1955: Rêunion Mensuelle

 L'Assembliée d’Jèrriais

Rêunion Mensuelle.

 

Le réunion mensuelle eut lieu Vendrédi au sé, lé 26 d'Août, en pliein air, sus les monts dé Grantez, à St. Ouen - la propriété dé Moussieu John du Val.

 

I'y avait eune chinquantaine dé membres présents.  Comme Vice-Président, lé Sieur Chs. Billot print la chaise, dans l'absence du Connêtablye S. G. Crill.  Lé rapport dé la rêunion du 29 dé Juilet fut liu, approuvé et adopté.  La Sécrétaire-Assistante (Mme Amelia Perchard) rempliaichit la Sécrétaire qui 'tait hors dé l'Ile.

 

Nouvieaux Membres.

 

Les nouvieaux membres êlus à chutte rêunion sont:-

 

Lé Sieur Snowden Payn, lé Sieur Henry Gough et Mme Evelyn Gough, lé Sieur Cyril Poignand et Mme Enid Poignand, lé Sieur Reginald Luce et Mme Margaret Luce.

 

Discours Edifiant.

 

Quand l's affaires dé la rêunion fûtent finies, Moussieu du Val explyitchit comment qué n'ou dêcouvrit lé dolmen en 1912, après qu'il avait 'té là entêrré pour des chentaines d'années.  M. du Val racontit les détails d'eune manière vive et intérêssante, et à la fin d'son discours, il invitit les membres d'aller auve li sus la pointe.  D'ichin, i'y avait eune veue supèrbe dé la Route des Mielles et d'la Baie d'St. Ouen.

 

Ermèrciements.

 

A la fin d'la sérée, Moussieu Billot ermèrcyit M. du Val, qu' avait donné un si grand pliaisi à plusieurs des membres dé l'Assembliée, en lus pèrmettant dé t'ner lus Rêunions sus ses tèrres.  Des r'mèrciements fûtent accordés étout à Mme Le Maistre et à Mme Richard, pour lus dévouement en faisant du café pour tout l'monde, et en l'apportant jusqué là.  I' fut hardi apprécié, car i' c'mmenchait à faire fraid, et les membres en fûtent bein erconnaissants.

 

La préchaine rêunion éra lieu lé 30 dé Septembre.  L'Assembliée fut ajournée dé viers neuf heures, après eune sérée hardi intérêssante.

 

1955