1965: Paris

En 1965, George d'la Forge vîsitit Paris

Jèrriais · Paris (George d'La Forge, 1965)

Paris

Trenton, Michigan, U.S.A.
Lé 30 d'octobre, 1965

Moussieu l'Rédacteu,

Quandis qué j'tais à Paris, j'pensis qué j'dév'thais aller vaie l'abbaye d'St. Denis où-est qu'les rouais d'France du temps passé sont au r'pos êtèrnel. Ch't abbaye-là est la Westminster Abbey d'France, et nou n'peut pon rêellement dithe qué nou-s a veu les monuments historiques du pays si nou n'la pon vîsitée.
Située dans la ville dé St. Denis, justément au nord dé Paris, l'abbaye est eune belle églyise. Ou' fut fondée en l'année 626 par Dagobert le preunmyi, rouai d'Austrasie (rouoyaume dans l'est d'La Gaule Franque, dont Metz 'tait la capital) en 622 et des Francs en 628. Sans doute, comme dans toutes les vielles églyises, y'a ieu un tas d'changements d'dans dépis qu'ou' fut c'mmenchie, et oulle a 'té agrandie deux-s'trais fais par les difféthents rouais d'France. Il' y pranaient grand întéthêt, sachant qu'ou' s'sait en fîn d'compte lus dreine démeuthe.

Y'avait a bein près eune chînquantaine dé tombes dédans, mais dans l'temps d'la révolution les révolutionnaithes ouvrîdrent touos les caveaux et ramassîdrent l's os tch'i' trouvaient d'dans, et l's envyîdrent dans eune fosse commune. La fosse fut rouvèrte pus tard et l's os transféthés acouo eune fais - chutte fais dans eune grande sépultuthe creûsée dans la crypte d'l'abbaye. En d'vant d'la sépultuthe, eune grande ardouaise montre les noms dé touos les rouais dépis Dagobert preunmyi tch'ont lus os d'dans.

Dans eune aut' partie d'la crypte, y'a eune manièthe dé chapelle tch'est tréjous freunmée à clié, mais par eune petite fénêtre tch'est gardée ouvèrte nou vait les côffres des trais filles à iun des Louis, et l'chein d'Louis seize et d'sa reine Marie Antoinette. Quand ches deux-là eûdrent la tête copée par ordre d'la Convention des Révolutionnaithes en 1793, i' fûdrent entèrrés d'tchique bord à Paris, mais i' fûdrent d's'entèrrés pus tard et mîns dans des bieaux côffres et portés dans la crypte d'l'abbaye, où-est qu'nou les vait aujour-d'aniet. Quand nou vait ches côffres-là nou n'peut sénon penser ès mînsèthes du pouorre Louis et d'Marie Antoinette, tchi passîdrent lus dreins jours en prison en attendant pour la dguillotine, des mînsèthes tchi fûdrent d'autant pus pènibl'yes sachant tch'i' laissaient lus janne fis d'huit ans entre les mains des révolutionnaithes et en prison étout. Il y mouothit deux ans pus tard. Il avait 'té procliâmé Rouai souos l'nom d'Louis dgiex-sept par les prînces émigrés quand san p'pèe eut la tête copée, mais i' n'sortit janmais d'prîson. Cèrtains prétendaient tch'il en avait êcappé et qu'eun aut' mousse l'avait rempliaichi, mais i' n'ont janmais peut dêcouvri la véthité et il est tout probabl'ye tch'il y mouothit d'sa belle mort.

Les grands hommes d'êtat en France n'ont janmais 'té entèrrés dans l'Abbaye d'St. Denis, comme en est l'cas d's illustres Angliais dans l'abbaye d'Westminster. I' r'posent dans l'Panthéon, célebre monument d'Paris, bâti sus l'haut d'l'ancienne montangne dé Ste. Geneviève dans lé style néo-grec. Lé haut d'la coupole est à pus d'deux chents pids d'hauteu. Lé bâtisse t'ait d'abord supposé d'êt' eune églyise, mais la Révolution en fît un templ'ye destiné à r'chéver les restes mortels des grosses têtes du pays, et lî donnit l'nom dé Panthéon. I' fut quand-même fait sèrvi comme églyise souos la Restauration pus tard, mais la traîsieme République décidit en fîn d'compte d'en faithe un vraie Panthéon, et les restes dé Victor Hugo fûdrent mîns dans la crypte en 1885, et les chendres dé Lazare Carnot, dé La Tout d'Auvergne, dé Marceau, dé Baudin et dé Sadi Carnot y fûdrent transportées étout.

I' n'ya pon d'doute qué Paris est eune belle ville. Quand nou vait les belles avenues tchi mènes à l'Etoile (Arc de Triomphe ordonné par Napoléon en 1806 pour célébrer ses victouaithes). Auve toutes les maîsons des deux côtés d'la même hauteu, et les bieaux gardîns et les bieaux bouais qu'nou trouve ichîn et là, nou n'peut pon s'empêchi dé l's admither. Dé Monmartre, début sus les d'grés d'La Basilique du Sacré Coëur, nou vait eune supèrbe êtendue d'Paris. Les p'tites êtraites rues d'Montmartre sont hardi întérêssantes, et vouos rappellent les vièrs temps.

Dans la Basilique même, divèrsément belle ouaithe qu'oulle est modèrne (sa construction fut c'mmenchie en 1873), i' pathaît y'aver tréjous eune foule dé monde. Quand j'y étais un Dînmanche à un sèrvice et tch'i' fîdrent la collecte, les collecteurs d'aumônes ramâssaient les sou à la pann'lée! Quand j'viyais tant d'monde à l'églyise et tant d'sou par les c'mîns, j'pensais à la congrégation à St. George a St. Ouën tch'a tant d'peine à collecter assez d'hèrpîns pouor payer les frais annuels dé l'églyise et en ramâsser assez d'extra pour bâti eune salle de rêcréation pour les jannes du vaîthînné quand la "hutte" dans la cârre du clios d'l'aut' côté d'la route né vaudra pus la peine dé r'graie. Les Seurveillants Percy L'Masuthi et Harold Vibert es'saient-i' contents s'i' pouvaient aver la collecte d'un seul Dînmanche matîn d'la Basilique du sacré Coëur, pour l'usage dé St. George!

George d'La Forge