1953: Les Mintchiers et l's'Ecréhos

 Les Mintchiers et l's'Ecréhos.

Ch'est à nous!

 

Moussieu l'Editeu,

 

La Merrienne tait si lâssée quand je r'vinmes d'la Ville Sam'di au sé, qu'ou restit au liet jusqu'à djais heuthes Dîmanche matin, et fut bétôt une heuthe à s'habillyi, de tchi qu'j'eut même à y'aidgi à mettre ses cauches.

 

Sûs un sens ch'n'tait pas êtonnant, car j'avions tait en Ville tout l'jour dépis neuf heuthes, car la bouonnefemme voulait vais tout, et j'vos asseuthe qu'ou n'mantchit pas grand'chose. Ou tait pliantée dans l'mitan d'la foule à djais heuthes, quand l'crieux public sonnit sa clioche avec des Oyez! Oyez! Oyez! pour annoncé Moussieu l'Bailli, tch'y fut bouon assez de v'nin ouvri l'Vier Marchi, et ou dit que jamais n'r'oubliétha chutte charmante Dame tch'y chantit si bein. “Je s'y seuze,” comme ou s'fait, “que n'y'en a pas yunne dans toute la pâraisse de Saint-Ou à l'y v'nin au g'nou.”

 

Tout l'restant d'la matinée et toute l'arlevée ou tait là à vais l'Sieur Maillard faithe sa vendue. Ou dit tch'y fit raide bein, mais ou crait tch'y pathait mûs sans chutte grande barbe-là. Et quand vint l'sé, après tchiques tâsses de tais et des galéttes ou s'assit ôv mé pour êcouté l'programme que la Missis Le Sueur avait prépathé, tchi tait prèsque tout en Jêrriais. J'fûmes trempés tous les deux, mais ou n'voulit jamais bouogi d'vant la fin. Quant à mé, Moussieu, j'éthais tait raide content d'm'êcappé longtemps d'vant, mais quand j'en pâslit ou m'dit que j'tais bein ouèsque qu'j'tais.

 

Tout l'jour Dîmanche ou paslait d'chu Vièr Marchi, mais ach'teu oulle a r'oublié tout chonna, et ch'est un bein difféthent sujet tchi l'otchupe. Ch'est l'affaithe des Mintchiers et d's'Ecréhos. Oulle a luit la gâzette touos les siers, et hier au sé ou n'dit qu'ou qu'menchait à s'lâssé de tout chu gniolin-là.

 

A qu'menchi oulle insiste que n'y'a autchune tchéstchon en dispute, et que j'sommes bein bêtes d'avé jamais permint la France de san touôllyi. “Si nos Etats avaient yeu un brin d'avis,” ou s'fait, “ils éthaient bein vite dit au Gouvernement français d'lûs mêlé d'lûs affaithes. Et nous éthait deu dithe chonna étout au Gouvernement Angliais, car ch'est à Jêrri qu'les Mintchiers et l's'Ecréhos appartchennent.”

 

“Eh bein, je n'sais pas, Merrienne,” j'l'y dit. “Sûs un sens, nous a tréjous comprint que ch'tait à l'Angliéterre.”

 

“Oh, bon!” ou s'fit, “et tchèsque allé ès Mintchiers dans les viers temps à la pêque des homards et d's'anguilles, si ch'n'tait pas des Jêrriais? Dans l'temps d'man pèthe nous éthait veu là une bouonne trentaine de batiaux d'la Rocque, et la piûpart restaient là pour bétôt une semaine de temps, d'vant r'venin vendre lûs pêque en Jèrri. Et l's'ormers! Tu'as tait là bein des fais té. As-tu jamais veu d's'Angliais à remplyi lûs pagniers et lûs pouques? Nânin, man Ph'lip, ch'est à nous les Mintchiers et l's'Ecréhos étout. D'mande au bouonhomme Joe Bétchet d'Rôsé si ch'n'est pas vrai. Et si tu'avais d'mandé à Moussieu Lemprièthe tch'y n'est pûs, tu'éthais yeu ta raiponse, épis bein vite.”

 

“Y'a des maisons ès Mintchiers et ès Ecréhos,” ou continuit. “Tchèsqu'y l's'a bâties est-che des Français, ou même d's'Angliais? Quand chu Français hauchit l'tricolor sûs les Mintchiers chutte bordée-là, et proposit d'y bâti une maison, y fut bétôt fichi à la porte avec sa couleur. Et si, y'a chent ans, autchun êtrangi éthait yeu l'toupé de v'nin tâchi d's'êtablyi là, la Compagnie d'Saint-Ou, avec ses Sérgens et ses Corpothaux n'éthait pas tait longtemps d'vant arrivé là pour le renvié d'ouèsqu'y v'nait.”

 

“Sans doute,” j'l'y dit, “mais comme j'avons r'mérchi bein des fais, les temps sont changis, et j'n'avons pas l's'idées d'nos anchêtres.”

 

“Nan,” ou dit, “ni lûs couothage ou lûs indépendence ni-n'tout. J'nos laissons m'né par le néz sûs touos les sens et dans toutes les directions. Pas êtonnant qu'nou rapporte que y'a des craques dans tous nos viers chim'tièthes!”

 

En dîsant chonna, Moussieu, ou se l'vit, et j'nos en fûmes au liet.

 

Ph'lip.

1953