Sunday 11 January 2015

Une Rime en "Ant"

Né v'chîn l'texte d'aniet d'not' auteu du mais, Elie:

Here's today's text by our author of the month, Elie:

Une Rime en "Ant"
Certains pâraissiens sont bein enduthants
Car, faut bain l'admettre, y a dêjà longtemps
Que nous lus promins que touôs les passants
Pourraient s'faithe servi, en allant et v'nant
De routes et de qu'mins bain satisfaisants
Les pierres taient qu'mendées, ou p'têtre bein que j'ments,
Dé d'dans la carrièthe de Mess Gallichans,
Et les cantonniers étaient tous si contents
En pensant qu'y avait d'la besogne en allant
Et qu'lus chuvièthes bétôt servithaient, bouannes gens,
A bouler des pierres, pas à s'assiethe dédans!
Et pis les fermiers qui portent tout l'temps
Les lédghumes et l'lait siez touos lus client
Ils aiment bain qu'les routes n'aient pon trop creux d'dans,
Et n'faut pas s'ravir si ch'est qui riaient blianc
Quand i sudrent qu'les qu'mins taient en amendant.
Et les pouorres bicyclistes, qui s'en vont boulant
Lus machines le long des qu'mins trop drissants
I soupithaient d'joie, ch'est vrai, pouorres médghans
En s'disant; Bétôt j'pouorrons ridé tout l'temps
Sans crainte de skiddé et d'nos n'aller l'nez d'vant
Ch'est là chein qu'j'appelle dé tchi qu'est fichant!
Et les dames et d'moieselles qui s'n'allaient r'troussant
Dans l'pité lus robes et lus cotillons bliancs
Ah s'il taient contentes, rein qu'en y pensant,
Car ou s'avez qu'ch'est bain embarrassant
Dé r'léver sa robe quand nou s'en va marchant
Et qu'nou tchein bon tchic chose, même si n'tait pas p'sant
Dans yunne de ses mains tandis qu'l'autre tu comprends
Dé s'trouver dans l'bras d'un joli galant!
Enfin tout l'monde, vaithe même jusque ès tchans,
Etaient unanimes pour approuver l'plian
De graie bain les routes, en les rondissant,
Ov lé Steam Roller qui dé d'pis tchic temps,
Faute de travas à faithe, à joint les féniants!
I n'est pas oquo v'nu, ch'est assez enniant,
Mais n'perdez pon tcheu, p'têtre qu'il est en v'nant!

No comments: