1927: l'êvolution

Acouo eune articl'ye dé 1927:

Le discours prononcé par Sir Arthur Keith l'aut'e jour à Leeds sus l'origine du genre humain, discours qui fut entendu dans toutes les parties du monde par les moyens merveilleux du ''Wireless'', a causé une distchussion générale et une vraie avalanche de lettres dans les difféthentes gâzettes.

Sir Arthur maintchaint que la théorie de Charles Darwin, que l'homme est d'cendu d'une race de singes, est tout-à-fait correcte et il appyi chute théorie-là par des ardgûments qui m'pathaissaient irréfutablyes.

J'étais convaintchu qu'il avait raison, surtout comme je prenais en considéthation certains types que j'rencontre ichin à la boutique touos les jours.

Mais, chose assez drôle, touos les profêsseurs scientifiques ne sont pas d'la même opinion.

V'là-t-i' pas tchiques séthées opprès, notre collègue ''Stylo,'' de ''l'Evening Post,'' qu'êcrit une longue tirade contre Sir Arthur Keith et sa théorie et êprouvi à nouos dêmontrer que l'grand savant ne savait pas chein qu'i disait.

''Stylo" peut tracer sa géneologie jusqu'à Adam et Eve et n'veur pon cherchi à puiser pus liain.

Sans vouler admettre que je partageons ses veues, je fûmes enchantés de liéthe s'n articlye dans la ''Post,'' car au mains, notre amin ''Stylo'' fit preuve de sentiments religieux que je ne li connaissions pas.

Quant à mé, le Caouain des Chroniques, chenna ne m'interêsse pas du tout.

Que l'homme essait d'cendu d'un singe, d'un mollusc ou d'un champignon, ch'est la même chose pour mé.

Je peux tracer ma descente en ligne directe du grand Timothée Chat-Huant et Noémi Hibou, les deux illustres ouaisiaux qui furent enfrumés dans l'Arche de Noé.

Le conseil que j'aithais à donner à Sir Arthur Keith, à Stylo et à touos l's autres hommes de Science qui sont à s'entre disputer sus lus origine, essait de laissi lus anchêtres dormi en paix, que che sait singes ou n'importe tchi, et de porter lus attention sus la race future, arrêter, si ch'est possiblye, la détérioration que nou dit qu'existe actuellement, empêchi des malheutheux qui sont atteints de maladies hériditaithes, de propagi lus espèce, pour remplyi les âsiles et les hopitaux de minsethablyes qui n'devethaient jamais exister.

Chenna au mains, aithait une utilité practique.

Enfin tréjous, l'exposition de Sir Arthur Keith n'a pas 'té sans aver un bouan êffet dans certains quartchers.

Les individus que j'ai alentou d'mé touos les jours ne sont pas justement si ordgilleurs.

V'là qui l's a humiliés un mio de penser qu'un grand savant avec des connaissances approfondies a dêcouvert que lus anchêtres étaient des singes qu'habitaient des caves et des forêts, et vivaient sus les tchênelles et des raichines.

Le Chef li, le tout prumi, n'est pas d'la maintchi si insolent envers mé, car i'sait bain acheteu qu'en autchun temps qu'i' me f'tha mârri, je peux tréjous li fliantchi au nez que man grandpèthe n'était pas un marmoûset !

Caouain

17/9/1927