In 1993, Sir Arthur de la Mare lost a leg, but hadn't lost his grip
"Ah bein,'' s'fit l'Philip Desclios quand i veint m'vaie à hôpita' l'autre arlevée, "ah bein té tu veins d'en r'parer d'eune belle.''
"Mon Ph'lip,'' j'lis rêpounnis en riant, " té, t'es chein qu'il appellent eun optimiste. Tu pâles coumme si j'tais tout à fait dgèri, mais j'ai acquo eun loung trajet à faithe. Les docteurs ichein m' disent qu'i'sount bein satisfaits du progrès que j'fais, mais tout savants qu'i' s'saient i' n' peuvent pas m' érdounner la gambe qu'il eûtent à copper. I' s'en va faller qui j'r'apprennes à marchi: v'la tchi sah êt' bein pus difficile qué d'apprendie les tablyes éd multiplicatioun à l'école, et quand nous apprèche de quatre-vingt nou' s'met à sé d'mander s'il en vaut la peine. Mais, hereusement, quant à mé j'ai tréjous 'tait d'avis qu'i n'faut pas s'laissi battre.''
"A la buonne heure,'' s'fit Ph'lip, "ch'est là chein qué j'voulais entendre. Mais dis-mé, un gâs coumme té, qu'a tréjous 'te si actif, v'là tchi dait t'énnier terriblyément dé t'trouver enfreumé à l'hopita' a loungeur dé s'maine?''
"Eh bein,'' j'lis dis, "le corps humain peut s'adapter à presqu' autcheunne chose. J'admets qué la preumié s'maine ichein jé n'savais pas tchi faithe dé mé même. Mai p'tit à p'tit nous s'acc'mode mes amins m'ount apporte' tant d'livres, tant d'flieurs, tant d'cartes et d'lettres avec lus sou'aits pou ma santé qu'i'n'mé reste pus grand temp pour m'ènnier. Mais lé miyeu en est qué mes trais filles sount v'nues m'visiter – ieune d'Australie, ieune d'en Amerique et la traisième dé Devon. Ché n'fut qué pour tchiques jours, mais tchi buoanheu' d'les aver toutes trais à l'entou' d'mé! Et au mains deux d'ieux s'en r'veinnent mé r'vaie dans tchiques semaines. Et pis, coumme tu sais bein j'ai eune d'jaingue dé n'veux et d'niétches ichen en Jèrri qui sount tréjous là quand nous à besoign d'ieux. Et d'même j'nai pas a m'pliaindre.''
"Et autrément, me d'mandit l'Ph'lip, 'soignis t'bein té ichein?''
"Heureusement,'' j'lis dis, "autré qu'ichein en Jèrri j'nai pas ieu grand' expérience d'hopitaux – eune fais en Angliétérre y'a sept ans et eune fais au Japoun deux ans après la fin d'la dgèrre. Et d'même jé n'sis pas bein au coûothait à chu sujet, mais quant à ch't hopità' ichein en Jèrri j'nai pas eun mot à maldithe.
"Qué ch'sait les docteurs, les nosses ou les siens qui néttissent les chambres i'sount tous devoués à lus travas, et tréjous de buonne humeur. Ch'est ch'là qui dounne counfiance et nos fait aver l'couôrage dé voulez dgèri.
Mais bein seux les gens qui travaillent dans l'hopitaux i' n'ount pas l'travas qué nous pouarres férmièrs jèrriais avouns.
Tout ch' qu'il' ount à décider ch'est la p'tite affaithe dé copper ou dé n'pas copper la gambe à lus client, tandi qu'nous, les férmièrs, j'avouns d'grandes décisiouns à faithe, coumme par exemplye dé c'menchi à plianter en mié-janvyi.
"Dans mon temps, djà qu' not' terre en Egypte 'tait assez heurive, jé n'pensaî jamais à plianter devant la mié-févri. Achteur j'avouns à faithe fache à d'grans risques, et même s'i' prouvent nou n'en est pas pus heureux.''
"Et bein,'' s'fit l'Ph'lip, "chein qu'y a d'seux ch'est qué dé t'faithe la bile au sujet de ton failli bécqutoun d'patates né s'en va pas t'aidgi à éncouvri ta santé. Sai countent d'ton présent sort – chein qu'y'a à v'ner pourrait êt' bein pièthe.''
J'm'en vais vos dithe, i'm semblye souvent qué si les siens qui prétendaient counforter Job avaient ieu eune unioun, Ph'lip Desclios en s'rait dé v'nu Sécriétaithe-Général.
Lé Vier Trin'tais
11/3/1993
No comments:
Post a Comment