1964: En c'mîn pour l'Australie! (4)

 En c'mîn pour l'Australie!

(Siète)

Au Ceylan

  

Lé Ceylan est ieune des grand' niches dé la religion Bouddhiste, et à Kandy, ancienne capitale, y'a un templ'ye dans tchi nou peut vaie ieune des dents du Bouddha. Oulle est montrée au peupl'ye deux fais par an, et j'eus la chance d'êt' là ieune dé ches fais-là en 1950. J'fus pèrmîns d'entrer dans l'Sanctuaithe du Templ'ye pour vaie les cérémonies d'vénéthation. Y'avait un orchestre à jouer d'la musique orientale atout des drôles d'instruments. Sus un autel dans l'mitan du sanctuaithe les fidèles pôsaient des pétales dé La Flieur du Templ'ye - eune sorte d'blianche flieur tchi r'sembl'ye à la flieur du magnolia, et tch'a l'même parfum - et i' s'agnouoillaient à chantonner à la musique dé l'orchestre. Sus l'drièthe dé l'autel, comme un rétabl'ye drièthe l'autel d'eune Églyise Anglicane, y'avait un mangnifique travas en filigrane et en forme d'monstrance, atout La Dent dans l'mitan. Lé parfum et la ligièthe feunmée d'enchens oriental donnait un air dé mystèthe réligieux dans l'sanctuaithe, et les blianches robes des pélérîns et les robes en jaune-safrané des prêtres Bouddhistes ajouôtaient d'la couleu à la cérémonie. La Dent, objet d'vénéthation, est longue - quâsi longue comme la dent d'un j'va - et quand j'en pâlis à un homme du pays pus tard, i' m'dit qu'oulle 'tait longue viyant qu'Bouddha 'tait un homme tch'avait neu' pids d'haut!

 

Un prêtre tchi pâlait l'Angliais parfaitement m'fit la beinv'nue. I' m'dit tch'il avait 'té né en Italie et enm'né comme mousse à New York par ses pathents, ou-est tch'il avait fait tout s'n êcolage. Ch'tait en Améthique tch'il avait êtudié l'Bouddhisme et 'tait dév'nu prêtre dé chutte réligion-là. Arrivé au Ceylan, il 'tait dèv'nu chef du départément d'la propagande viyant tch'i' savait plusieurs langues, et il avait viagi comme missionnaithe Bouddhiste en Améthique et en Angliétèrre. I' m'dit un tas d'choses entouor lé Bouddhisme, entr'autres qué la robe du prêtre est jaune viyant qu'ch'est la couleu du fruit quand il est meux, et qu'la robe sîngnifie qué l'prêtre est meux dans la connaissance dé sa religion et tch'il a l'autorisation d'l'apprandre ès fidèles. I' m'dit, étout, qu'les prêtres Bouddhistes sont célibataithes quandi tch'i' sont prêtres, mais tch'i' peuvent èrprendre la vie civile et lus mathier s'i' veulent. S'i' sont mathiés dévant dév'nîn prêtres, i' faut abandonner lus femmes pour tout l'temps tch'i' portent la robe. I' sont végétariens viyant tch'i' sont voués à n'pas dêtruithe autcheune créatuthe du Bouan Dgieu. Et pis i' m'dit eune chose tch'est au mains intérêssante, si pas vraie: Qué Notre Seigneu Jésus-Chri avait passé neuv' ans dans l's Indes dans San janne temps pour apprandre la réligion Bouddhiste, et qué quand I' s'en r'allit dans San pays pour l'apprandre ès Juis i' l'avaient crucifié! J'l'ai souvent mentionné à des savants chrêtchiens, mais chutte légende-là n'pathaît pon êt' connue généralement ouaithe tch'il est considéthé possibl'ye qué Notre Seigneu visitit d'aut pays dans Sa jannèche, comme il est possibl'ye, étout, tch'i' visitit Glastonbury en Angliétèrre auve Sén oncl'ye St. Joseph d'Arimathie, considéthant qu'St. Joseph 'tait marchand d'conmèrce et tch'i' viageait à l'êtrangi.

 

Ieune des choses que nou vait au Ceylan est l'êléphant. Ch'est tchuthieux d'en passer iun dans la route atout san “cornac” jutchi sus l'haut d'san co driéthe sés ouothelles. Dans la rivièthe à Kandy, nou les vait couochis dans l'ieau et lus cornacs à les scrobber atout eune manièthe dé bringe dé cayas.

 

La tchultuthe du thée est la principale industrie au Ceylan, et y'a 570,000 acres dé thée dans l'Île. L'exportation annuelle est quat' chents millions d'livres. Y'a tout pliein d'cocannettes là-bas, étout, et nou-s en vait des bouais un mio partout, et des bouais canneliers.

 

 

 

Bacaillot

 

Nouos v'chîn au chînq dé dézembre, 1963, et j'sommes dans la Mé Îndienne. I' fait bé, et l'temps est caud. J'avons crouaisi l'Equateur et nouos v'la dans l'hémisphethe méridional. Il est sept heuthes et d'mie au sé, et comme la maintchi des passagièrs sont à diner i' n'en savant rein, et pourtant ch'est un êvènement important, car y'en a tchi s'en vont attraper bacaillot!

 

Aniet, l'six d'dézembre, j'avons veu la cérémonie dé l'donner ès cheins tch'ont crouaisi “La Lingne” - comme disaient l's anciens naviguants d'Jèrri - pour la preunmié fais. Sus l'pont, eune bangnerêsse en cannevas avait 'té emplyie dg'ieau d'mé, et l'trône du Rouai Neptune pliaichi en drièthe, atout des tchaises pour ses Aîgues-dé-Camp (ou pûtôt Aîgues-dé-Mé!) dé châque côté. D'un côté y'avait eune grand' tabl'ye atout un blianc lincheu êtendu d'ssus. Sus la tabl'ye nou viyait un grand long râseux à la vielle mode, fait en bouais. Il avait dans les quat' pids d'long. À côté du râseux y avait eune grand' scie, en bouais étout, dents et toute la pêque comme eune vraie scie. V'la tchi faisait quâsi peux à vaie!

 

(À sièthe)

 

George d'La Forge.

 

En Améthique,

Lé 21 d'août, 1964.