Friday 11 September 2015

Sus la Pêque



Dans la Nouvelle Chronique de Jersey 27/4/1904:

La Loi sus la Pêque
Moussieu, - I pathaît que les messiaeux de l'autre bord de l'ieau ont renviè la pétition des pêtchaeux, contre la Loi sus la Pêque, aux Etats.

J'voudrais bein saver tchès qui s'en vont faithe mé, nos Etats.

Les pêtchaeux disent que nou les traite de faigneants, de pièrchaeux, et que, pour combl'ye d'tou nou lus halle le pain du bé, ou l'paisson d'la main, ch'est bein la même chose.

Les messiaeux, qu'aiment la pêque à la ligne, disent que ch'est les pêtchaeux qui trâlent trop, qui barrent les paiessons, et qui les pêquent en masse devant qu'ils aient temps d'craître, enfin qui font d'lus mus pour les chasser au pus tôt.

Comme ou l'viyis, châtchun s'envie l'cat-ès-d'ghéthèts.

Pour ma part, j'vos envie en deux buts d'rime chein qu'est p'têtre la vraie raison du manque de paisson.

Tout à vous,

Bênitchaeux



Sus la Pêque
Yiavait une fais, m'sammins,
Des messiaeux
Qu'allaient dé temps en temps
Tuos joyieux
A la pêque.

Yiavait dans l'même temps
Des pêtchaeux,
Tchi travaillent du
Entre yiaeux
A la pêque.

Yiavait étout des paiessons
Dans la mé
Tchi n'aimaient pas dut tout
Oui pâler
Dé la pêque.

Les messiaeux s'acharnaient
Sus l'paiesson!
Les pêtchaeux gâzouillaient
Tout l'lanchon!
A la pêque.

Les choses ne pouvaient pas
Continué
Sus chu pi là longtemps
Sans gâter
Toute la pêque.

Les paiessons p'tit à p'tit
S'effritirent
Et d'chu pays d'mains en mains
S'appréchirent,
Vu la pêque!

Enfin un bouan jour arrivi,
D'chlà yia dêjà une bouanne volée.
Quand tout l'paiesson grand et p'tit
Pensit qu'il avait beintôt souffert assez.
Et toutes les peupliades de la mé
S'assembllirent pour en décider.

Tchi concille que ch'tîla, mes chiers
Yen avait-i d'chu paiesson,
Des maquethiaux, des lieux, d's'ormers,
Pliaès, vlicots, vras, lanchon,
Andjhulles et brèmes, et hau et bar,
Bênits, horfi, rousses et homards.

Yiavait jusqu'à de p'tite chervette
Et d'humbl'yes bobbes et des cabots,
Des becques-de-corbin, des chuchettes,
Des crabbes, et même de p'tits manchots,
Tchétaient tout v'nus pour distchutter
Comment à la pêque êcapper.

L'heutheux pêtchaeux qu'éthait veu ch'là
Tchi coup d'all four qu'il éthait fait
Ov ses dranets bein plièchis là
Jamais n'éthait r'veu rein d'itêt!
Mais nos paiessons en r'pos rêsolurent en p'tit d'temps
Qu'la miyeu chose à faithe était d'fichi tous l'camp!

De d'pis chu temps la nos messiaeux
Boëttaient lus lignes en vain
Et quant à nos puor' viers pêtchiaeux
I n'y comprennaient rein,
Mais les paiessons heutheux, dans diffeuthents endrèts
En galopant dans l'vret châtchaient la coue de joie!

No comments: