Friday 23 January 2015

Chanson du R'nouvé

Né v'chîn l'texte d'aniet d'not' auteu du mais, Elie:

Here's today's text by our author of the month, Elie:

Chanson du R'nouvé
Au Boès

Quand les femmes d'Angliéterre
Ne d'mand'dont pus d'voter,
Et qu'les siennes de Jerry
Ne séthont pus caqter,
Quand l'z'aviers de neuf ans
N'fumthont pus d'cigarettes,
P't'être que nos espéthances
Se trouvthont satisfaites!

Quand autou' du Weighbridge
Nou n'verra pus d'pièrcheux,
Quand nou trêtha les poules
Et qu'les vaques donn'nont d'z'oeux,
Quand les voleurs tchit'tont
A lus tromper d'pouchette,
P't'être que nos espéthances
Se trouvthont satisfaites!

Quand l'z'êcrivains voudront
Faithe des contrats pour rain,
Quand E.B. n'pâl'la pus
D'l'importation du fain,
Quand du bord de l'Etacq
N'yétha pus d'patates faites,
Oh! Nos espéthances - p't'être -
Se trouvthont satisfaites.

Quand aux dîniers annuels
Nou ne f'tha pus d'discours,
Quand l'Juge Vaudin n'verra
Pus d'ivrognes à sa Cour,
Quand les messieurs vivront
Sus d'ieau et d'la galette,
Nos espéthances pourraient
Se trouver satisfaites.

Quand les dames souos lus nez
Craîtront d'êpaisses moustaches,
Quand l'z'ânes obéithont
Tout d'suite au sien qui cache,
Quand les pêtcheurs happ'thont
Des maquéthiaux, sans bètte,
Nos espéthances pouorraient
Pathître être satisfaites!

Quand l'z'hôlouoges et les montres
Dithont toutes le même quart,
Quand les chasseurs prendront
D'z'alouettes pour des canards,
Quand personne ne trouv'tha
A r'dithe sus les Gazettes
Nos espéthances alors
Pouorraient être satisfaites!

En un mot, quand la mé voudra nouos obéi
Et qu'nou tchilla d'z'ouognions dans les branques du péthi,
Quand l'incriyabl'ye enfin se trouvtha accompl'yi
J'pouorrons espéther d'vaie l'pavage en boès fini.

No comments: