Eune Election dans l’mais juin 1975

 Eune Election dans l’mais juin 1975

Missis Crespin Dulcie Jones

Mouss. Granville Les Le Ruez

Missis d'Avoine Audrey Lucas

Mouss. de Caen Michael Lucas

Missis Abbot Val Amy

Missis Rondé Eileen Le Sueur

(Missis Crespin et Mouss. Granville r'présentent les deux candidats tchi prennent pour chentnyi (i' portent les couleurs de lus candidats).
Missis Crespin:	J'en cre pas que j'allons vais grand monde d'autre. Le v'la presque sept heuthes et d'mie et i' n'est pon v'nu autant d' monde comme j'espéthîmes pour voter.
Mouss. Granville:	V'la tchi n'm'êtonne pas quand nous a des femmes a prendre pour candidats. A-t-ou jamais oui d'eune femme comme chentnyi? I's'saient bein mus siez ieux à souogni de lus hommes et de lus avièrs.
Missis Crespin:	Jamais tu'n chang'geas té. T’oublies tchi faut marchi auve le temps et que 1975 et l'annee pour les femmes.
Missis Granville:	Ch'est chute fichus Missis Margaret Thatcher tch'a chulbuté l's'affaithes, auve s'n ambition de dè'v'nin la premié femme à être le Premié Ministre de l'Anglieterre. J'admets bein que les femmes peuvent remplyi tchiques postes mais certainement pas la poste de chentnyi.
Missis Crespin:	Et pourtchi pas la poste de chentnyi?
Mouss. Granville:	T'oublies don que Jèrri est infestée de voyous, de vauriens de vagabonds et même de criminels. J'té d'mande comment qu'eune femme pourrait entreprendre à ramasser d'itêt?
Missis Crispin:	Ch'n'est pas la forche physique tchi jus faut, ch'est l'intelligence tchi compte. Je't garantis que ma candidate Mlle Dupont a te à ches classes la pour le Judo et ou vos tchulbuttai autchun homme et ou vos l'êtravelllai d'vant tch' il sethait.
M. Granville:	Je n'approve pas mé des femmes à faithe d'itêt - y'devthais ave honte.
Missis Crispin:	Tais-té. J'cre ne v'chin tchiqu'un qui vènnent pour voter.
M. Granville:	Oh bein, il est betôt temps, (èrgardant à sa montre), car l'heuthe avanche.
(Eune personne arrive, en hampionnant et l'vant san bâton).
Missis d'Avoine:	Bonsouair bouannes gens.
Missis Crispin:	Salut Missis d'Avoine, j'espèthe qu'ous allez m'faithe le pliaisi de voter pour ma candidate, Mlle Dupont.
Missis d'Avoine:	Ch'est-i eune femme tchi prend? Ch'n'est dame pas me tchi s'en va voter pour autchune hardelle.
Missis Crispin:	Mais ma pouorre Missis, je vos asseuthe que ma candidate est pus capablye que bein d's hommes.
M. Granville:	Je vos félicite sus vos principes et j'sis bein aise qu'ous allez voter pour man candidat, le Sieur Albert Mouton.
Miasis d'Avoine:	En v'la assez de vos opinions. Ch'n'est pas vous ni d'autres tchi s'en vont m'dithe pourtchi voter. J’en vos ai pas promins d'itet: j'vote au scrutin me (et en disant chenna ou s'en va a la tablye).
Mouss. de Caen:	Savous vot' numétho madame?
Missis d'Avoine:	Man numétho, tchi numétho? j'n'ai pas de telephone mé.
Mouss. de Caen:	Mais vot' numétho pour voter - Dites me, tch'est qu'est vot nom?
Missis d'Avoine:	Mais j'sis Emmeline d'Avoine.
Mouss. de Caen (cherchant dane l'livre de Rat):	D'Avoine - attendez don eune minute. Mais je'n vais pon d'Avoine ichin. Avous enregestré pour Voter?
Missis d'Avoine: (mârrie):	Enregistré - ch'est qu'chonna?
Mouss.de Caen:	Si ous n'avez pon remplyi la forme que l'Connêtablye vos envyi au c'menchement d'l’'année j'ai r'gret, mais ous n'avez pon l'drouait de vouaix.
Missis d'Avoine:	Tchi sorte d'gniolin tch'est chennechin. Tout l' jour sus la television et radio i' nos ont dit tchi fallait aller voter sans manque et quand j'arrive ichin auprès aver prins bein d'la peine ou'mdites que je'n peux pas voter (en gédon). J'm'en vais en vaie pus long et aller siez m'n homme d'affaithe.
Mouss. de Caen:	J'ai grand r'gret Missis d'Avoine, mais ch'n'est pas mé tchi fait les règlyes.
Miss d'Avoine (futheuse et gronmachant a san tout seu - passe devant Missis Crispin et Mouss. Granville tchi li disent a d'main).
Mouss. Granville:	Merci bein des fais Missis d'Avoine pour aver prins la peine a v'nin voter.
Missis d'Avoine (à tu-tête):	J'ai perdu man temps à v'nin ichin car j'nai pas te allouée dé voter. (ou sort en tappant du baton).
(Eune danme entre, le nez en l'air)
Missis Crispin et Mouss. Granville:	Bonsouair Madame. (Oulle n'les repond pas).
M. Granville:	Tchi jamais est chute femme -la? Crais tu qu'oulle a le drouait d'vouaix?
M. de Caen:	Savous vot' numétho madame?
Missis Abbot:	Certainement, je sis numétho iun.
M. de Caen:	Numetho jun - Ah ous êtes la femme de not' nouveau paster le Rev. Abbot.
Missis Abbot:	Vêthe, mais je sis aussi, jerriaise comme touos vous. Je sis eune d'Auvergne, eune familye bein èrconnue et bein disting'gie dans l'histouethe de Jerri.
M. de Caen:	Ne'v'chin vot' papi. Vos pliait-i aller voter?
Missis Crespin (s'êbaillyant)	tchi l'heuthe tch'il est don?
M. Granville:	Il est à peine vingt minutes de huit, et j'allons bétòt pouver nos aller siez nous.
(Eune bouonnefemme tchi ouait-haut entre - oulle a l'air perdue - oulle est chèrgie de patchets et porte un grand parapluie), Ou dit: bonsouair es deux auprès d'la porte.
Missis Rondé:	Dites mé, esche ichin que nou veint pour voter?
M. Granville:	Oui, oui madame ous êtes à la bouonne pièche.
Missis Ronde:	Esche vous tch'avez les papièrs pour voter?
Missis Crespin:	Nannin madanme (en pointant), allez à chute tablye-la.
Miss Ronde: (toute essouffliee):	Ah la - je sis a but d'haleine auprès aver grimpé tous ches d'grès. Je vos asseuthe que ch'n'est pas souvent que j'veins par ichin. Mais man p'tit fis m'a dit si tu n'vais pas voter si j'yais voter ch'est seux qu'le mauvais candidat es'sa ertouonné.
M. de Caen (èrgardant sa montre):	Eh bein it est quasi a la draine minute mais enfin si les gens faisaient lus drouait tous vendraient voter. Tch'est qu'est vot! nom madame?
Missis Rondé:	Ch'est drole qu'ous me d'mandez chonna. Man nom soulait être Charlotte Le Blancq jusqu'en tchi que j'mathyi Jean Le Blond, mais comme ous savez, j'êplais man nom de fille BLANCQ et le sien de m'n homme BLOND. Ch'est drôle chonna hein!
M. de Caen:	Vêthe bein drôle madame - et ous d'meuthez à la Rouoge Rue?
Missis Rondé;	Vêthe d'ja, ne v'la passant 30 ans que j'sis là et j'éspethe d'y mouothi étou.
M. de Caen: (ergardant l'heure):	Le Blancq, Le Blond, mais j'ai grand r'gret madame je'n trouve pon de Le Blancq ni de Le Blond dans chu canton ichin.
Missis Ronde:	Ah mais l'n'ya pas à s'en ravis. J'perdis Jean Le Blond y patchit ses telles y'a 25 ans.
M. de Caen: (perdant patience):	Mais vraiment madame, vot' nom es'sai ichin dans l'livre de rât si ch'est qu'ous aviètes lé drouait de vouaix.
Missis Rondé:	Oh mais j'oublie que j'en sis pas Missis Le Blond a'ch't'heu car j'mathyie l'Ertu Rondé en deuxième neuche, mais l'pouorre balloque né duthit pon longtemps, il 'tait maladif suffrant d'la consumption, et attrapit eune enflammation d'poumons et s'en fut comme eune chandelle.
M. de Caen:	Oh chut pouorre corps, tchi tristesse pour vous.
Missis Rondé:	Et savous bein que ma fichue d'soeu a l'affront de m' dithe que mes deux hommes sont bein pus heutheux ouècque i'sont car on prétend que je les ai negligis duthant lus vie. Ch'est la jalousie tchi la tcheint la garce car ou' n'a jamais mathié et mé j'ai mathié deux fais et j'sis accouo toute prête à me r'mathier eune traisieme si je sis d'mandée.
M. de Caen:	Ah don. Ous êtes Missis Rondé et v'chin vot' numetho 260. Allez à chute tablye lá et registrez vot' vouaix.
Missis Ronde:	Merci bein des fais, ous êtes bein charmant (s'en allant à la tablye), (ergardant san papi) Faut-i mettre oui à coté du nom de man candidat?
M. de Caen:	Nannin Missis Ronde, ou' n'avez qu'a mettre eune crouaix.
Missis Rondé:	Mais êtes-ous seux - quand j'tais mousse et qu' j'allais à l'école la maitresse me me m'ttait tréjous des crouaix quand j'faisais des bètises et que mes caltchules n'taient pas bein faits. Je 'n voudrais pas en faithe aubant a man candidat, car j'l'estime bein.
M. de Caen (a but d'patienche):	Allons missis, assez de vot' gniblin, m'ttez vot' crouaix et pis piechis vot' papi dans la boúete tch'est la d'vant vous.
Missis Rondé (en touannant l'papi de haut en bas)	je'n peux pas vaie sans mes lunettes.
M. de Caen:	Exchusez-mé d'vos l' dithe, Missis Rondé, ous avez vos lunettes sus vot' nez.
Missis Rondé:	Grand doux d'la vie, ch'n'est pas les mennes, j'ai gaffé les siennes à ma soeu par mêprinse, et j'pathies qu'ou s'en va affoler, car ou'n n'vait pas la main l'avant a lyi sans.
M. de Caen:	Les candidats sont: - Mlle Dupont et M. Albert Mouton.
Missis Rondé:	Que tchi! des mad'mouaiselles Dupont et l'autre un Albert Mouton!! Ch'n'est pas des noms Jèrriais chenna, mais enfin ches'sa eun change de tous les Merquands la que j'avons dans l'etats.
M. de Caen:	Mais vos pliait-i vos decider de voter et ne me d'mandez pas d'autres tchestions - j'allons freumer la bouete dans deux-trais minutes.
Missis Rondé:	Ne vos excitez pas coumme cherina Le tchoeu s'en va vos arrêté d'batte - je'n m'ênnerve pas comme chenna me (ou plie le papi et l'fouorre dans sa bourse et en s’allant à la tablye ramasse san parapluieyi et son panyi et par accident envie touos les papers à M.Caen).
M. de Caen:	Missis Rondé, ous avez oublié de mettre vot’ papi dans le bouêtte.
Missis Rondé:	Et bein j'ai change d'idées, je’n sis pas en faveur d’aver des femmes dans la police et j'en tcheins pas au nom d’Albert Mouton comme Chentnyi. (A chut moment l’holouoge sonne 8 heuthe et M. de Caen va a la bouêtte et l’ridgeau freume).