Motor racing in Brittany in 1927:
Iune des autres semaines quand des affiches pathurent à différents bords ichin en Jerri que la grande course d'automobile pour la "Coupe Florio" devait être couothue à St. Brieuc, J'arrivi à la conclusion que le "Ouest-Eclair" s'en allait envier une invitation pour que "Les Chroniques" y fussent représentées et je savais que si chenna s'arrivait, che s'sait mé qu'îthait car le Chef a bain trop grand peux du ma d'la mé pour faithe une traversée de quatre heuthes sus l'ieau et pis quand même, comme le baté devait sorti d'ichin à siex heuthes du matin, il est bain trop piercheux pour se l'ver du lièt à d's heuthes aussi riditchules.
Mais j'avais biau examiner la correspondance touos les matins, i'n'arrivait pas un mot du Ouest-Eclair, et je c'menchi à craindre qu'il y avait ieu un malentendu de tchique sorte et que j'avions 'té oubliés.
J'en pâli au Chef mais i'sen motchait li et m'dit que je pouvais bain sûfflier pour les invitations.
"Mai," j'li dis, "invitation ou pas j'ai fait m'n idée d'y aller et j'îthai !"
Et don quand l'jour arrivi je m'trouvi sus la cauchie à chinq heuthes et d'mie du matin pour être seux de n'mantchi pas l'baté.
Ch'tait l'"Dinar," et j'étions quasiment treis chents à bord.
Le viage se fit sans autchun incident spécial.
La mé était belle et j'arrivîmes au Legué de vier djaix heuthes.
I' y avait un train spécial à nos attendre et une douzaine d'automobiles.
Je m'étais mins sus l'"Bridge" en pliaine veue de tout l'monde comptant sans doute que m'en arrivée s'en allait causé une certaine sensation parmi la foule qu'était sus l'bord du tchai.
Bah ! personne n'y fit la moindre attention.
Pas un hourrâh, pas une trompette, rain !
Et bain j'pensi il est bain êvident que l'Caouain n'est pas connu par ichin.
Comme je ramontais la passerelle pouor dêbertchi je m'aperchus qu'un homme dans un uniform me r'gardait assez fixement et je m'imagini que ch'ttait tchique ambassadeur du Ouest-Eclair qu'avait 'té envié à m'rencontrer, sustout comme i' s'appréchi d'mé dès que j'mins l'pid à terre. Mais ch'fut oquo un autre désappointement.
"Avous tchiquechose à dêcliather ?" i'me d'mandi.
"Oui," j'li raîponni, "j'ai à dêcliather que ch'est ichin une triste réception pour le Caouain des Chroniques !"
Et i' s'mins à tâter mes pouchettes et à passer sa main par-dessus mes habits.
"J'ai grand r'gret," j'li dis, "mais j'ai tout-à-fait oublié à vos en apporter iune."
"Une quoi ?"
"Mais une gâzette, pardi !" Je m'en sis v'nu tout en presse à matin pour prendre le baté et –
"Allez !" i'm'dit.
Et je l'oui dithe à un autre homme qu'était à côté d'li, "Je crois qu'il est fou, ce type-là !"
Et bain, je ramontîmes à St Brieuc dans le p'tit train et je trouvîmes la ville en fête. Nous avait bain d'la peine à cirtchuler dans les rues à cause de la foule qu'i'y avait.
J'avais l'intention mé de m'rendre siez m'n amin Mons. Le Borgne dans la Rue Paul-Bert, et j'en prins le c'min.
Mais quand j'vins un mio pus liain je trouve la route barrée.
I'y avait pus d'vingt gendarmes à faithe la garde.
J'éprouvi à passer mé, mais je fus bain vite arrêté.
Iun d'ieux me d'mandi "Avez-vous votre carte ?"
"Oui, par exemple !" je li raîponni, et je li présenti iune de mes cartes sus tchi qu'il est imprimé,
"LE CAOUAIN,""Chroniques de Jersey"
Je n'peux pas imprimer ichin chein que ch't homme-là m'dit, mais je fus convaintchu dans bain p'tit d'temps qu'une carte comme chenna n'avait autchune valur à St. Breuc.
Pour pouver continuer man c'min je fus obligi de payer chinq francs pour une carte de cirtchulation et comme i' n'tait pas permins d'aller dans les routes ouest que les automobiles s'en allaient couorre je fus envié dans une autre direction, amont un côti et à travers d'une lande des milles hors de la vaie.
Je trouvi la Rue Paul-Bert à la fin, mais oulle tait toute barricadée ettou.
Heutheusement que je fus r'connu par un homme qui vaint dêfoui des patates en Jêrri et il explitchi au gendarme que j'étais tout-à-fait inoffensif.
Le gendarme me d'mandi iou que j'voulais aller et je li pointi la maison de Mons. Le Borgne.
I'fut bain aimablye par exemplye !
Ch'tait impossible de franchi les barricades sans assistance et dans tchiques minutes touos les vaisins étaient par lus f'nêtres pour vaie tch'est qui s'passait.
Iun donni une tchaithe pour mettre à côté des balustres et le gendarme prins le Caouain des Chroniques dans ses bras et le l'vi par en d'sus du treillis et l'dêposi dans la tchaithe.
De là che fus l'affaithe d'une minute devant que d'être sain et sauf siez ses amins.
Madame Le Borgne, qu'est iune des plus charmante dames que nou puisse connaître, s'aperchevant que l'pouore Caouain pathaissait affamé, se mins en train de li prépather un dêjeuner et je li s'sait tréjous erconnaissant pour la bonté qu'oulle eut envers mé duthant toute chutte journée-là.
Comme la Rue Paul-Bert faisait partie d'la piste pour la grande course j'eus une magnifique veue de toutes les automobiles qui passaient comme des flièches en d'sous d'ma f'nêtre.
La raideur à tchi qu'illes allaient était êpouvantablye et j'pensi à mé-même que l'Connaîtablye de St. Louthains s'en allait être bliâme pour permettre ditèt.
I' y avait jusqu'à une femme à y prendre part et ou s'en dêhalli assez bain, la foule faisant des hourras toutes les feis qu'ou passait, mais i' m'semblye mé qu'oulle aithait 'té bain mus dans la tchuisine à soigni sa castrole, que d'ristchi sa vie comme chenna pour tâchi d'gâgni une maleutheuse coupe.
Quand nous pense qu'y avait vingt-chinq contchuthents et qu'i' faisaient trente feis le tour de la piste ou pouvez bain penser que ch'la d'vint un mio enniant.
Mais ch'qui fut partichulièthement frappant était la parfaite organisation.
Pour quatorze milles de long la route fut gardée absolument cliaithe de tout traffic, pas même un piéton étant permins sus la piste, et chose qui prouve comment que les fermiers sont protégis en France il 'tait défendu au public de se stationner au d'passer dans autchun clios iou qui y avait une récolte souos peine d'être tradits en justice.
Eh bain, le moment arrivi que je fus obligi de tchitter mes bouans amins d'la Rue Paul-Bert, pour me r'embertchi à bord du baté.
I' faisait un temps superbe et la traversée fut des pus agréables. Je rentrîmes en Jêrri un mio opprès mînièt et tout l'monde pathaissait enchanté d'sa journée à St Brieuc. Nou y rîtha, j'espèthe.
13/8/1927
No comments:
Post a Comment