1927: lé wireless

Jèrriais · 1927: lé wireless

Maît'e Cliément d'Caen l'année passée avait promins à sa nièche de li faithe un biau présent. I'y avait donné à chouaîsi entre une "motor-bike" ou un "wireless set".

La hardelle en était toute rêjouie mais ou n'pouvait pas faithe s'n idée tchi chouaîsi.

Oulle aithait bain voulu une "motor-bike" pour pouver aller se promener et visiter ses amins dans toutes les parties de l'Ile, mais ou réalisait qu'i'y avait tréjous un certain dangi et étant nerveuse de sa sorte oulle hésiti pour longtemps devant que de s'décider.

D'l'autre côté oulle avait grand envie d'aver un "wireless," car oulle est folle pour la musique et aime à saver toutes les dernié nouvelles.



Une séthée, dans les temps d'Noué oulle 'tait siez des amins qu'en avaient iun et oulle en fut si enchantée qu'ou s'décidi d'abandonner toute idée d'aver une "bike" et quand ou r'vint siez lyi ou dit à s'n onclye. "J'ai fait mon chouai m'n'oncle !"

Le bouonhomme trésauti de la oui pâler d'même, et pour le moment, avait roublié sa promesse.

I's'imagini qu'ou voulait dithe tchiquechose tout-à-fait difféthent, qu'ou voulait li annoncer enfin, qu'oulle 'tait engagie.

"Oh bon !" i'li dit, "et tchest qu'est l'nom de la pouorre victime ?"

"Ah ! i'n'y a pas d'victime ! Je n'sis pas si bête ! J'aime bain mus un "wireless," ch'est pu aisi à contrôler, et comme tu m'avais promins de m'en faithe un présent, ch'est chenna qu'j'ai chouaîsi."

Maît'e Cliém c'menchi a faithe des caltchuls, combien que chenna s'en allait li couôter, et finalement i'dit à sa nièche : "Est-che qu'un gramophone ne f'thait pon aussi bain ?"

Mais ou n'voulit pon en oui pâler et oulle insisti si bain qu'ou fit le bouonhomme tenin à sa pathole.

Des gens d'la ville vinrent pliaichi les wiyeurs et installer le mécanisme et v'la tchinze jours que l'affaithe marche à merveille.

L'autre sé Maître Cliém inviti une demié douzaine de ses vaisins à v'nin entendre chenna.

Quand la nièche à Cliém lus annonci qu'i' s'en allaient oui l'enlouoge de Westminster, à Londres, sonner sept heuthes, Maît'e Dan Lêcaudey li raiponni que ch'tait un tas d'niollin, jamais nou n'li f'thait accraithe ditèt.

Et opprès qu'les sept coups furent donnés, il insisti que ch'tait tchiqu'un qu'était à capuchi sus un bachin dans l'aut'e appartement.

La sethée c'menchi par un solo sus l'piano, joué par iûn des prumiers artistes de l'Angleterre, mais les auditeurs n'avaient pas grand goût pour ditèt, et justement dans iun des plus biaux passages, nous entendit la grosse vouaix à Dan Lêcaudey demander à Mess de Caen, "Quand tchi qu'tu pâles de c'menchi à plianter ?"

V'là tchi fit mârri la hardelle et ou dit, "Ou n'pouvez pas rester trantchille don pour deux minutes pour êcouter chute belle musique-là ?"

Maît'e Dan li d'mandi extchuse et fit d'san mus pour y prêter un mio pus d'attention.

Le prechain itème sus le programme était une pièche sus l'violin, par Thresle.

V'là tchi fut bain pour une minute ou deux et pis le Pîteur Snichon, qui n'as pas pus d'ouie pour la musique que san tchan, demandi à Dan Lêcaudey, "Avous oui tchi prix la câsse que l'a s'menche va ch'tte année ?"

Dan raîponni qu'il avait oui pâler d'un aîtchu.

Là-d'sus Cliément d'Caen s'êcriyi que ch'tait d'la maintchi trop chi, et que si i' couothait à court il aimethait mus laissi sa terre paître ès coucous que d'acater d'la pliante à ches conditions-là !

I' s'en suivi une distchussion générale et la pouore hardelle et san "wireless" furent tout-à-fait ignorés.

V'là tchi la fit enragi, et d'un coup d'sachet ou touâni la "switch" et arrêti tout et r'couvri toute l'installation avec un drap.

Dès qu'la musique arrêti, la conversation arrêti ettou et Pîteur Snichon demandi à Elsie, "Y a-t-i' tchiquechose en dêroute ?"

"Oh nennin," ou li raîponni, "mais quand ches gens-là ont veu que lus talent ne vos interêssait pas ils ont pensé que che n'tait pas la peine de continuer."

"Mais est-che qu'i' pouvaient nos oui pâler ?"

"Dame ! ou viyez bain !"

La couosine à Elsie, qu'était-là ettou, s'apprechi d'lyi et li d'mandi tout bas pourtchi qu'oulle avait fait ch'la.

Et Elsie li raîponni en Angliais.

"Casting pearls before swine !"

T'c'hest qu'oulle voulait dithe par dithet r'merques ?

P't'être que l'buanhomme Cliément d'Caen et ses amins n's'raient pon trop content de le saver !!

Mais ettou, tchi drôle d'gens, couomme s'fit la nièche à Cliém de Caen.

Caouain
19/2/1927