1948: Merrienne complains of the cold

 Merrienne complains of the cold

But finds a cure

 

Moussieu l'Editeu,

 

Oh, grand doûx d'la vie tchi fait fraid," s'fit la Merrienne, hier matin, quand j'entris dans la tchuisine pour ma tâsse de café. J'n'ai pas rêcauffé d'pis qu'j'ai d'vallé. J'm'en vais me r'fouôré au liet si chonna continue."

 

"Ch'est d'ta faute," j'l'y dit. "Tu'as des titheurs pliens d'cotillions. Pourtchi qu'tu n'en mets pon yun ou deux d'pûs?"

 

"Tu pâsle comme un imbécile," ou raiponnit. "J'en ai dêjà quatre, et même ma pouôre mèthe, tch'y tait friyeuse comme tout, n'en mettait jamais pûs. Ch'est du rouoge flianet, et je n'comprends pas pourtchi qu'chonna n'peut pas m'gardé caud. Sans doute je qu'menche à m'vieilli."

 

"Et mé étout," j'l'y dit, "mais je n'sait pas pourtchi qu'tu t'pliâins. Tu'est ichin dans ta tchuisine, tandis qu'mé y faut qu'je s'sais d'hors à g'lé. Et j'n'ai pas une demié-douzaine de cotillions souos mes brais."

 

"Nan," ou dit, "mais tu n'est pas d'hors du tout. Tu t'chèns dans l'êtablye ès vaques des heuthes du temps, et y fait pûs caud là tchi n'fait ichin."

 

"Oh, ch'est d'même," j'l'y dit. "Eh ben va't'en souos la tcherquethie ramâssé des raves et des suidiches pour les bêtes, comme je veins d'faithe, et tu vêrras s'nous y puthe de sueu à chutte djobbe-là. Baille-mé man café que j'dêjèle chu gliéchon-là qu'j'ai dans l'estomac."

 

Après qu'j'en eût bu deux tâsses, j'qu'menchit à me r'trouvé mûs, mais la bouonnefemme se pliaignait ocquo. Oulle avait fraid ès pattes, oulle avait fraid ès ortéts, oulle avait fraid partout. A la ouï pâslé jamais Jêrri n'avait veu ditet temps.

 

Quand vint l'heuthe du dîné ch'tait ocquo la même histouéthe. Ou tait enfliubée dans sans grand châwl, ou gronnait tout l'temps, et nou l'éthait entendue grélotté un d'mié-mille au lien.

 

Mais après avé avalé une bouonne bollée d'soupe de pais ou qu'menchit à s'ravigoté, et ma fé dans les quatre heuthes la v'la tch'y met san bonnet et des galoches et tch'y s'en va faithe une p'tite touônée dans l'vaisiné, tandis qu'mé j'm'aloignit sûs l'sofa pour me r'pâsé un p'tit d'temps.

 

Et quand ou r'vint, ou s'mint à prépathé l'tais, et ou m'dit comme ch'là: "Tu sais ben, Ph'lip, quand y fait fraid nou n'dév'thait pas resté par dedans. N'y'a rain comme une bouonne prom'nade pour vos rêcauffé et pour vos donné un appétit. Y'a longtemps que j'n'avais pas yeu si faim."

 

"Mets ocquo deus-trais patates dans la cast-role," j'l'y dit. "Y'en a un autre ichin tch'y peut s'graie d'un bouon tais."

 

Ph'lip

1948