Friday 20 February 2015

Gibet

Né v'chîn l'texte d'aniet d'not' auteu du mais, Henry Luce Manuel:

Here's today's text by our author of the month, Henry Luce Manuel:

Gibet
A
(Rencontrant son vier amin
B., et la fache toute longue)

Chu minsérable,
Trouvé coupable,
Est condamné à pendaison.


B
(Puriste qui marche la vie
sus hautes gâluoches coumme Vrai Parfait)


Chla le sert bein,
Vilain vaurein,
Juri et Cour ont ieu raison.


A
Mais, l'homme - est dit -
Souvent s'trompit...
Si ch'tait coumm' chla dans chutte affaire.


B
Gniolin! - Et pis,
Vchin men avis,
Condamner, jamais ne peut nière.


A
(Etounné)

Au condamné?


B
(Fraid)

A Société...


A
(Sérieux à n'en pas finir)

MAIS,... s'innocent,
Par chanc' nou pend,
Sus chla, vaisin, coumment r'véner?


B
(Un p'tit morcé aigri)
J'sais pon. Mais - Bah!
Chla n'mergard' pas,
Je n'pass' pas mon temps à d'viner.


A
(Persistant)
Si même a fait,
C'qu'est imputé, -
O, pour un moment faut penser!


B
Penser - à qui?


A
Au Répenti....




(SILENCE)


A
(R'prénant)
Dounnez à tout, O jusqu'au pus mauvais,
Moyen de Salut, et de fair' tous vaix
Qu'avec Dieu i' tient fair' sa paix.


B

(Caud de colère)

O mais, amin, à quêch donc qu'ou pensez?
Un mais yest donné!
N'ÊCH' DONC PAS ASSEZ?
Alluons-en!... 'Ou déraissonez.


A
(Ses yieux écalés, coumme jamais
Nou n'avait veu, - dit tristement)

...Eh bein....

Bein seure, amin B, ou-z'êtes loin
D'être, en vérité, UN CHRÉTIEN.




(I' s'entre quittent,
tuos les deux assez mâris.)

No comments: