Les Mîntchiers

Mèrcie bein des fais à The Observatory pouor aver châré chu bieau vidgo!

Les Mîntchiers = Les Minquiers

• Les Mîntchièrs: rock names

Es Minquiers

Les législateurs ithont Mardi,
Es Minquiers - Hourrah!
Pêtchi d's'ormers et du horfi
Es Minquiers - Hourrah!
I hal'lont lus bottes et tremp'thont lus pis
Es Minquiers - Hourrah!
Et r'veindront pus sages et bein pus mouoillès.
Des Minquiers - Hourrah!

A Disastrous Fishing Expedition

No v'la, toutes velles déhort, filant sept noeuds, vent d'quartchi. La mathée aidjant, et après avé lovié, couothu 'full-and-by,' et au pus-près, d'viers deux heuthes de temps, nos v'la ès Mintchès. En attendant qu'la mathée baisisse, j'ancrimes souos l'lis d'la Tête Perchie, et nou s'mint a mangi pour sauvé du temps. Bétot, l'pilote dis qu'il 'tait d'en faithe. Nou s'mint tous au djindas, et quand l'ancre fut rappée, nou lovyi dans la Longue Allée, nou touoni a gauches d'la Pierre a Feu, nou s'enfilli dans l'Canné Pipo - et nos v'la sus l'Parc. Y'avait un rotchi sus tchi qu'il 'tait èscrit: Pêche Résérvée. Defense de Chasse, By Order. “La! s'fit l'pilote, nos y vlo! A mathée basse, y'en étha pour touos les Vautiers.” Et d'fait! Jommais d'ma vie n'avais veu tant d'ormers! Les rotchers en 'taient couerts d'sus et d'sous: nou n'pouait marchi nulle part sans pilé d'sus, et dans l'herbi y'en avait des régiments qui vos grimpaient amont les gambes coumme des colimachons. Et gros! J'en vimes yun qui nos éthait falu eunne chiviethe a bras pour le porté au baté. J'en tuimes yun a coups d'bigorne, et j'portimes l'escale a bord entre très: Elie Bilo dit qui la voulait pour couvri un 'shed' souos tchi met' sa van a l'abri d'sous.

Ph'lip doesn't care about the Minquiers

Ah chêsque la Merrienne n'tait pas contente l'autre matin quand ou liut dans votre gâzette que y'avait tchestchon de donné les Mintchiers à ches Français-là.

Ou n'pâsle que d'chonna ches jours et même ou m'rêvillye dans le mitan d'la niet pour me dithe tchiquechose de nouvé tchi y'est v'nu à l'idée.

A l'êcouté n'y'a qu'eune chose à faithe et ch'est d'envié eune bouonne compagnie d'Saint Ouennais ès Mintchiers pour les d'fendre.

Quant à mé je n'prends pas l'affaithe si sérieusement, car, à c'menchi je n'craithai jamais que l'gouvernement nos jouothait chutte salle farce là, épis, pour dithe vrai je n'sis pas aussi intérêssi comme j'éthais tait aut'fais viyant qu'je a'sis pas d'âge ach'teu pour allé à la pêque des ormers.

La dernié fais qu'j'y fut, tchiques années d'vant la djêrre, j'en attrapit plien mes braies et quand j'm r'trouvit sain et sauf à terre je juthit que jamais d'autre j'ithais ristchi ma vie et enduthé tant d'minséthe sus ches fichus rotchiers pour tchiques minséthablyes ormers.