1935: Les Minséthes d'un Fermi.

 Les Minséthes d'un Fermi.

 

Maît'e Ferdinand Halledoque est dans un êtat d'esprit des pus mélancoliques.

Dépis chinquante ans qu'il est fermi, jamais i' n'avait trouvé le sort du tchultivateur pus péniblye qu'i' n'est au jour d'annièt.

 

Laissons le raconter sa triste histouaithe li-même. V'chin tch'est qu'i' dit.

 

“Quand je tchitti l'êcole à l'âge de quatorze ans, je resti sus la ferme à aidgi à man bouonhomme de péthe, qu'était, sans contredit iun des miyeurs labouotheurs de l'île.

 

Ch'tait un homme qu'avait du goût pour san travas et qui n'pouvait pas enduther à aver des boletaithes alentou d'il.

 

Il 'tait tchiquefais un mio sévéthe et malheur ès siens qui n'faisaient pas lus travas à s'n idée.

 

Ayant 'té êlevé dans ches conditions-là et comme j'ai en outre, héthité tchiqu'uns des traits de san caractéthe, je peux dithe, sans m'vanter que je sais bain tch'est qu'ch'est que d'condithe une ferme.

 

Et jusqu'à ches derniethes années ilo, ch'a 'té un plaisi.

 

Nou condisait san commerce à sa dgise, nou craîssait ses récoltes comme nou voulait et nou les vendait du mus qu'nou pouvait et quand nou voulait sans que personne eusse le drouait de v'nin s'mêler dans vos affaithes.

 

Si nou vendait une géniche ou un lard, la transaction ne concernait que le vendeux et l'acateux et la livraison de la marchandise s'en suivait, sans l'intervention d'une armée de fonctionnaithes salariés, des experts, vétérinaithes, inspecteurs et je n'sais combain d'autres gens de profêssion.

 

Mais acheteu? Nou n'peut pus y vivre, gâdemmin! Nou n'est pus maître siez sé!

 

Nou n'peut pas vendre une malheutheuse bête-à-cornes, pas même à san vaisin, sans en informer les autorités pour qu'ils envie un vétérinaithe à la “tester” afin d'éviter le dangi qu'oulle empouaîsonne tout l'restant des bêtes de l'île.

 

Le temps passé, si j'voulais tuer un lard ou deux pour la maison ou pour vendre à man bouochi, je termais le tueux d'couochons et au jour fixé, nou bouollyait l'iau dans l'coppeur et toute l'opethation se faisait à la maison, nou portait les lards que nou vendait, les faithe péser ès paids-du-Rouai et de là à la boutique. Les clients du bouochi qui mangeaient chu lard-là n'en mouthaient pas.

 

Mais ch n'est pas d'même acheteu.

 

I' faut porter tout à l'Abbatoir pour être tués, et être ensuite examinés par un docteu afin de garanti que la maintchi d'notre population ne meuthe pas d'la fièvre ou du jaunisse.

 

Si j'veurs êrigi un bâtisse sus ma propriêté, criyous que je peux le faithe comme bouan m'semblye et selon mes plians?

 

Nennin par exemple! Pas du tout! I' faut la permission de “qui de droit,” et qu'un architecte vainne examiner la pliaiche et m'imposer ses conditions.

 

En v'là d'la liberté!

 

Et pis, che n'est pas oquo tout.

 

Ergardez tchi traîn qu'i' y a ieu toutes ches années ilo par rapport ès Inspecteurs sus l'Weighbridge et sus les cauchies.

 

I n'y avait rain d'chenna la temps passé. Quand nou portait sa cherge d'patates oulle 'tait examinée par les marchands et oulle 'tait acatée par le sien à tchi qu'ou convenait et qui vos donnait le pus haut prix. Nou craithait que che dévethait être de même acheteu.

 

Mais nouffait pourtant!

 

I' vaint deustrais Inspecteurs senti dans votre marchandise et malgré qu'ou sait parfaitement au goût du marchand qui veurt l'acater i' faut que Moussieu l'Inspecteur la trouve convenablye devant que nou piaîsse la vendre. Chenna ne m'êtonne pas que les fermiers se r'binfrent contre un patheil êtat d'choses.

 

Ah! si man pouore péthe vivait au temps qu'il est, i' n'faudrait pas qu'il îthait sus l'Weighbridge, car un homme de san tempéthamment n'aithait jamais peu enduther qu'autchun individu à part des marchands vinsse crititchi sa marchandise.

 

Et si par malheur qu'un expert dans la science avait 'té dans ses clios ergarder pour de la maladie et li avait d'fendu de dêfoui devant qu'i' li eusse donné permission, eh bein, i' m'semblye qu'il aithait fallu l'ambulance pour porter l'expert à l'hopita.

 

Quant ès tomates, Dieu merci je n'en crais pas mais si ch'est qu'nou peut craithe touos les oui-dithes, les pouores fermiers qu'en font ne savent pus à tchi s'en t'nin. I' pathaît qu'i' y a des conditions et des restrictions à n'en pus fini.

 

I' faut que l'fruit d'une certaine grosseur sait patchi dans du papi d'une certaine couleur, ou bain i' n'est pas accepté. Les uns les paquent trop rouoges, d'autres trop vertes. I' y en a de trop grosses et d'autres trop p'tites, enfin, la position est que l'exportateur ne sait pas sus tchi pid danser.

 

Si l'fermi est d'même condamné à condithe san commerce souos tutelle, je vos d'mande mé, tch'est qu' j'allons dévenin?

 

Quant à mé, chein qui me r'console un mio, ch'est que j'ai vêtchu man temps dévant l'introduction de touos ches dêveloppements là mais, à mains qu'i' n'y ait du changement je sympathise avec le jeune fermi qui n'fait que de c'menchi, car je n'sais pas comment qu'i' pouorra arriver à faithe honneur à ses affaithes et payi vingt chelins à la livre sterling.

 

Caouain