1955: Pas d'aide pour le Baillyi

 Pas d'aide pour le Baillyi

Ph'lip est indigni.

 

Moussieu l'Editeu,

 

Les femmes sont incriyibles! Dîmanche au sé, sans un mot d'avérti, la Merrienne m'annoncit qu'ou s'n'allait en Djérnezi pâssé huit jours siez sa couosine Lisabé, tch'y d'meuthe au Torteva, un pays, de chein qu'nou m'a dit, d'ouèsque les missionaithes r'veinnent jamais.

 

“Ch'est dommage, sûs un sens,” ou s'fit, “que tu n'peux pas v'nin ôv mé, mais y'a trop à faithe ichin. Surtout, tandis qu'je s'sait horte n'oublie pas à soigni la volaillye et la catte.”

 

Et don, Moussieu, d'pis Lundi matin j'ai tait à man tout seu à faithe tout, et j'vos asseuthe que j'ai souffert, et que quand j'ramonte au sé, ma vieille tête est à peine sût l'ouosillyi que j's'y hors au royaume des taupes.

 

Mais ch'n'est pas d'chonna que j'voudrais vos pâslé agniet, mais de chein tchi s'est pâssé dans l's'Etats chutte semaine au sujet de Bâilli. Vraiment, je n'comprends pas la Chambre. N'y'a pas un membre tch'y n'admet pas que l'Chef Magistrat a bein trop à faithe au jour d'agniet, mais tchès que a tait fait chais jours pour le souolagi? Rain du tout, Moussieu, au contraithe l's'Etats ont empliéthi la position, et lûs Président peut réfliéchi qu'notre vieille Constitution n'a jamais tait en si grand dangi comme ach'teu. La Chambre y'a donné tout-plien d'sympathie dans sa dêtresse, mais a absolûment r'fusé d'arrivé à une solution tchi l'y doun'nait mains d'anxiêté. Quand au comité tch'avaient print siez ans a prépathé l'rapport tch'ils ont yeu fliantchi à lûs tête, pouvous m'dithe tchèsqu'y peuvent faithe ach'teu?”

 

Le fait est, Moussieu, que l's Etats qu'menchent à péyi pour les bêtises faites après la dguèrre, et y n'ont pas fini. Quand l'Sénateur Le Mérquand dit que si les Jurés-Justiciers avaient tait dans la Chambre la position éthait tait bein difféthente y n'dîsait qu'la puthe véthité, et s'il avait ajouôté qu'les Recteurs étout éthaient deu y'être il éthait yeu raison étout. Et y'en a hardi d'autres parmi nos campagnards dans la Chambre tch'y réalisent étout que chein qu'nous app'lait des réformes dans l'temps 'taient bein autre chose.

 

Mais, Moussieu, y'a une chose qu'est seuze et cértaine et ch'est que l's'affaithes ne peuvent pas resté ouèsqu'y sont. Y faut absolûment que l'Baillyi aie d'l'aide, épis bein vite, ou notre vieille Constitution s'n'îtha ès tchans. La mâjorité des membres pathaissent craithe que j'pouvons nos graie comme je sommes, mais chonna ch'est du gniolin d'mousses. Nous admet tout-d'suite que les deux Lieutenants du Baillyi sont d'charmants corps, mais y n'ont jamais, ni yun ni l'autre, siégi dans l's'Etats, ou êtudié la louai, et nou peut comprendre que quand y dîsent tch'y n'veulent pas prendre la piéche du Baillyi ou dans la Chambre ou dans la Cour Royale, ch'est parsque y savent tch'y n'ont ni pas l'expéthience nécessaithe. Quand au restant d'nos Jurés-Justiciers, ach'teu qu'moussieu Edwards, à chein qu'nou dit, est malade, aussi bein l's'oublié, car y sont aussi utiles souos les circonstances comme ma pouôre vieille grand'mèthe, tch'a tait souos les mérgots pour bein d's'années.

 

Pour agvé tout la vacance pour Avocat-Général n'a pas ocquo tait remplyie, et nou n'ouait pas pâslé d'autchun candidat, une situation tchi n'peut pas pliaithe grandement au Protchuteux, tch'a les deux djobbes à faithe et tch'y dait qu'menchi à s'en lâssé. Nous avait pâslé d'l'y comme Député-Baillyi salarié, mais il a dit tout net et cârré que chonna est impossiblye.

 

J'comprends que l's'Etats s'réunithont bétôt pour r'prendre la tchéstchon, et nous éspèthe que chutte fais nou trouv'tha l'moyen de dêcouvri tchique plian qu'la Chambre trouv'tha accéptablye, mais, franchement, Moussieu, j's'y bein content d'n'être pas membre de chu comité-là, car dans l's'Etats au jour d'agniet y'en a de toutes les mèthes, et y'en a étout, sustout parmi les Députés d'la Ville tch'y n'sont pas c'modes. Mais, avec chonna, j'ai dans l'idée que Moussieu l'Baillyi qu'menche a pérdre pâtience, chein tchi n'est pas êtonnant, et qu'si n'y'a rain d'fait chutte fais y prendra des m'suthes tchi pouôrraient surprendre les membres tch'y réstethaient têtoignes.

 

Chein tch'est bein êvident, Moussieu, ch'est qu'l'unité ou au mains l'bouon-voulé qu'nou voudrait vais dans notre Chambre Legislative n'éxiste pas. Quand pûs que l'temps va tant pûs l's'affaithes empliéthent sûs chu point-là.

 

Ph'lip.

1955