La Batâle dé Flieurs - Battle of Flowers

Bouonne Batâle!

La Batâle dé Flieurs

Auprès l'Otchupâtion, pour célébrer la fête d'la Grande Brétangne en mil neu chents chînquante-tch'ieune, la Batâle èrquémenchit, mais chutte fais sus l'Av'nue Victoria, dé West Park jusqu'à La Preunmié Tour et y continnue jusqu'au jour d'aniet.

D'abord, les exhibits 'taient flieuthies ov des palmes, et souvent les palmes tch'avaient fait pliaîsi ès pâssants lé long du Mathais à St. Ouën lé jour dé d'vant lus r'donnaient pliaîsi lé lend'main dans la pathade.

Peste! yeux et lus bataille!!

Enfin à l'apprèche de trais heuthes, ne v'la la procession. D'abord des p'tites carosses ov des mousses dédans. Je m'disais qu'lus pathents d'vaient être bain moyennés ou bain bêtes pour dêpenser tant d'sous sus d'z'avers à tchi ch'la n'pouvait pon profiter.

Et pis ch'fut des machines. Nou m'dit que v'la tchi peut valer jusqu'à douze ou treize louis la pliéche. Ch'est chi pour un coupl'ye d'rouelles et un mio d'féthaille.

Et pis les querres... Ma fé! y'en avait de biaux. Y'en avait qué l'monde les applaudissaient longtemps d'vant qui vinssent à nous, aussitôt qui viyaient tch'est qu'était d'dans. J'vi un tas d'monde qu'avaient les yeux sus les hardelles et pas sus les flieurs. A vrai dithe l'querre à Filo 'tait un des biaux, pas l'pus bé p'têtre, mais j'plumpi pour li quand même quand ch'fut man tout à voter. Et coumme y'avait deux papiers de vote dans man livre, j'les donni touos les deux. Y'avait un p'tit moussieu à côté d'mé qui m'avait l'air de vouler bain aver y'un d'ches billets-là.

Élie à la Bataille

Touos les pais-flieurs et les fioûcheux
Vos décoraient-i' bein les reux!
Et les gérémienn's sus l's'ess'lets
Oh que ch'tait là de bieaux touffets!
Mais chein qui m'êtonnait bein pus
Ch'tait d'vaie autant d'commun lièrrus
Et un tas d'bruyèthe êpannie
Et d'la feûgièthe et d'l'entaill'yie
Des chents et chent tcherdons d'falaize. -
- Assis là d'sus est-n'on à s'n'aise?
Ch'èst ravissant qu'les flieurs sauvages
Aient arrangi si bein l's'att'lages.
J'en 'tais ravi, j'n'en r'venais pon:
Jusqu'à la sèrcl'ye qu'a du bon!

How Mister Pain saw the Battle

Ch'fut not' vethuthe qui gagnyi le Prix d'Hounneu, coumme ou savez. A bon d'gens craient que j'sis quazi d'avis mé mème. R'mertchites-ous coumme je t'nais mes gambes raides endrét mé? coumme man fouet 'tait stiff dans ma main? et tchi bieau clioque j'avais sus l's'espaules? J'taimes seux d'avé un prix!

Quand la Bataille fut finie et nous rentrés a l'èstabye tout l'monde descendit d'san mus et nou but tchiq' verrées d'litcheu pour se rescauffé.

Ph'lip va à la Bataille

Eh bein, Moussieu, j'fut là pour quatre mortelles d'heuthes, car une fais assis nou n'pouvait pas bouogi. Une grôsse femme à ma drouaite tch'y suait comme un boeu, et d'l'autre côté une maigre hardelle tchy m'fichait des coups d'coude dans les côtes une vingtaine de fais par minute.

Avec chonna, y faut dithe que l'spéctaclye tait hardi biau. Jamais j'n'éthais creu que chonna pouvait s'faithe en Jêrri. La grôsse femme et la maigre hardelle taient en extâse et des touos les côtés ch'tait d's'applaudissements et des hourras. Ah vèthe, y faut adméttre, Moussieu que ch'tait mérveilleux, mais quand vint un temps, j'éthais donné tchiquechose pour pouvé dêshallé pour tchiques minutes, si y'avait yeu moyen. Je crais, Moussie qu'ou comprendrez chein que j'veur dithe.

Suggestions

J'savons tous bein qu'en Jerri,
Ch't'année,
Une grand' Bastaude de Flieurs
Est fixée
Pour le mais d'Août tchi veint - je pense qué ch'est l'dghès-huit
- Ch'est quasi dans treis s'maines, mon doux qu'ch'là veindra vite.

Tulipes ou tourné-oualipes?

Par exempl'ye, lé 26 d'Août 1907 la Batâle des Flieurs en Jèrri fut distchutée dans la Chambre des C'meunes. Messire Herbert Nield, lé Député d'Ealing, d'mandit au S'grétaithe pouor l's Affaithes dé Siez Ieux entouor iun d'ses êlecteurs d'Ealing, un Moussieu Cecil Douglas, tch'avait 'té blioutchi par l'Juge Vaudîn pouor aver deslotchi l'chapé d'un offici atout un pangni (ofûche eune pann'lée d'flieurs?) duthant la Batâle dé chu mais-là en Jèrri.

Lé Succès

Notre hardelle voulait s'exhibité eunne fais dans sa vie,
Et ou'l avait biaux en pâslé, nou n'y prenait pas d'avis;
Eun jour ou s'en vint en dansant et en chantant:
Je m'en vais m'exhibité, le sav'ous, mes bouannes gens,
Je trouv'thait du monde à v'né avec mé,
Et j'nos z'n'allons à la bataille dans eun tralli et un baté.