Sunday 13 September 2015

Èrmerciements dé Brian

Né v'chîn l'texte d'aniet d'not' auteu du mais, Joan Tapley:

Here's today's text by our author of the month, Joan Tapley:

Èrmerciements dé Brian
Mêcredi et Vendredi dans la tchuisinne
J'lave les vaissiaux avec grise mine -
Du thée et café pour les clâsses
Je m'met à laver toutes les tâsses!!
La bouonnefemme est horte a la Banque
Et, maté chin, j'ai ma à la hanque.
Pourtchi qui faut que je lave tant
D' vaissiaux pour les buigres d'étudiants?

La v'la 'rvenue d'la classe de Nouë
Ou m'dit "J'ai un présent pour té!
Et là sus l'env'loppe que j'ouvrit
Je vis man nom si bein ecrit,
La carte dit: Mercie des garçons et filyes -
Depense ches sous-chin à Longueville! !

Surprins, je m'trouvi hardi bête
Et je mins à m'gratter la tête
Janmais j'n avais ieu tant d'herpins
Pour dêpenser dans mes gardins!
Je m'grattis p'têtre eune heuthe ou deux
Et l'lendemain en m'rasant au mitheux
J'laisse couorre un cri et j'mins la veue -
Sus l'haut d'ma tête, j'n'avais pas d' ch'veux!!!

J' m'en fus toute suite les deux-trais milles
Jusqu'à la boutique de Longueville
Et l'vant ma castchette, j'dis a l'houmme:
"Si vos donne eune petite soumme,
A-vous de tchi pour me faithe craître
Les ch'veux qu'j'ai gratté d'sus ma tête?"

I' dit: "J'avons du gouaino, d' l'os et d' sang
Et d'autres boutèlles là dans des rangs.
A travers du bel, des toutes fraiches biètes,
Ieune vos couvrerai la tête!!
Mais Moussieu - ne n'vos faites pas la bile -
Un houmme sans ch'veux est pus virile!!"
Excité j'dis: "Mercie man garçon" -
Et dans sa main, j'mins touos mes sous!

Achteu, j'vos dis en verité
Que j'ai trouvé ma virilité,
J' lave les vaissiaux dans bein mains d' temps,
Mercie! les charmants etudiants!!

No comments: