It's Old Christmas Day! Merry Christmas!
Lé Vièr Noué
Né v'chîn l'Vièr Noué, né v'chîn l'Vièr Noué,
et les présents sont mié-oubliés.
L'année est justément lanchie.
L'an r'est nouvé - not' Noué r'est vyi.
Né v'chîn l'Vièr Noué, né v'chîn l'Vièr Noué.
Les bouôns fricots ont 'té bâfrés.
Lé ventre est b'sant mais l'tchoeu ligi.
L'an r'est nouvé - not' Noué r'est vyi.
Né v'chîn l'Vièr Noué, né v'chîn l'Vièr Noué.
Né v'là l'mais d'Dézembre bein pâssé;
j'fêtons acouo au mais d'Janvyi.
L'an r'est nouvé - not' Noué r'est vyi.
Né v'chîn l'Vièr Noué, né v'chîn l'Vièr Noué:
not' deuxième fête d'un long Hivé.
Nos feurs lithent rouoges, les sièrs sont gris.
L'an r'est nouvé - not' Noué r'est vyi.
No comments:
Post a Comment