1923: N'v'la encoure une fais la saison des shows passée

Acouo eune articl'ye dé 1923:

N'v'la encoure une fais la saison des shows passée et couomme tréjous les siens appelés à jugi les bêtes furent bein jugis... par les siens qui les ergardaient faithe!

Pouor seur nous pourrait en conter de touotes les bênites sortes sus les d'vis à l'entouour du ring mais ch'est d'même touos l's'an.

Pouor dithe la vérithèt rein de dithèt qu'un show douonner de l'appetit et... la pépie!

L'année passée ieun des Secraithaire d'un important club en apprit un long but à ce sujet car il eut à payi hors de sa pouchette 28 tichets de lunch et nous trouvi èttout un oisé de chutte paraisse qui doit manger couomme quatre puisqu'il y avait quatre tichets de lunch à son nom! Le Président de chu club en fut éttout de sa pouchette.

J'crais bein qu ch'est viyant chunna que les siens d'la pus petite paraisse en Jerri descidites chutte année qui fallait mettre un stop à chunna et d'limiter l'nombre de tichets pouor le lunch et les rafraîchissements.

Les St. Ouennais, ieux, n'voulites pon s'laissi barrer d'même et y descidites d'aver une tente à rafraîchissements pour les siens de lus club et lus amis. Y faut dithe éttout qui décidites que ce serrait l'Coumitté et non l'club qui paierait mais diantre pas d'ber pouor les siens d'la p'tite paraisse!

Oprès l'show, couomme de couotume, nous eut l'diner sièz Forgeard, à la Grève mais quant vint un temps l'affaithe marchi couomme une tchéthue à tchans car nous n'tait pon d'buanne humeuthe.

Les siens d'la p'tite paraisse étaient v'nus pus nombreux qu'nous ne les avait veu de pis bein d's'années.

C'est l'grand homme d'la Fontaine qui présidait et quand vint l'temps y s'levi et proposi les toasts d'usage à Sa Majesté.

Un p'tit oprès, y proposi la santé des Juges, qui était bein buanne a en jugi par touot chein qui mangites!

Il y eut hardi de d'vis, pis iun des grands de St. Ou s'levi et d'mandi: Y a t'il d'autres santés à proposer, Moussieu le Président, car j'avons tchi faithe.

Herbert lus bailli un compliement et l'affaithe couommenchi a cauffer raide. Ch'est qu'il y en eut du d'vis et avec touot chunna pon de toast pour l'président du jour!

Les waiteurs furent les pus marris de touos car chunna avait touot capsizer et d'vant d'faithe la collecte pour ieux nos gens éthaient hors de table!

Chutte sèthée là, j'en entendis d'bein des sortes à l'entouour de l'honneur du club, d'une coupe et d'un Mess Sullivan d'oprès l'marchi à paisson. Couomme j'crais que l'gros l'pus maigre ayant office dans Hill Street aura hardi à dithe sus chutte affaithe là, pouor achteu j'aime mus taithe ma becque.

* * *

Dans la paraisse au Captain qui n'a jamais eté en mé, il y a des grands qui ont bein couorte mémoithe et n'v'la pourtchi l'téléphone fut bein utile pouor lus rappeler chein que l'assembliaie lus avait dit d'faithe et Mardi au sé deux ou trais de ces gens durent lus deshaller de sièz ieux pouor se rendre au Parish Hall.

Mé, j'y fut Mercredi au sé, viyant que nous avait mins dans les gazettes qui s'en allait y aver députation oprès l'assembliaie de paraisse.

J'alli me mucchi souos l'estrade et quand j'vit l'boss d'notre office entrer dans la salle j'pensi: ch'est qu'il a vent de tchicque chose pouor être v'nu jusqu'ichin.

D'vant que l'assembliaie n'couommenche j'entendis un perrot s'faithe: Y s'en va y aver du fun. Il y en eut èttout et j'sis quassiment d'l'avis du sien qui s'fit au chef de police qu'il devrait faithe son devoir et d'mander ès membres de payi l'entertainment taxe!

Je n'sais pon pouortchi, ou si j'le sais j'n'veur pou l'dithe, mais il y avait la une p'tite djingue de be buanne humeuthe! P't'être que ch'tait viyant que nous savait que touot était prêt au British!

Quant vint l'temps que l'boss de chutte paraisse mins aux vouaies un amendement, une demie douozaine de mains s'l'vites a haut, pis il ieut du d'vis, des coups de coude et d'autres mains s'l'vites l'une oprès l'autre et pouor seur j'n'voudrais pon prendre serment que touos les siens qui levites la main savaient chein pouortchi qui votaient!

L'pus bé, chest quant l'docteu lus proposi d'voter £2,000 pouor les qu'mins. N'v'la qu'etait bé d'trop et l'boss d'la paraisse était de chut avis; aussi oprès appel nominal n'v'la qui fut écarté mais tchi qui fut l'pus surprins et montri par ses d'vis qu'il avait été dans l'armée, sinon l'docteu ly même quant à l'unanimité nous voti chu même montant immédiatement oprès et qu'nous renvoyi à une autre année l'élargissement du qu'min près Les Colombiers!

Caouain

19/5/1923