Lé Nièr Beurre à Mess Dolbé

"Lé Nièr Beurre à Mess Dolbé" par GJ

Mess Dolbé a dans sén armouaithe
eune potée d'nièr beurre d'y'a sept ans.
I' fut grée dans l'drein millénaithe,
mais Mess Dolbé lé trouve bein bouan.

Dans sén armouaithe Mess Dolbé a
des boutil'lies et des tinnées,
des boêtées d'chenna et d'chennechîn,
et bein des potées mié-oubliées.

Mess Dolbé trouvit dans l'armouaithe
eune paithe pons'leuse, eune vielle orange,
eune boêtée d'galettes grabataithes,
et un fronmage tch'est en êfange.

Dans sén armouaithe Mess Dolbé a
acouo un morcé d'gâche qu'nou fit
pouor la vîsite dé Victoria,
l'Duc, en mil huit chents quarante-six.

Mess Dolbé garde dans sén armouaithe
des vraies antitchités, sémnage:
eune tinnée d'paîsson tch'est grand péthe,
eune tinnée d'pais tchi va sus l'âge.

Dans l'armouaithe Mess Dolbé trouvit
eune vielle potée d'ouognons, picliés
trais mais d'vant la Batâle d'Jèrri,
et un podîn du preunmié Noué!