"Et y'eut eune dgèrre au ciel"

Et y'eut eune dgèrre au ciel. Miché,
chu grand m'sagi tch'y gardait quart,
griyit ses plians d'ji et d'ajet,
épis gaffit san sâbre d'êpart.

Et l'grand dragon fut pitchi bas
ès houles d'enfé; ses rudes êcrèdes,
êbrétchies, bogsées, fîtent frédas;
tchiyant du copé, gav'lé raide.

Chu vièr sèrpent tch'a nom l'Malîn
fut pilvâtchi par l'ange Miché;
la sainte valeu cârrit san v'lîn,
la putheté clièrgit san mêché.

Ses anges fûdrent pitchis bas auve li;
lus ailes êraînchies, brûlées hors;
et y'eut eune dgèrre; Miché gaffit
san sâbre d'êpart, mînt ses armes d'or.

La Révélâtion, Chapitre 12
Et y'eut eune dgèrre au ciel. Miché et ses anges lus en fûdrent combattre lé dragon, et l'dragon et ses anges quétilyîdrent mais i' fûdrent achouêmis et i' n'y'avait d'aut' dé run pouor ieux au ciel. Et l'grand dragon fut pitchi bas, chu vièr sèrpent tch'a nom l'Malîn et l'Enn'mîn, l'chein tchi dêroute tout l'monde. I' fut pitchi bas dans la tèrre, et ses anges fûdrent pitchis bas acanté li.