1923: Theatre, football, Charlie Chaplin, flags

Du Cahouain en 1923:

Ah ça, garçons, je n'sais combain qui y en a d'entre vous qu'ont 'té vaie "Les Revenants," chute semaine.

Pas bain des piéches, je garantis!

Eh bain, le Caouain vos asseuthe qu'ous avez mantchi un "treat."

Ch'est-à-dithe, les siens d'entre vous qu'avez assez d'intelligence pour apprécier de tchi bon.

Ou d'vez, sans doute, aver veu les annonces qu'avaient pathu sus les gâzettes, qu'une piéche souos chu nom-là devait être jouée au Cercle St. Thomas, par Moussieu et Madame Joseph et lus compagnie d'artistes.

Eh bain, tch'est qui fait que ou' n'y étiez pas?

Si ch'est, que comme le Caouain, ous aviez ieu l'bonheur d'assister à lus précédentes réprésentations telles que "Le Soldat de France," "Servir," "Les Aveugles," etc. ous aithiez 'té si êmervillyis du talent et d'la capacité de ches bouannes gens-là, qu'ous aithiez fait comme mé, et ou n'aithiez pas mantchi d'y aller pour autchune chose.

Mais v'la! Ou' n'y étiez pas.

Tch'est qui peut en être la raison?

Etait-che le titre d'la piéche qui vos faisait peux?

Je sais bain que bain des piéches d'entre vous associent le mot "revénant" avec des fautômes êpouvantablyes, vêtues d'un blianc lincheu et faisant lus apparition à minièt, sus les muthailles d'un châte ou dans l'coin du chimetiethe, tout des histouèthes inventées par vos grand'méthes quand ous étiez p'tits mousses, avec l'unique objet de vos mettre la peux dans l'âme.

Mais i' n'y avait rain de tout chenna ichin.

Les "revénants" étaient simplyement des mémouaithes du passé. Et i' n'y avait rain dans toute la répresentation pour faithe peux à tchi qu'che sait.

Je n'm'en vais pas êprouver à donner une description d'la pièche ni cherchi à dêtailli les talents des chinq artistes qu'y prinrent part, car le pouore Caouain ne se sent pas capable de lus faithe justice, et pis d'ailleurs, le patouais Jerriais ne s'y prête pas; che s'sait quâsiment un sacrilège.

I' suffit de dithe que Madame Joseph est une actrice ravissante, comme nou n'en rencontre pas tous les jours.

Le jeune Moussieu Biyou fut absolument parfait dans son rôle, un rôle difficile par exemplye, et les mêmes êloges lus appliquent à Moussieu Jouault.

La demouaîselle qui jouait la partie d'la p'tite servante s'atchitti d'sa tâche admithablyement, surtout pour une debutante, car nou dit au Caouain que ch'tait sa prumié feis.

Si j'nomme Moussieu le Commandant le dernyi, i' n'faut pas craithe par chenna, qu'il est l'moindre d'la p'tite compagnie, au contraithe, il est impayable, chu bouanhomme-là.

J'ai toute raison d'penser que ch'est un moussieu qui s'est distindgi dans sa carrièthe militaithe, mais en même temps, opprès chein que j'vis l'aut'e sé, je n'peux pas sinon être convaintchu qu'il a mantchi sa vocation.

Il aithait deu aver 'té Pasteur!

Je fus si frappé de s'n appathence, de ses manièthes et de s'n êloquence, que je sis persuadé que comme iun de nos prédicateurs, il aithait un succès ermerquablye et i'faut que j'tâche de faithe en sorte pour mettre san nom sus l'plian, car j'ai grand envie de l'ouï prêchi dans not'e chapelle à Grove Place.

Enfin tréjous, le Caouain passi une séthée bain agréable, la seule chose qui gâti man pliaisi était la rage que j'ressentais de vaie que patheil talent n'tait pas mus patronisé par touos vous.

Et rêelement, je n'vos comprends pas!

Ou n'pouvez pas donner comme extchuse que ch'est manque de temps! Une grande partie d'vous trouvez bain l'temps d'aller en pliain jour presque toutes les s'maines grapiner jusque sus l'haut du Mont-ès-Pendus pour vaie vingt-deux hommes chasser un morcé d'chui alentour d'un clios, et d'autres îthaient bain chinq ou siex milles pour vaie des ouaisiaux comme Charlie Chaplin faithe ses morgaches sus un "screen" mais, quand non vos présente tchiquechose qui vaut absolument la peine, eh bain – zut alors!

* * *

I'y eut, Jeudi passé, une diverse distchussion en dînant, siez Maît'e Cliément d'Caen.

Laïesse Ernon, san vaisin a un biau "flag-staff" qu'i' mins à haut i'y a un an ou deux, et Jeudi il avait hissé treis ou quatre couleurs dessus.

Maît'e Clièm en entrant pour dîner dit comme chenna, "Tch'est qu'i'y a en allant annièt don, que Laïesse a mins ses "flags" à haut?"

Sa niéche, qui lièt les gâzettes, raiponni, "Mais tu n'sais pas don, uncle, que ch'est annièt les neuches du Duke of York?"

"Hum," se fit l'bouonhomme, "je n'criyais pas qu'il 'tait si patriotique!"

Là-dessus, Joseph Le Boutillyi dit, "Je crai, mé, que ch'est viyant que ch'est annièt le 'Muratti"'

"Enfin," s'fit la nièche, "je séthons d'main tch'est qu'en est la raison car la bouannefemme Hache-Menu est à laver siez ieux annièt et ou vain ichin d'main ch'est pourtchi on pourra nos dithe.

Hier, Vendredi, quand la laveresse vint, i' li d'mandirent en dêjeunant.

"Est-che pas que ch'tait pour le mathiage du Prince?"

"Nouffait," s'fit la bouanne-femme.

"La!" s'ecryi Joe, "j'savais bain mé! Ch'tait à cause du 'Muratti."'

"Nouffait, ninnetou! Mess Ernon ne pense djéthe à tout chenna."

"Tch'est qui pouvait être la cause de toutes ches flags-là, don?"

"Eh bain, je m'en vais vos l'dithe, ch'tait parce que ch'tait Jeudi que Mess Ernon quémenchi à dêfoui."

Caouain

28/4/1923