Saturday 16 September 2017

1905: Choses et autres

Eune articl'ye dé 1905 par Philippe Le Sueur Mourant:

Philippe Le Sueur Mourant discussed budgetary matters, teachers' pay, and the question of Francis Jeune's title of Baron Saint Hélier (with the accent he insisted on):

Choses et autres

"Touos es Commités s'èsquentent, a ch'qué nos dit la gâzette, a d'mandé bieaucoup pus d'sous qu'l'année passée. A tchi jantre qui pensent? s'fait man vaisin 'Douard Le Sauteux. Ch'est ès siens qui dèspens'ont l'pus, achtheu', patholle d'hounneu! Sont y touos fos?"

Ch'est vrai, tout d'meme, qu'nos Commités ont touos, tant qu'i sont, a hallé des mouochiaux d'sous du Budget; mais y'n sont pas pus dèsrangis qu'd'ammor. Y's ont tous eunne sempiternelle peux du "Accountant" tchi s'en va v'nin d'Angliéterre lue baillyi "ouatte for" les autres jours. Ch'est lus gomme dé s'faithe voté trop d'sous par les Etats. Y pouoront dithe pus tard au "Accountant": "T'chès qu'ous avez a ouassé? L'Estats ont dit - ch'est mértchi sus l'Livre - qué j'pou'èmes dèspensé tout chenna!

Et l'"Accountant" n'y vèrra qu'bliu.

* * * *



"Et m'dithas tu, s'fait oquo 'Douard, en r'mertchant qui fallait £7,720 pour Education - qué ch'n'est pon honteux! Né v'la té et mé qu'envions nos èsfants siez Parlett, qué j'payons pour, et oquo y nos faut payi pour èsdutchi d's'èsfants tchi tchittent l'Ile dès qui savent un mio liethe et cartchullé!"

J'eus bin d'la peine a faithe comprendre a 'Douard qui n'tait qu'un pouore achocre; et qu'no Messieux 'taient touos d'avis qué 7,720 par an pour èsdutchi les siens qu'nous èsduque, 'taient des sous geantrement bin pliéchis.

Quément! j'lis dis. Y'a achteu, en Jérri, eunne chentaine ou pus d'maîtres et maîtresses qu'ont d'bouons gages et quat' mais d'vacances par a, et qué si j'n'était pon pour l'Education Obligatoire s'aient oblyigis d'travallyi coumme té et mé pour gagnyi lus vie! Tu n'est qu'un nâdgeux, man pouore 'Douard! et ch'nest pon té qui montréthas a nos Etats coumment s'pliéchi pour dèspensé des sous.

"Et m'dithas tu, sé'r'fait 'Douard, tchès qu'ch'est qu'chu Baron d'St. Hélier - ov un accent aigu - endrét chi touos les villais sont a s'mettre a jnors? Tchès qu'il a fait d'rare, chu Baron: combien chutte plieche la vaut y par an: et èsche pus haut qu'Chantnyi?"

Quand j'eu explyitchi qué ch'tait un Jerriais qu'ait Juge en Angliéterre; qué ch'tait li qu'avait la job de faithe porté-r'pos ès fommes tchi faisaient anglyi lus hoummes, et qu'il 'tait payi bin des chents Louis par an pour chu travas la, mais qu'lé titre dé Baron n'rapportait rin par an - au contraithe, y'avait un tas d'frais a payi - 'Douard dit qu'nous avait bin fait d'en faithe un Baron sus ses viers jours, et qu'achteu qu'y'avait un Jerriais dans la Nobyesse, lé Gouvernement Angliais n'os renvèrrait p't'être les soudards.

* * * *

J'conte qué Sam r'sétha sus pi a la fin d'la s'maine, et qu'nou n'ouétha pus pâslé d'mé pour tchiqu' temps. J'en sis pus qu'ennyé d'chutte èscrithie; et d'avé man n'veu siez nous a m'èslourdé qui n'faut pon béthe du tée a-mème la souostasse; tchi n'faut pon mangi du riz ov un couté; qu'les villais lavent quasi tréjous lus mains d'vant dîné, etc. Un tas d'teurs!

Sam sé fiait d'être au bantchet au Counnèstabye Baudains, mais y n'peut pon oquo maulé a s'n'aise. Sa machouéthe est oquo pus ou mains dèslotche la y'ou qu'la jouge avait appié contre. L'pouore médjan en plieuthe dé dèspié a l'idée du fricot qu'il a perdu.

L'Onclye a Sam
Chronique de Jersey 8/3/1905

No comments: