1920: Si Marie Hibou est oquo en liberté, il est bain êvident que la police ne fait pas san d'vé!

Marie Hibou au "Baby Show"
The Owl's wife ought to be locked up

Jèrriais · 1920: Si Marie Hibou est oquo en liberté

Si Marie Hibou est oquo en liberté, il est bain êvident que la police ne fait pas san d'vé!

I'y en a qui m'disent que ch'est par sympathie pour le Caouain, viyant qu'il est bain respecté et qu'nou n'veur pas li faithe de la minsèthe ni exposer trop sa famille, mais je vos asseuthe, mes bouannes gens, qu'i' n'est pas besoin d'aver toutes ches considethations-là.

I'y a longtemps qu'ou dev'thait être enfrumée, et mé l'tout prumi, j'en s'sais bain content. Malgré qu'les gâzettes disaient l'aut'e jour que la police ne pouvait pas dêcouvri tch'est qu'était chette-là qu'avait fait du tapage au Show, à Springfield et qu'avait êgrinflié la fache à un offici d'police, tout l'monde sait bain que ch'tait lyi tout l'temps et ch'est un mystèthe pour mé que nou n'en a pas fait d'vé.

Et ou s'est oquo erdistindgie d'pis ch'la!

La s'maine passée je r'mertchi qu'oulle allait et v'nait deustrais feis par jour et châque feis qu'ou r'venait à la maison ou rapportait un patchèt d'tchique sorte, du savon scenté, un bringe à g'veux, un dêmêleux, une dgaîne et un ''tie,'' une castchette à mousse et ainsi d'suite. J'êprouvi à dêcouvri tch'est qu'i' y avait en allant mais jamais ou n'vouli me l'dithe et ou cherchi même à m'lanchi d's insultes en m'disant de m'mêler d'mes affaithes.

L'Jeudi l'arlevée ou dispathu emportant avec lyi le pus jeune des p'tits Caouains dans la bassinette à la femme à Fraînque Amin, qu'aithait deu, lyi, avé ieu pus d'avis que d'li prêter.

Ch'tait par Fraînque que j'su ouais qu'oulle 'tait horte.

Pensez-don! Oulle avait tout bouannement entré san mousse pour le ''Baby Show'' à la Prumié Tour!

Quand ou vint à la heche du Parc oulle entri tout grand, lyi.

Ch'tait Mess Benest et l'Sergent Clayton qu'étaient à garder la heche.

''Hi, missice! '' i' li criyirent, ''douze sous, si vos pliaît!''

''Ah bon!'' ou lus raîponni, ''je m'en vais vos en fichi mé des douze sous! Savous-bain que j'ai entré pour le concours? Et pis une autre chose, j'appartiens d'la Presse, mé?''

Et oulle eut l'toupet de s'servi d'man nom!

Là d'sus i' la laissithent passer.

Quand ou vint à appréchi d'la tente, i'y avait déjà un grand nombre de femmes avec lus ''babies'' à attendre pour lus tou.

Mais chenna n'la dêrangi pas lyi.

Oulle êprouvi à cachi sa vétuthe à travers de tout.

Ch'est-là qu'i' y en eut du tintamarre!

Deustrais perambulators furent capsizées avec lus otchupants, qui s'minrent à faithe des brèts comme si nous était à l's êgorgi.

Les mèthes vinrent futhieuses, naturellement, et se j'tithent sus Marie Hibou.

Mais la garce est capablye de s'dêmêler!

Oulle en d'shabillyi deux à la maintchi, et mins l'bonnete à une autre en telles.

Che fut avec bain de l'embarras que deustrais membres du comite reussithent à r'mettre la paix et à persuader Marie de s'rangi à sa pliaiche comme les autres.

Mais chenna n'dévait pas fini d'même.

Quand vint san tou à passer d'vant les juges, ou lus dit, avec l'arrogance que nous li connaît.

''Là! v'là un êchantillon d'mousse comme ou n'en avez pas oquo veu, j'garantis!''

Mais à chu moment-là iun des membres du comité vint souflier tchiquechose à l'ouotheille à iun des juges et ch'tis chin s'mins à contemplier l'mousse bain attentivement.

''Tch'est qu'est vot'e nom missice?''

''Marie Hibou, femme Caouain.''

''Ah! j'm'en doutais! Ch'est qu'ou viyiz, je n'pouvons pas statuer les merites de ch't êfant-là devant que l'Comité se sait réuni.''

''Et pourtchi raison, mon doux?'' s'fit Marie.

''Eh bain ou comprenez, i'y a ieu un protêt de louogi, car i' pathait qu'i y a des rumeurs dans l'public que ch'n'est pas l'Caouain qu'est san péthe, et comme les organisateurs de chute fête ichin ne veulent pas encouothagi patheil êtat d'choses, ou f'thez mus de vos r'tither. Quant à mé, je sis d'opinion, opprès aver examiné votre êfant, qu'i' r'semblye pus à un torsalet qu'à un caouain!''

''Ah! scélerat qu'ous êtes!'' Marie s'êcriyi, ''Pourtchi qu'ou m'prenez?''

Et d'un seul coup ou li rompit san parapluie sus la nuque!

Ou pouvez bain d'mander si ch'est qu'i y en eut du train!

Tchiqu'un s'mins à crier et à suffier pour la police, et dans mains d'deux minutes i'y avait pus de treis chents personnes attouo d'la tente.

I' fallit quatre policemainne pour entraîner tout l'bisnesse jusqu'à la route. Iun prins le pouore moussecot sous san bras et les treis autres prinrent Marie Hibou en cherge.

Ou se d'battait comme une folle et faisait servi du langage qui n'peut pas s'répèter dans une gazette respectablye. Les policemainne eurent bain d'la peine à la protégi contre la foule qui cherchait à l'étranglyi.

Quant à la bassinette, ou fut rapportée le lendemain dans une vainne. Ou n'avait qu'une reue, et le caoutchouc et une partie des rèts de l'autre avaient 'té airaichis. La bonnette était trillyie et l'corps était bosté comme s'il avait ieu un coup d'hache. Hunt n'en bâdrait pas seulement un chelin!

La femme à Frainque Amin veut saver tchest qui s'en va li en acater une neuve, mais che s'ra bain seux pas mé, tréjous! I'y a d's années que j'ai discredité Marie Hibou alors personne ne peut aver autchunes ercliamations envers mé.

Ch'est sa faute. Fallait pas li prêter.

Mais, tout badinage à part, mes bouannes gens, il est temps que tchiquechose sait fait. Criyiz-mé, et enfrumez Marie Hibou dévant qu'i' sait trop tard.

Caouain

18/9/1920