1963: La Merrienne pôse des tchestchions

 La Merrienne pôse des tchestchions

 

à Portinfé, Saint Ou.

Vendrédi au sé.

 

Moussieu l'Editeu,

 

I' s'en pâsse de pûs d'une sorte en Jèrri chais jours, mais rein d'si drôle comme la nouvelle qu'à Saint Louothains une femme s'en va contestée l'êlection pour Députés.

 

J'n'ai pas l'pliaîsi d'la connaître, ni la Merrienne ni-n'tout, mais, comme ou l'savez, Saint Louothains a tréjous 'té sa favorite pâraisse, et ou voudrait pôser tchiques tchestchions à chutte femme tch'a yeu l'couothage de s'mettre sûs les rangs. Hièr au sé, ou m'en donnit une liste.

 

"J'sais bein que j'n'ai pas d'vouaix là," ou qu'menchi, "mais j'voudrais saver s'oulle est en faveur d'aboli la litcheu et s'oulle est en faveur d'grandes fanmilles - ch'est-à-dithe de djix ou douze mousses au mains." Et ichîn, Moussieu, i' faut que j'vos diche que la méd'cine tchi s'n'allait nos donner une nouvelle fanmille et de tchi j'vos avais pâslé la s'maine pâssée, est arrivée et qu'la Merrienne en a dêjà avalé une demié boutelle, mais comme je r'fûse d'y touchi, je n'peux pas vaie qu'oulle étha grand êffet.

 

Continuant avec les tchestchions qu'ou voudrait pôser à chutte femme, ou voudrait li d'mander s'oulle est en faveur du mathiage comme il est célébré agniet, ou s'ou criyait qu'un couplye dév'thaient être permînt des vacances, ch'est-à-dithe que l'homme pouôrrait, une fais par an, s'en aller en Djernézi avec une hardelle, tandis qu'sa femme se trouv'thait avec un autre homme en Sercq. Mé, Moussieu, j'ai 'té pour tchique arrangement d'la sorte pouor bein d's années, mais jamais j'n'ai ôsé en pâsler à la Merrienne, car j'ai tréjous yeu peux de chein tchi m'arriv'thait.

 

À ch'teu', Moussieu, pour les êlections tchi sont ocquo à v'nîn. En ville y'a des candidats dans touos les trais districts, et y'a tant d'êlecteurs tchi n'sont pas întérêssis qu'autchune chose pouôrrait s'arriver. À Saint Pierre, le Sieur Egré est ocquo le favori des deux candidats, mais nou m'dit que l'Sieur Thomas est à faithe des vouaix partout la pâraisse. La Missis Green ne pathaît pas s'gêner en changeant d'pâraisse et pathaît craithe qu'oulle étha l'support d'assez d'êlecteurs pour li donner une siège.

 

Tchi tragédie ès Etats-Unis! Le fait est qu'i' n'sont pas une nâtion, mais un mêlange de touos les peuples du monde, et tout ch'qu'i' faut pour assâssiner un Président ch'est un homme tchi n'est pas bein dans sa tête, une arme ou un pistolet et ch'est tout. Quant à mé, j'aime bein mus être Ph'lip de Portînfé, tchi n'a à ch'teu' autchune ambition sinon de d'meuther un mio puûs près d'l'aubèrge et d'aver d'bouons amîns à m'transporter ichîn et là, quand j'voudrais sorti.

 

À bétôt,

Ph'lip

 

Evening Post 26/11/1963