch'est l'Clios Rondé à Ph'ilppe Lé Feuvre du Sud tchi prend l'riban. Cèrtainement, ch'n'est qu'des oui-dithes, mais j'n'ai pon d'peine à l'craithe car jé sai qu'ch'est un homme d'întelligence et bouon fèrmyi. Pour ch'la i' tcheint d'san péthe, tch'est r'tithé et tch'a fait un tas d'sou. Mais ch'n'est pon là un Ste. Mathiais qué l'Phi'lippe - il est St. Ouonnais d'originne. Pour des bouons vièrs types dé Ste. Mathie i' faut aller au Pont siez les Lesbithieaux. Y'a d'tchi be dans l'Clios d'la Hèche - mais jé n'sai pas si ch'est des pommes dé tèrre, des aubèrginnes, du kohl rabbi ou des pépèrmén't. Enfîn, tréjous, ch'est d'tchi bé.

V'nu à St. Ouain (tchi grand' pâraisse) j'm'en fut tout drait dans l'fond d'l'Eta et i' m'est împossiblye dé dithe qué j'vit pus bé, pas même dans l'Vau d'la Mathe, qué l'becqueton au Ph'lippe Hubèrt.

Ch'est un spectaclye. A l'exception, cèrtainement, du Jean Vautchi, tch'en a dêjà dêfoui eune vîngtaine dé pèrques dans san côti tchi pend au sud-suêt-seur-vouais. Eune belle récolte, i' pathaît.

J'finnit à St. Pièrre, la pâraisse ouêque, dé nos jours, nous pâle en angliais pour être à la mode. Ch'est l'Député Simon tch'a l'chouaix dans l'Clios d'Haut. Il attribue la bieauté d'sa récolte au fait qué l's avions, volant en d'ssus d'ses tèrres quand i' taient à înspecter là l'tou pour êtablyi eune Station, dé temps en temps ont laîssi couorre d'la bouonne Bouoillie Eclair, du Vèrdet Neutre, du Jeunite, d'la Barousse, du "Niagara Dust" et d'l'Ieau Celeste. Il attend eune récolte dé dgiex-huit cabots - la vrégie!

Né v'là man rapport. Et acheteu qu'man travas est fait j'm'en vais en vacances.

La Pie
5/5/1934

No comments: