A delivery of apples at the Weighbridge (beware: the article contains language that would not be acceptable today)
Chutte fais ichin le Comité pour la Défense de l'Île a fait un ennemin de Maît'e Cliément d'Caen pour tout jamais.
S'ous aviez 'té sus l'Weighbridge Mêcredi passé, ous aithiez veu l'bouonhomme dans iune de ses futhies et ous aithiez ouï du langage qui vos aithait fait dréchi les g'veux sus la tête.
Et dans chu cas ichin, malgre que Maît'e Cliém est un mio drôle tchiquefais, il avait raison d'être mârri.
Le jour de d'vant, ch'est-à-dithe, Mardi, il avait mins san monde à tchillyi ses pommes de Rouget et ses Blenheims, et dans la séthée, en batchant sa vainnée de vingt bathis souos sa tcherpenthie, i' dit comme chenna, "En v'là une cherge qui vaut bain la sienne à Jack Labey!"
Et l'sé, quand i' fut couochi, à la pliaiche de s'endormi, i' s'mins à faithe des caltchuls combain qu'sa vainnée d'pommes dév'thait réaliser le lendemain sus l'Bridge.
Selon li, si l'prix restait comme de couôtume, sa cherge dév'thait s'ravenin à chinquante-treis ou chinquante-quatre louis!
Le bouonhomme était radieux.
Jamais de mémouaithe d'homme une cherge d'pommes avait 'té vendue pour chu montant-là.
I' fut à rêver toute la nièt qu'il 'tait à en dêchergi des vainnées comme des vainnées dans les stores et qu'les Juifs de d'sus l'Weighbridge li rempliaient ses bathis à m'suthe avec des souverains en or!
Et pis i' se r'trouvait en Cour à passer contrat pour de la rente fabuleuse qu'i' v'nait d'acater:
Dès qu'il eut dêjeuné Mêcredi matin il aidgi à Joseph Le Boutilly, san domestique, à bliatchiner la graie d'sa vainne et à shiner les brass, tout comme si s'en allait au thée d'la Chapelle. I'fit même Joseph bliatchiner les chabots à la Bijou, car comme i' disait, "Je veurs que m'n attelage paithaisse digne de l'occasion."
Il 'tait un quart de douze quand il arrivi sus l'Weighbridge et touos les marchands s'en vinrent couothant pour vair tchest qu'il avait dans sa vainne.
"Oh, oh!" pensi Maît'e Cliém, "ils en tous besoin, je m'en vais-t-i' en faithe un 'lift' !" Mais les marchands ne firent que d'êpier dans ses bathis et un chatchun prins ne pomme et s'mins à la mangi.
Ch'est une petite manièthe qu'ils ont sus l'Bridge.
Davant que l'bouonhomme eusse pésé i'y avait déjà un bouan siextonnyi de hors de sus le bathi d'driéthe.
Opprès qu'il eut rangi sa vainne i' s'en fut ramasser san billet mais tandis qu'i' fut hors, les hommes et les garçons qui tchainnent les ch'vaux attouo de Bridge avaient gaffé châtchun lus pomme ettou, ieux, de sorte que les pus bettes "toppers" avaient dispathu de sus l'haut des bathis.
Maît'e Cliém se mins à juther d'sus et criyi à un policemainne qu'était mâté contre l'office des Impôts.
Ch'tis-chin s'en vint vaie tch'est qu'i' voulait, mais en passant l'long d'la vainne il en prins iune ettou li, et s'mins à la grugi en pâlant au bouonhomme.
Chenna fis enragi Mess de Caen!
"Gasdemmin!" i' li dit, "ous êtes supposé d'être ichin pour garder l'ordre, vous, et pour protégi l'public, et pis ous êtes aussi piéthe comme le restant! Je m'en vais vos rapporter au Connaîtablye sapresti!"
Quand le bobby vit que l'bouonhomme était mârri, i' se r'tithi, mais il avait trouvé la pomme si bouanne qu'il en annexi une autre en passant drièthe la vainne. I' fut bain que Maît'e Cliém ne s'en aperchut pas.
Par chut temps-là les marchands c'menchaient à lus rappréchi pour un deuxième "helping" et l'bouonhomme lus dit comme chenna,
"Ou n'acatez pas don, annièt?"
"Nan dja, je n'en avons pas besoin acheteu."
"Et pourtchi, mon doux?"
"Pourtchi? Ou n'avez pas veu l'Morning News, don?"
Et i' dêhalli une gazette de dans sa pouchette et la mettant souos l'nez à Mess de Caen li pointi une annonce officielle du Comité interdisant l'exportation de pommes.
"Sacrés mille tonnerres!" i' s'fit. "Tch'est qui s'sa la prechaine chose? A c'menchi i' n'voulaient pas m'laissi shipper mes bêtes, opprès chenna i' m'empêchirent d'envier d'la s'menche en Djernesi, et pis acheteu je n'peux pas vendre mes pommes! Iou djàblye que j'nos n'allons à chu compte ichin? Nous a bain d'la peine à vivre au temps qui va! Les récoltes couôtent treis feis pus à produithe que l'temps passé et dès qu'nous a tchiquechose à vendre pour gâgni sa pouore vie, v'là-t-i' pas que l'Comité met des barres dans les reues et vos empêche de faithe un sou!
Tchi sorte d'sacré Comité est chenna, don? Est-che qui faut que j'couothions nos fermes souos la tutelle de patheille organisation?
Et pis je pense bain qu'opprès tout chennechin nous organis'ra des "Flag Days" et des collectes d'porte en porte pour les rêcompenser pour chein qu'ils ont fait pour nous!
Qui vainjent par siez-nous, gâsdemmin!"
Et Maît'e Cliém en eut pour une démieuthe sus chu ton-là à harandgi la "crowd."
Et tout l'temps ses pommes dispaithaissaient iune à iune.I' finit par vendre sa cherge à un prix riditchule à un marchand qui li dit qu'i' s'en allait ristchi d'les garder.
Par le temps qu'i' vint siez li, il 'tait comme un vrai satan (i' s'était êcauffé un mio sus la route).
"Joe" qu'i' dit, "va-t-en tout d'suite siez l'cherpentchi faithe limer l'cônué!"
"Ou pathaissez mârri, Mess de Caen," s'fit Joe, "tch'est qu'i' y a don qui n'va pas bain?"
"Tch'est qu'i' y a? I' y a que j'm'en vais fliantchi touos mes pommiers les gambes en haut! Je craitrons des tomates gâsdemmin!"
2/10/1920
No comments:
Post a Comment