1948: Merrienne on Politics

 Merrienne on Politics

Have Things Improved?

 

Moussieu l'Editeu,

 

En b'vant l'tais, hier, j'dis à la Merreinne comme chonna, "As-tu veu sûs la gâzette que nou ne r'vêrra pon les Recteurs dans l's'Etats?"

 

"Ah, n'me pâsle pas d'la politique," ou s'fit, "car j'en s'y lâssée. A touos les r'pas ch'est la même histouéthe. Est-che que tu n'as qu'une idée dans la tête? Pâsse-mé ue beurrée et le pot de g'lée."

 

Je l'fit, mais j'avais ocquo tchiquechose à dithe. "As-tu considéthé," j'l'y dit, "tchêsque-y peut d'arrivé ach'teu que l'Doyen est l'seul Ministre dans la Chambre?"

 

"Nânin," ou raiponnit," je n'y'ai pas seulement pensé, mais sans doute il est là pour lièthe les prièthes, et par chen qu'j'en vait, y'étha grand besoin d'chonna dans nos Etats à l'av'nin. Nou m'a dit qu'la maintchi d'chais candidats en ville ne vont ni à églyise ni chapelle. Tchêsque je dév'nons, man pouôre Ph'lip?"

 

"Quant à chona je n'sais pas," j'l'y dit, "mais j'ai d'la peine à craithe que les trais femmes tch'y sont sûs les rangs ne savent pas lûs d'vé mûs qu'tu voudras dithe."

 

"N'm'en pâsle pas d'chais femmes-là," ou dit. "J'admets qu'pour un temps j'm'étais mint dans la tête de prendre pour Sénateur mais j'vint à vais qu'une femme tait mûs siez-lyi à faithe san travas. Et jamais tu n'mé f'thas craithe que l's'êlecteurs d'la ville s'sont bêtes assez d'en mettre même yunne parmi touos chais hommes-là. Pour dithe vrai m'n'opinion d's'Etats ch'est tch'uls n'valent pas grand'chose comme y sont, mais qu'che s'sait chent fais pièthe si y'avait des femmes. actuellement, si n'y'avait qu'mé, j'enviêthais tout chonna à s'couochi."

 

"Mais êcoute, Merrienne," j'l'y dit, "tu vint ben avec mé avant-hier au sé êcouté l'Douar Vautchi et l'Jack Le Merquand tch'y prennent pour Député."

 

"Vèthe," ou dit, "j'fut mais ch'tait par tchusiôsité. et, ma fingre, j'éthais fait aussi ben d'resté siez-nous. N'y'avait pas seulement une tâsse de tais. Y faut dithe quandmême que chu Jack le Merquand a la langue bein pendue. S'il y veint, il est capablye de faithe mal à tête au Baillyi. Entre té et mé, Ph'lip, ch'est deux bouons garçons, nos candidats, et ch'est grand dommage d'les vais yun contre l'autre.

 

"J's'y d'ôv té là," j'l'y dit, "mais nous a tréjous veu chonna à Saint-Ou. Ch'tait ben pièthe dans les viers temps quand le Louothi et la Rose taient tréjous à s'entre battre. Y n'y'a pas tant d'animôsité au jour d'agniet."

 

"Man," ou dit, "ni pas tant d'béthie, ni pas tans d'sous dêpensés follement. P't'être, après tout qu'j'amendons sûs chu sens-là. Tchêsque tu'en crai?"

 

"Y s'pouôrrait," j'raiponnit, "mais avec chonna y'avait pûs d'fun à une êlection le temps pâssé."

 

Ph'lip

1948